رتبها

السلام عليكم.. انا ايمن ادريس انسان سوداني حابي يشارككم قصتو اللي ما معتبرها قصة نجاح لسة لكن ممكن تكون مصدر إلهام وتحفيز للناس، غايتو القصة حتكون طويلة شوية كدا (او طويلة شديد ما متأكد😂) فالناس تحاول تستحمل معاي 🤦🏽‍♂

طيب مبدئياً انا انسان سوداني عادي كادح (جداً) بقرا في الجنوبي هندسة مدنية في السنة التالتة ، بحب جداً اقرا الكتب والروايات وبقضي بيها اغلب اوقات فراغي..المهم من احلامي الصغيرة البعيدة المنال اني اكتب كتاب كدا وينتشر ويصل العالمية ويستضيفوني في مؤتمرات عالمية والاحلام الوردية ديك

ففعلاً بديت اكتب كتاب قبل فترة لكن كنت بفكر انتهي منو كيف واطبعه كيف وانشرو كيف اصلاً وكيف اسوّق ليهو في البلد الصعبة دي والتكاليف و و و المهم كترة التفكير في الموضوع كسرت الحنك ورجعت للواقع الحزين العايش فيهو

المهم.. البداية كانت في أول يوم من عيد الضحية ٢٠١٩ ، طبعاً بعد الضبيحة والفطور والشربوت والامور دي مشيت اديها نومة النهار الزابطة ديك ، فرقدت في السرير ومارست أحد هواياتي المفضلة وهي الاستماع للأغاني من soundcloud

فالمهم مع ال overthinking البجيك قبل النوم داك كنت بفكر ياخ ليه حُلم صغير زي دا.. انسان برة البلد دي ممكن يكون مجرد حاجة تافهة وساهلة بالنسبة ليهو ما اقدر احققو في البلد دي، ليه ماف جهة ممكن تساعد الزول يقدر ينشر كتابه وينتشر ويتسوق ليهو كويس والامور تمشي زابطة

ياخ مثلاً تطبيق زي soundcloud دا عاين ساعد الفنانين كيف وفي فنانين فعلاً وصلو مراحل بعيدة حالياً، بداياتهم كانت في التطبيق دا.. فقلت هسي لو في تطبيق بنفس الفهم دا في البلد دي لكن للكتب ياخ دا حيكون الزيت زاتو وحيساعد ناس كتار حالمين زيي كدا يقدرو يشاركو كُتبهم دي (إلكترونياً)

المهم كنت بفكر وزعلان شديد وقلت الموضوع دا ما حيمشي ساي 😂 ، فقلت ياخ ليه ما اعمل التطبيق دا انا.. فيها شنو يعني !! المهم قلت خلاص يا ايمن دا يكون التطبيق بتاعك (كلام ناتج من الزعل ساي طبعاً)..

المهم قلت خلاص اعمل تطبيق ظريف كدا يساعد الناس الكادحين الشغوفين بالكتابة زيي ديل ينشرو الروايات والخواطر حقاتهم الكاتبنها في دفاترهم وكراساتهم وفي الفيسبوك وتويتر.. نقوم نجتمع كلنا كدا في التطبيق دا ونتشارك حاجاتنا دي وتنتشر السعادة بين الناس وكان الله يحب المحسنين 🤷🏽‍♂️

بعداك يازول الحماس شالني والنومة طارت وجبت دفتري الصغير البشخبط فيهو افكاري التافهة وقلت انا اكتب الكلام دا ويمكن لي قدام لو ربنا أحيانا افكر فيهو بصورة جادة كدا، فبديت اكتب الفكرة الأساسية واتفرعت منها ومليت قريب الصفحتين عن المشاكل الممكن يحلها التطبيق دا..

حاجة كدا قريبة لفكرة تطبيق wattpad لكن بصورة أوسع ويكون مجال للكُتّاب السودانيين بالتحديد ال(هواة) زيي كدا عشان يقدرو يلقو فرص كويسة يطلّعو الجواهم.. وما موضوع كتب بس كمان أشعار وخواطر وروايات صغيرة وكلّه..المهم يا عمك شخبطت ال brainstorm الجاني في اللحظة ديك كلها في دفتري الصغير

قلت خلاص دا تطبيقك يا ايمن وطوالي ولا هظرت اتصلت على واحد صاحبي ووريتو الفكرة ويازوول حمسني ليك وقال لي يا مان الموضوع دا حيعبر وخش طوالي وانا معاك قلت ليهو يازول منتهي.

المهم من اللحظة ديك اتحولت من مجرد (زعلة) لي حاجة ممكن تتعمل فعلاً وبديت افتش واكابس في اليوتيوب واشوف متطلبات الشغل دا شنو.

لقيت نفسي مبدئياً كدا محتاج لي راس مال عشان ححتاج ادفع للمبرمج والمصمم وجوطة كتيرة كدا.. فدا كان turn off كبير والروح بتاعت كسر الحنك بدت تلوج في الأفق.. يا زول راس مال شنو وانا لو يوم فطرت في الجامعة فطيرة هوت دوغ من (كويك) ميزانية الشهر بتخرب 😂

لكن قلت لالا كدي استكين بتتجازف.. المهم بعد تفكير وتفتيش كتير لقيت انه في خيار تاني اني اجيب المبرمج والمصمم ديل يخشو معاي بالنسبة !

لكن التحدي كان في انه كيف اقدر اقنع ناس ما بعرفهم اصلاً انه يشتغلو معاي بدون مقابل على مجرد وعودات انه التطبيق ممكن ينجح ويجيب قروش دا غير انه ممكن فكرة التطبيق زاتها ما تقنعهم.. !!

قلت خلاص بدل ما اجيب ناس ما بعرفهم واقنعهم والموضوع الطويل دا انا اشغّل ناس من معارفي احسن.. المهم واحد من قرايبي عنده خبرة في برمجة المواقع قعدت معاه وقال لي انا بشتغل ليك back-end (عضم) التطبيق والويبسايت مجان عديل بعداك بخليك.. قلت خلاص دا الزيت ما حنك بعدين دي بتتجازف.

في واحد فردتي كدا بقرا معاي مدنية شغوف بالبرمجة وبيتعلم فيها اسمه (علاء الدين) قلت خلاص اشغلو معاي واصلاً انا ما مستعجل.. يتعلم ويطبق في التطبيق حقي دا طوالي وبرضو يكون مساعد لقريبي لحدي ما يخلينا يكون علاء الدين اكتسب خبرة كويسة وكدا كدا زول صحبي وثقة اخير من زول ما بعرفو

المهم وريتو الفكرة ببساطة وعجبتو وقال لي قدّام وقال حيشتغل لي الواجهات.. وهنا امتلأ قلبي بالسرور وقلت خلاص كدا اول لاعب في التيم اتجازف والحماس بقى ألف وقلت ارح طوالي نبدا الشغل يا مان..

تاني فضل لي المصمم اهااا فتشت لستة معارفي كلها يا كافي البلا ما بعرف لي جرافيك ديزاينر واحد!!.. فقلت خلاص دا هنا الا اشوف واحد ما بعرفو واقنعو بالفكرة بس وان شاء الله واحد يقتنع بفكرتي دي

المهم استكنت لي كم يوم كدا.. بعداك وانا بتصفح في الفيسبوك لقيت لي بوست واحد ناشر مجموعة بتاعة تصاميم (ما عارف مارك عرفني كيف بفتش في مصمم) المهم التصاميم عجبتني شديد وقلت خلاص دا زولي زط

المهم طوالي خشيت ليهو ماسنجر السلام عليكم انا ايمن عندي فكرة تطبيق...إلخ المهم قلت ما اخليهو يقرر هسي واحاول اقنعو انه نتقابل عديل عشان نتكلم بصورة مفصلة عن الموضوع وفرصة انه يقتنع تكون احسن فقال لي خلاص تمام وسبحان الله الموضوع مسلك معاي تسليكة مريبة الزول طلع ساكن جنبي !! 😂.

اتقابلنا بعد كم يوم واتكلمنا في الموضوع وصراحة (مازن) @mvzins طلع زول زابط واتحمس معاي وحمسني زيادة والاسم دا احفظوه كويس لأنو لو ما الزول دا ما كان وصلت المرحلة الانا فيها هسي دي.. والحمد لله قدرت اقنعو بالفكرة وموضوع النسبة..

فدي كانت الفرحة التانية.. اخيراً قدرت اقنع ناس بفكرتي اللي كانت مجرد فكرة تافهة جات في لحظة زعلة.. هل فعلاً حتتحول لحاجة حقيقية.. هل فعلاً ايمن طالب الجنوبي الكادح حيتحول لرجل يملك (مشروع) في البلد دي؟😂😂

المهم اتكلمنا قريب الساعتين وكان نقاش مثمر جداً مليء بأجواء من التفاؤل وتبادل الافكار.. اقنعني انه نبدا بالتصاميم ووريتو الفي راسي وقال لي خلاص اديني اسبوع كدا وارسل ليك تصاميم مبدئية للواجهات..

في نفس الوقت بهناك قريبي مطمّنّي انه ماشي كويس والامور سالكة معاه وعلى حسب كلامو قرب يخلص..

اسبوع بالضبط ومازن رسل لي ٣ صور لي ٣ واجهات ودي كانت احلى ٣ صور اشوفها في حياتي.. ما حكاية إنه التصاميم درعة لالا ! .. لكن شُفتو احساس المغترب لمن مرتو تولد في السودان ويرسلو ليهو صور ولدو؟😂

المهم ما علينا انا زاتي ما عارف الاحساس دا بس حسيت انه دا احساس المغترب دا 😂..
المهم بعداك بقينا نجتمع كل مرة انا ومازن وعلاء الدين وستات الشاي حقين الخرطوم ٢ حفظونا حفظ !

وزي ما معروف طبعاً افضل الافكار والمشروعات ومخططات المستقبل بتبدا من قعدات ستات الشاي.. بقينا نتلم وناخد وندي ونتناقش ونعمل شنو وما نعمل شنو وكيف وطبعاً دايماً في رفقتي دفتري الصغير.. فاتفقنا انه نحن لازم لحدي شهر 12 نكون خلصنا نسخة اولية للتطبيق عشان نحصل معرض اسمو sitex

سايتكس دا مؤتمر كدا بيُقام كل سنة في ارض المعارض في بُرّي بيتلمو فيهو الناس البادية مشاريع ويعرضو مشاريعهم دي وبكون فيهو مستثمرين.. فالناس بتحاول انها تكسب المستثمرين ديل لمشاريعهم دي

المهم.. بعد قعدات ومجهودات ذهنية مكثفة حتى يادوب اتفقنا على اسم للتطبيق
Writers' corner @writerscornersd
دا الاسم وكان ابسط اسم بيعبّر عن فكرتنا بصورة دقيقة..

بعد كم يوم علاء الدين قال موضوع انه هو يادوب بيتعلم دا ما جايب حقو واحسن نجيب زول متمرس وقال انه ماف داعي يواصل معانا وكلمني انه حيوقف ودي كانت ضربة كبيرة بالنسبة لي خصوصاً انو اول الناس الدعمتني ووقفت معاي وكانت حاجة حزينة انه ما حيواصل معاي للنهاية..

لكن طبعاً اقنعني وكلامو منطقي وفي النهاية دا حال الدنيا.
اضطرينا نبدا رحلة تفتيش تاني وتاني اشوف لي زول اقعد معاه واقنعو بالفكرة و و و.. المهم بعد مكابسات وزمن في النهاية لمينا في محمد الامين (فيفتي) @FiftyPieceOfsht

اتواصلنا معاه واجتمعنا ووريناه الفكرة والتصاميم.. ففتي في الوقت داك كان متخرج ليهو سنة وشغال في شركة وماسك مشاريع تانية فما كنت متوقع ابداً انه يوافق يشتغل معاي لكن زي ما قلت ليكم الامور مسلكة معاي بصورة غريبة وففتي خلعني عديل لمن قال لينا انا معاكم 😂

المهم كدا التيم يادوب قفل والشغل بدا يتحرك انا بدي مازن الفكرة الفي راسي مازن يزبطها ويصممها فيفتي يستلم التصميم ويبدا يشتغل الواجهات ..بعد اسبوعين تقريباً من الشغل احتجنا مبرمج زيادة عشان الشغل كتر..

ففتي قال محتاج واحد يشتغل ليهو شغل ربط الواجهات بال back-end عشان لو اشتغلها براه حياخد زمن طويل ومجهود هو ما بيقدر عليه لأنو عندو مشاريع شغال فيها وغير انه ماسك شغل الواجهات هنا برضو !!

وطبعاً ما عندنا طريقة نجيب زول تاني ونديه بالنسبة لأنه كدا الشغلة كترت وكان لازم يا إما نجيب زول ندفع ليهو عديل او نحمّل ففتي المسؤولية دي فهنا اتختينا في حتة ضيقة.. لكن بعد تفكير لقينا انو انسب حل نجيب زول وندفع ليهو

فدي كانت حتة ضيقة جد جد لأنو زي ما عارفين من البداية شغال بالملح ساي من وين اجيب قروش ادفعها لي زول !! اتديّن ولا اعمل شنو ياربي!!.. لكن اصريت اني ما اكسر الحنك وقلت كدي نشوف البيحصل شنو..

1/10/2019
التاريخ دا حياتي كلها ما حنساه، اليوم دا انا ححكيهو لي احفادي واحفاد احفادي من شدة ما متذكر كل تفصيلة فيهو 😭.. كمية المعاناة وال(بل) الحصل لينا في اليوم دا.. كدي اخدو نفس كدا وقولوا بسم الله وتعالوا احكي ليكم تفاصيل اليوم العظيم دا..

طيب في اليوم دا كان في ايفنت اسمو (مفروش) في معهد جوتة.. الايفنت فهمو انه انت عندك كتب تجيبها تعرضها هناك.. ف بكون ملتقي للناس النحن مستهدفنهم ف قلت دي احسن فرصة نعرض فيها الفكرة ونعمل دراسة للسوق ونشوف الحاصل شنو وكدا..

انا عرفت عن مفروش قبلو بي يوم بالعصر كدا.. فالوقت كان ضيّق شديد عشان نجهز ليهو ونحن ما عندنا البلحة ! وكمان ولا بعرف واحد من المسؤوولين عشان احجز عندهم وما عارف اذا الشغلة بقروش ولا ساي !!

المهم كلمت مازن انه نحن لازم بي أي طريقة نتصرف نمشي نتكلم عن تطبيقنا دا هناك ولازم كمان نظهر بي أحسن صورة.. دايرك تعمل لي منشورات وفلايرات كدا ونمشي ندرعها هناك..

ومازن ما هظر الساعة ٩ مساء رسل لي التصاميم (فلاير وبزنز كارد) ومشينا العربي في الليل داك زاتو قلنا قبل م المحلات تقفل نشوف الاسعار كيف عشان بكرة نجي جاهزين، بعد تفتيش وجرجرة اخيراً لقينا الزول المناسب.. اليوم التاني يوم مفروش طلعت من بيتنا ٨ صباحاً وهنا بدا اطول يوم في حياتي...

ضربت لي مازن يجيني المحل الامبارح عشان نطبع الحاجات، جازفت لي قريشات كدا ومشينا لي بتاع المطبعة (ابراهيم) وصراحة حابي اعمل شاوت آوت للزول دا لأنو كان سبب في نجاح اليوم دا مطبعتو اسمها (مطبعة العربي)

المهم قعدنا مع ابراهيم وشرحنا ليهو الحاصل واننا عايزين عدد 100 فلاير و 100 بزنز كارد (كمية بسيطة بس مفلسين ما عندنا ميزانية نسوي شنو !!😓).. ومفترض نستلمهم الساعة ٢ ضهر عشان نلحق الايفنت اللي بيبدا الساعة ٤

فاضطّر يفضى لينا اليوم دا كله ويقعد قصادنا عشان ننجز ونلحق.. زي الساعة ١١ كدا انا قلت اخليهم وامشي اقابل المسؤولين هناك عشان اكلمهم ويحجزو لي مكان (ايوة يادوب داير اقابل ناس مفروش واوريهم انه الاخ الكريم دا داير يحجز عندكم مكان واحتمال يقولو لي انت منو زاتك عشان نحجز ليك... !!!)

اليوم داك كان فيهو سخانة تشوي عديل.. مشيت على الناس ديل وطبعاً معهد جوتة دا عندو فرعين في السوق العربي واحد في اقصى الجنوب والتاني في اقصى الشمال !

فمشيت الفرع الفي شارع البلدية قالو لي لالا فرع الايفنتات في الشارع التاني بهناك (اقصى الشمال حرفياً) ! طلعت مشيت بهناك قالو لي فعلاً الايفنتات هنا لكن المشرفة حالياً قاعدة في الفرع داك !! 😂.. فاضطريت ارجع..

غايتو المرمطة المرمطوني ليها وفي نص السخانة دي انا بديت اسيح عديل ورجليني بقت ما شايلاني..رجعت تاني بهناك وصلت واخيراً بحمد الله قابلت المشرفة قربت اسجد سجدة شكر

المهم رحبت بي وشرحت ليها المشروع بصورة عامة ووريتها جاي لي شنو، عجبتها الفكرة وقالت لي ماف اي مشكلة وكمان بنجهّر ليك طربيزة ومكان صغير تقدم فيهو مشروعك.. الحمد لله اول بُشارة في اليوم دا وكدا ضمنت مشاركتي..

مع الجوطة دي كلها بقيت ما حاسي بالزمن وعاينت لقيت الساعة عملت ٣.. الله.. !! الزمن كبس!! ..ضربت لي مازن وطلع لسة عليهم كتير.. قلت خلاص انا ارجع ليهو هناك اشيل منو الكمية الجهزت والباقي لمن يخلص يحصلني بيه.

وفعلاً رجعت شارع المطابع تاني كداري شلت الحاجات وتاااااني جيت راجع الايفنت.
غايتو انا ما عارف قدرة التحمل دي جاتني من وين لكن متأكد لو دا زول غيري كان حيقع يموت في الشارع من المجهود والسخانة والمشاوير الكداري دي.. لكن كلو يهون عشان خاطر المشروع ولا شنو !!

المهم لمن وصلت لقيت في زحمة خيالية والناس كتار شديد والايفنت بدا بدري !! .. بعد معاناة قدرت اخش وأول ما خشيت لاقتني المشرفة وقالت لي حجزت ليك المكان امشي شيل واحدة من الطرابيز دي ووزع فيها منشوراتك وبالتوفيق..

مشيت شلت طربيزتي ومشيت المكان ووزعت فيهو منشوراتي وقعدت.. ومن هنا ما شاء الله الله اكبر دا كان اول ظهور علني لي @writerscornersd

بدو يتوافدو الناس وطبعاً الناس جايين للكتب فأنا كنت الكلمة الشاذة في وسط العارضين.. اغلب الناس بيعاينو لي وظاهر عليهم الفضول عايزين يعرفو انا بعرض في شنو؟! فقلت استجمع ثقتي في نفسي وابدا اعزم الناس..فبقيت شغال اتفضلو اتفضلو لي اي زول يجي ماري واخيراً بدو يجوني اول ناس..

قلت بسم الله واخدت لي نفس كدا وبديت اشرح في المشروع اعتماداً على الفلايرات المجهزنها.. بشرح للزول وبعد اخلص بديهو البزنس كارد واقول ليهو لو عايز تعرف المستجدات اتواصل معانا والله احساس بزنس مان كدا وبتاع غايتو كنت مستمتع 😂

المهم طبعاً التحضير حقنا كله كان معتمد على كلام حافظنو وكاتبنو في الفلايرات.. لكن لقيت نفسي مضطر (ارتجل) لأنو حسيت انه الناس مهتمين اكتر وعايزين يعرفو الفي راسي شنو بعيداً عن المكتوب !!

فبديت اشرح المشروع من منظوري الشخصي وطبعاً التوتر والعرق ما يدوك الدرب. وفعلاً لقيت انه تفاعل الناس معاي بقى افضل.. وشوية شوية عدد الناس البجوني بدا يزيد.. فاتخلعت من كمية الاقبال على الفكرة وبدو الناس يسألوني حننزل متين و و و ولقيت انه فعلاً في ناس محتاجة لي في الدنيا دي 😂

ياخ انا خليت اي شي وبقيت مخلوع ومتوتر من كمية الناس الجوني وحلقي نشف من كترة الكلام وطبعاً الناس كتار شديد وشبه قطعت اوكسجين !! .. بس اتماسكت وما عندي حل طبعاً مفترض يكون معاي مازن يشيل معاي لكن هو لسة في المطبعة !!

الناس زادت كتير والفلايرات والكروت العندي بدو يخلصو خلاص.. ضربت لي مازن قلت ليهو الحقني يا بل الشغلة دي طلعت كبيرة عديل وانا اتهلكت خلاص وحصلني بي باقي الفلايرات والكروت لأني قطعت خلاص 😭😂

المهم بعد زمن اخيراً مازن وصل وحصلني بالحاجات.. حفّظتو الكلام الحيقولو وبدينا نشرح سوى.
٤ ساعات انا ومازن واقفين نشرح..رجليننا خدرو حرفياً.. الناس لسة بيتوافدو لكن مع وجود مازن اتماسكت اكتر وبقينا نشرح ونشرح وكمان بقينا ندسدس في الفلايرات والكروت عشان ما يخلصو..

برغم التعب كانت لحظات جميلة جداً جداً وانا كنت في آخر مرحلة من الانبساط.. فكرة انه في ناس متطلعين لي مشروعك ويسألوك حترفعو التطبيق متين دا احساس عظيم يا انسان !! هنا دي كان اول مرة احس انه writers' corner دا حاجة حقيقية !!

جات الساعة 8:00 ولقينا نفسنا انجزنا وقلنا نمشي خلاص بعد دا.. جاني واحد من المشرفين وقالت لي رايك شنو تجي تقدم فكرتك دي في المنصة هناك !!!

الله..!! منصة..؟! انا..؟!
تطبيقي...؟! قدام الخلق دي كلها..؟!
الفكرة كانت مستبعدة جداً بالنسبة لي واكيد ما مستعد للمرحلة الاتكلم فيها عن writers' corner في مسرح بي مايك !!

اتوترت جداً في البداية لكن قلت دي فرصة ما بتتعوض.. استجمعت قواي وقلت ليهو قدّام..
انتظرت فرصتي ومشيت على المسرح.. كمية التوتر الفيني ياخوانا تكفي بلد كاملة !!

ركبت المسرح في لحظات الصمت والتطلع واقسم بالله برجف لكن كنت بردد جواي اتماسك يا ايمن.. مشيت استلمت المايك ووقفت.. اتخيل يا انسان تمسك مايك تقريباً لي اول مرة من زمن طابور الثانوي وانت ما محضّر وما عارف تقول شنو وقدام اكتر من 500 زول قدامك !!!

المهم ربنا اداني ثبات كدا من ماف التوتر بدا يخف وبديت اتكلم.. السلام عليكم انا ايمن عندي مشروع عبارة عن كدا كدا كدا ولقيت نفسي بسرح وبمرح والناس بتسمع وفي النهاية من الحماس درعتها وقلت ليهم عشان تعرفو المستجدات زورونا في موقعنا:
*حرفياً قشطت لي موقع من راسي*
😂😂😭😭

ياخ اللحظة العاينت فيها لي مازن وهو كاتم الضحكة انا ما عرفت اضحك ولا ابكي ولا شنو غايتو الحمد لله في اللحظة دي بالذات حصلت جوطة كدا والناس ما ركزت معاي شديد.. ربك ستر واتمنى اي زول كان في الايفنت دا وسمع كلامي وهسي بقرا في الثريد يسامحني على ويبسايت الصحفيين الدخلتك ليهو دا 😭

طيب ياخوانا دا كان باختصار يوم مفروش.. استفدت شديد من اليوم دا ويمكن دي يادوب كانت البداية الحقيقية لينا.. عرفت انه في ناس منتظرننا واني ما بعمل في حاجة ساي.. اتعرفت على كُتّاب محترمين وفي البقول ليك انا متبرع ليك بي كتبي وفي البحمسك وبقول ليك تطبيقك دا حيحل لينا مشاكل

عرفت انو @writerscornersd دا ما حيكون تطبيق بس دا حيكون مجتمع كامل !

خلّص يوم مفروش بي كل تفاصيلو والتعب المُميت الكان فيهو.. بعداك رجعنا نشتغل تاني.. رجعنا بي روح اقوى وبي عزيمة وراها دافع حقيقي ملموس لأول مرة.. حسيت بالمسؤولية الشديدة وقلنا نشوف موضوع المبرمج حق فيفتي بعد دا الشغلة دي يادوب نجضت..

المهم فيفتي اقترح لينا (ماجد).. اتلاقينا مع ماجد وريتو الشغل والمطلوب منو شنو.. وصراحة حسيت بيه زول اصلي وقلت الزول دا بعزنا وما بشيل مننا قروش كتيرة غير انه دا شغل حق (ربط) ساي زي ما قال فيفتي فوق فبتتجازف ما حنك غايتو كنت بفكر بسطحية شديدة خلاص 😂😂

المهم قريبي الزمان داك كان خلص الكود الكان شغال فيهو واديتو لي ماجد عشان يبدا في موضوع (الربط) الأنا ما عارفو شنو دا.. وهنا كانت اول صدمة تلاقيني منذ بداية المشوار.. !!!

ماجد بعد عاين للكود قال انه لازم يتمسح ويتكتب كود جديد لأنو جايط شديد وما حيقدر يشتغل عليه وقال دا ح يكلف وقت وقروش وضرّب لينا الحسابات كدا والمبلغ القالو كان صدمة كبيرة !

طبعا دي اول مره تلاقيني مشكلة حقيقة في الشغل.. كل حاجة كانت ماشة معانا بسلاسة و(ملح ساي) .. والصدمة كانت صدمتين لأنو برضو حياخد وقت وما حنقدر نشارك في معرض sitex الموعدو نهاية شهر ١١

المهم أُحبطنا احباط شديد اليوم داك.. رجعت البيت وتكاد عيني تزرف الدموع والاحساس كان سيء سيء لكن قلت ربك كريم بتتسهل..

الصباح صحيت قلت لازم ألقى حل اصلاً كدا كدا كان لازم تلاقيني عقبات..السلاسة الكان ماشي بيها الموضوع دا زي لمن تخش الامتحان ما قاري وتلقى الامتحان ساهل شديد فهنا بتشك وبتعرف انه في حاجة غلط

لأنو ما ينفع اكون ما قاري واحل الامتحان بالسهولة دي .. بس دا بالضبط الحصل معاي.. دي نهاية الملح يا شباب وعرفت انه الحاجة السمحة ما بتجي بالمجان..

فهنا بديت اصعب مرحلة من ما بديت واصعب مرحلة في اي مشروع.. بديت رحلة التفتيش عن مستثمر..الرحلة الما كنت مستعد ليها ابداً ولا خاتيها في الحسبان في الوقت الحالي..

مستثمر شنو يا ايمن هو انت منو عشان يستثمروا فيك.. اغلب الناس العندها قروش دي حيشوفونا شباب سُذّج دايرين يفتحو مشروع بدون خبرة وبدون اي شي واحتمالية الفشل كبيرة !

المهم روح العزيمة والحماس لسة كانت جواي وما كسرت حنك بالذات بعد الدفعة المعنوية الكبيرة الاخدتها من مفروش.. بعد تفتيش ومكابسات وتواصل مع ناس بيعرفو ناس بيعرفو ناس.. لقيت واحد قال لي حاجة ما بقدر انساها ابداً..

انت يا ايمن داير تكون زول showman تعمل حاجة تشتهر بيها.. ولا داير تنجح وتكوّن لي نفسك بزنس"" قلت ليهو طبعا داير ابدا بزنس لي نفسي قال لي خلاص ابدا اقرا عنو اعرف البزنس دا ماشي كيف وانا بستثمر فيك

كلامو دا احبطني شديد في البداية وحسيت اني تعبان ساي الفترة الفاتت دي كلها لكن مشيت منو بي درس كويس شديد وكلامو دا اكّد لي كلامي الفوق برضو.. ما ينفع اخش الامتحان وانا ما قاري..

المهم من هنا يادوب بديت (استثمر في نفسي) بصورة جادة.. خليت مازن يشتغل شغلو وففتي يشتغل شغلو وبقيت انا بي جاي بكابس في الكورسات الاونلاين عن البزنس.. عرفت حاجات كتيرة شديد في رحلة طويلة وعرفت مصطلحات اول مرة تلاقيني وصراحة خلصت مصاريفي كلها في النت..

وما خليت لي فيديو في اليوتيوب واحد بتكلم عن البزنس ما حضرتو.. عرفت انه في حاجات كتيرة فايتة علي وفي حاجات كتيرة مفترض اعمل ليها حساب.. عرفت يعني شنو business model ويعني شنو market research ودراسة الجدوى والامور دي كلها

وعرفت كيف اقدر اجذب المستثمرين وكيف اتكلم بصورة احترافية وكيف وكيف وكيف.. بعد فترة ما بسيطة الحمد لله وصلت لخبرة كويسة نوعاً ما.. اجتمعت مع الزول الزمان داك

قعدنا واتناقشنا ووالله انا شاكر ليهو جداً لأنه بالرغم من انو انا متأكد انه هو حيخت قروشو في المكان الصاح وكنت بحاول اقنعو بالموضوع دا إلا اني ما كنت متوقع منو الاقبال دا.. يعني لو اي زول مكانو كانت احتمالية ضعيفة انه ياخد المخاطرة دي

المهم guess what كدا انا بقي عندي مستثمر.. ايوة انا ايمن بقى عندي مستثمر ومموّل 😂.. وبأمانة هو الموضوع ما كان خطير شديد بالنسبة ليهو ولا حسيت بالانجاز الكبير داك لأنه هو كدا كدا المخاطرة ما كانت كبيرة بالنسبة ليهو وما كنا محتاجين راس مال كبير شديد

المهم اخيراً دفعت لي ماجد وبدا الشغل.. الفترة الجاية دي كانت عبارة عن شغل بس.. اتواصلت مع ناس كتار عندهم خبرة في المجال..

واتواصلت اكيد مع كُتّاب كتار لكن المشكلة هنا انه ما كان عندنا حاجة نقنع بيها الناس ديل وماف زول بقتنع ليك بي كلام خشم ساي إلا يشوف التطبيق قدامو.. الكلام كله عبارة ايوة الفكرة جميلة وان شاء الله لمن التطبيق يخلص حنجربو وكلام بالشكل دا..

المهم قلنا نخلي الموضوع دا بعد التطبيق يجهز.. بقينا نجتمع انا ومازن وفيفتي كل اسبوع نشوف انجزنا شنو وحنعمل شنو في الاسبوع الجاي وهكذا..

الشغل كان ماشي بالطريقة دي زي شهرين وبعديها بحمد الله طلعنا اول نسخة تجريبة.. يلا شُفتو المغترب الفوق الرسلو ليهو صورة ولدو داك؟؟
يلا احساس المرة دي لمن المغترب دا يجي السودان ويشوف لدو قدامو 😂

ياخ اتخيل معاي مشوار شهور اخيراً تشوف نتيجتو قدامك والله الاحساس بالانجاز دا عظيم ياخوانا.. غايتو اليوم داك ما نمت وحرفياً مساهر للصباح بعاين في الكم واجهة الفاضيات ديل بس واتبسّم ساي..

المهم في الفترة ديك بقينا شغالين نطلع نسخ نجربها ونعمل testing ونشوف المشاكل والbugs نعدلها وكدا

بعد ما التطبيق وصل مراحلو الاخيرة وحددنا موعد لل launch حتى يادوب بقى عندنا وش نقابل بيهو الكُتاب ودور النشر عشان نوقع معاهم عقودات يسمحو لينا نستخدم كتبهم في التطبيق

بدينا نفتش في الكُتّاب واتواصلت مع كتاب كتار جداً ابرزهم الاستاذ عبد العزيز بركة ساكن.. اتواصلت معاه وأُعجب جداً بالمشروع وكمان اتبرّع لينا بي كتبو مجاناً في الفترة الأولى دي

اتواصلت كمان مع استاذ نور الهدي سكرتير اتحاد الناشرين السودانين واستاذ نادر السماني سكرتير اتحاد الكتاب السودانيين.. وريتهم فكرة المشروع ودايرين نقدم شنو للكتاب السودانيين..

ف هم عجبتهم الفكرة بشكل عام واتفقنا اني اجتمع معاهم نتكلم في التفاصيل ونوقع فيه عقد مع الناشرين والكتاب في اننا نحول الكتب الموجودة عندهم لمحتوى إلكتروني عندنا بس طبعاً جات الكورونا دي والموضوع بقى صعب.

يوم 24/3/2020 طلّعنا نسخة الbeta (نسخة تجريبية).. رفعنا التطبيق ورسلنا لي اصحابنا يرسلو لي اي واحد بيعرفوه بيكتب قصص وروايات ولا خواطر ساي وأي زول مهتم بالمحتوى الأدبي ينزل التطبيق ويجربو وناخد آراء الناس وال feedback وإذا في اضافات شايفنها ضرورية تتعمل..

الحاجة الكنا عايزنها انه نرسل التطبيق لي 40-50 نفر كدا بس وما دايرين نكتّرها.. لكن في ظرف 3 ساعات التطبيق اتحمّل اكتر من 150 مرة.. ال feedbacks الجاتنا وكمية الناس المبسوطة وفي البمشي يكتب ليهو رواية روايتين والبمشي يرفع المحتوى حقو عندنا غايتو انبسطنا شديد اليوم داك

سجلنا ال feedbacks والانتقادات الجاتنا كلها وبقينا نعدل ونضيف ونحسّن في التطبيق على اساس الانتقادات دي.. حالياً الحمد لله التطبيق على مشارف الإطلاق خلاص..

انا آسف اني طولت عليكم لكن الحاجة العايز اضيفها هي جملة اتقالت لي من اول يوم بديت فيهو المشروع دا لحدي يوم الليلة هي النصيحة الاهم بالنسبة لي: "ما تكسر الحنك"... الفكرة الفي راسك الهسي دي صدقني انت قادر تحققها بس الحاجة الوحيدة الحتخليك تصل ليها انك ما تكسر الحنك

في اوقات كتيرة بتحس انو كل العوارض بتجيك في وقت واحد وانك خلاص وصلت حدك واسهل حاجة ممكن تعملها انك تقيف وتكسر الحنك لكن صدقني بتتجازف بالعزيمة والرغبة الحقيقية في المواصلة وعدم كسر الحنك

حتلاقيك عقبات وحتقع كتير وايوة حتقع عشان ما تكون قايل نفسك حتخش الامتحان وتنجح بي سهولة.. بس الحاجة الوحيدة الحتخليك تقوم بعد الوقعة وتواصل طريقك، انك ما تكسر الحنك.. اللحظة الحتكسر فيها الحنك دي معناها خلاص انت كدا اعلنت فشلك

انا بديت حرفياً من الصفر ما كان عندي خبرة ما كان عندي تمويل ما كان عندي فريق شغل ما كان عندي اي شي غير فكرة بس، لكن وثقت في فكرتي دي وبديت وكل حاجة انا اتعلمتها اتعلمتها في الطريق وانا لسه طريقي طويل ويادوب في البداية..

بالرغم من اني لسة ما حققت ولا 1% من النجاح العايز اصل ليهو.. بالرغم من اني يادوب في بداية الطريق او يمكن ما بديت اصلاً لكن ال state of mind الوصلت ليهو بعد الشهور دي كلها خلاني متأكد اني حقدر اصل للنجاح العايزو بإذن الله تعالى..

التطبيق حالياً يمكن يكون 5% بس من المشروع الكبير العايز ابنيهو.. انا عايز ابني مجتمع بيشمل أي حاجة عندها علاقة بالأدب وعايز العالم برة يعرف قيمة الكاتب السوداني..

حاجة تكون عندها فايدة وكمان مكسب للكاتب قبل م تكون لينا.. وواثق كمال الثقة في الله إني حقدر اصل لي هدفي دا بإذنه تعالى..

كونه انه انتهينا من الشغل بالموارد العندنا دي في اقل من 10 شهور دا انجاز انا فخور بيهو جداً.. وانا واثق تمام الثقة في التيم الشغال المعاي وإن شاء الله نقدر نطلّع حاجة تنال إعجابكم وتكون عند حسن ظنكم..

حالياً التطبيق في آخر مراحل الtesting وفي مستخدمين بجربوه عشان نتأكد من كل حاجة قبل الإطلاق.. موفرين فيهو مجموعة من الكتب ولسة قريب شديد إن شاء الله حيكون مكتبة الكترونية فيها أغلب الكتب الروايات السودانية وغيرها

لو في اي واحد راغب يجرب النسخة التجريبية دي او عندو روايات ولا قصص ولا كتب ولا اي شي حابّي ينزلها عندنا ويزوّدنا بمحتواه الجميل دا ممكن يتواصل معاي في ال DM عشان ارسل ليهو اللينك.. وإن شاء الله قريب جداً حنطلق النسخة النهائية..

ولو عايزين تعرفو المستجدات اول بي اول تابعو @writerscornersd عشان اول ما التطبيق يتوفر في الapp stores تقدرو تنزلوه بإذن الله..

الثريد انتهى خلاص ف لو انت وصلت لحدي هنا هاك الوردة دي يا جميل 🌹
وبس كدا..
شكراً يا أروع تيم في الدنيا ❤:
@fiftypieceofsht
@mvzins
@MajidCJ

❤️.