رتبها

هذه الصورة ذكرتني بقصة #البدون

امي و ابوي قرروا انهم يسافرون امريكا علشان اخوي ينولد هناك، المهم انه قرروا انهم ياخذوني معاهم، و انا كنت وايد متعلقه بخواتي الي اكبر مني و الي اصغر من بـ ١١ شهر

طولنا مناك يمكن ٣ اشهر؟ او ٤؟ و انا فعلا كنت مستمرضه لانه كنت مشتاقه حق خواتي و كل اليهال الي كانوا بامريكا كانوا يتحجون انجليزي و انا اسلك معاهم ما كنت عارفه شي

ف شعور اني مشتاقه حق خواتي كان وايد كبير.. يوم من الايام كان قاعد ينزل ثلج و و اتذكر الدريشة كبيييييييييرة كانت مادري اهو لانه انا كنت ياهل و شفته كبير ولا اهي فعليا كانت كبير

المهم انها كانت دريشة كبيرة و بليل و ثلج قاعد ينزل و كنت قاعده العب على دفاية نفس الي بالصورة بس كانت اعرض
على عرض الدريشة تقريبا
اطالع الثلج و هديت الباربي الي كنت قاعده العب فيها التفت على امي اتذكر بطنها و ويها اصفر من التعب

سألتها: "يما متى منور و فطوم يجون؟"
طالعتني و اذكر نبرة صوتها
نبرة تعبت و اهي تشرح لي انه احنا مسافرين و صعب فطوم و منور يجون...
تعال فهم ياهل فكرة انهم اييون صعبه و اهي حامل و مالها خلق نفسها

ابتسمت بويهي وضحكت:
"بتوله غني هذا منو دق الباب و راح يجون" و لحنتها لي.... لو في فويس نوت اسمعكم اللحن.. لي الحين بمخي اسمعها بصوت امي ..

و انا مصدقه ترا! قمت من الدفاية و هديت لعبتي و قطيت نفسي على السرير يمها
و انا عيني على باب الشقة الفندقية الي مأجرينها غنيت "هذا منو دق الباب"
غنيتها هالمقطع يمكن ٦ مرات.. و بكل مره احسب اذا زدت غنيت راح يجون

جان اطالع امي و اقولها "يمااا ما جو"
طالعتني بضحكة قالتلي "غني غني اهما راح يسمعونج و اييون الطريج طويل"
كملت غنيت مرتين او ثلاث بعدها مليت... رحت مره ثانيه عند الدريشة يمكن اقدر اشوفهم اذا قربوا

صار روتيني اليومي اذا اشتقت اغني هذا منو دق الباب.. هذا منو دق الباب.. هذا منو دق الباب.. ولدت امي و مادقوا الباب .. جهزنا جناطنا و ما دقوا الباب... ركبنا الطيارة و هم ما دقوا الباب... حتى و احنا بالطيارة كنت احاتي اذا اهما راح يوصلون امريكا و انا اكون واصله الكويت

و لي يومكم هذا.. انا ما سمعت هذا منو يدق الباب.. يمكن انتوا سمعتوها بصوت فؤاد سالم بس انا لي يومكم هذا اسمعها بصوت امي..

youtu.be

😂 اوكي خل اوضح ليش ما شفت خواتي ما جو امريكا،، فطوم الكبيرة عندها مدرسة، و انا و منور نفس العمر و ما كان راح يسمح الوضع انه امي و ابوي يدبرون نفسهم مع كل هاليهال خصوصا انه امي راح تكون توها والده

ليش اختاروا امريكا؟
لانه امي كويتية.. و ما يصير تجنس احد فينا..
فـ مجرد ما انك تنولد بأمريكا تكون امريكي

ليش الصورة ذكرتني ب هالموقف؟
لانه تذكرت الوحده الي كنت فيها و محاولتي لخلق اصدقاء مع يهال مع اعرف لغتهم... كنت اتعب و انا ائشر لهم و اضحك يعني اضيع الصقلة... لدرجة لمن كنت استانس على شغله بالالعاب و السوق

امي و ابوي يحاولون كثر ما يقدرون انهم يشترون لي اياها علشان تعويض يعني 🏃🏻‍♀️💔😂 ذكرياتي في هالعمر جدا واضحه و كأنه كان امس... اتذكر وناستي كانت لمن اروح مع ابوي مكان الي فيه مكاين غسيل الملابس و احاول اساعده نغسل ملابس

بس للامانه كنت مقزرتها على مكاين الحلويات والبطاط الي تحطون فيها فلوس
و اول ما اخذ الاكل اوازن نفسي على الغسالات الي تشتغل و اخذ وضعية اني في سباق سيارات..
ف هالصورة مع بالونه كبيرة (في وقتها) امي و ابوي اشتروا لي اياها يمكن مواساة؟ 😂❤️

بس كنت وايد حابه البالونة.. لانه عطت فرصة حق اليهال الثانيين انهم يتواصلون معاي.. حتى لو لم امتلك اللغة... شي غريب مو؟ صورة بالونة تبطل صنبور ذكريات

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد