رتبها

⭕⭕⭕ثريد عن صفوف البنزين⭕⭕⭕
السلام عليكم ورحمة الله وبركاته
⭕❌ مهم جدا سبب صفوف البنزين❌⭕
انا ما بحب المقدمات لكن حابي اتكلم عن صفوف البنزين
امبارح وانا بحضر في مؤتمر ازالة التمكين لما قال عملنا زيارة لمصفى الجيلي وعملنا وعملنا وده ادى لتخففيف الضغط على الطرمبات ماصدقتو

..
الليله وقفت في طرمبة في امدرمان كنت تقريبا رقم 10او 12في الصف خليت العربية بالليل وجيت بالصباح لقيت وراي ما لا يقل عن 70الى 100عربية
.
المهم انا عشان اصل للمسدس استغرق الموضوع معاي ساعة كاملة ده وانا قريب مابعيد من المسدس ..
⭕طيب السبب شنو في التاخير ده كلو⭕
هنا السؤال ❓

وعشان اجاوب على السؤال ده كان لازم امشي اقيف جمب المسدس.
.
ولقيت الحاصل بإختصار انو
1- الناس بتجي بباغات وكلنا عارفين انو الباغات ممنوعة في الطرمبات الا بتصريح معين جلنيتر او صاحب مزرعة او تصاريح معينة

صاحب الباغة بيجي لعامل الطرمبة بيقول ليهو داير املى بيقول ليهو ختها في اي عربية او ركشة [وحارفق ليكم صورة صورتها قبل شوية لركشة مليانه باغات ورا غير الباغات الجواها ].
وفعلا ده اللي بيحصل العامل بيملى الباغة وبياخذ {حساب الباغة+شراب الشاي} =(رشوة)

2-للاسف عساكر جيش بيخشو قدام الناس لما قلت لواحد منهم يا سعادتك انت مفروض تحفظ لينا النظام قعد يتعذر بأعذار واهية وفتح ملف فيهو اوراقو عشان يثبت 💔

3- وده معروف الناس اللي بيجوك بأعذار 'مرتي عيانه،مرتي داير تلدي،ماشي المستشفى،معاي نسوان،عندنا عزاء مسافر هسي +باغة لزوم السفر وكدةو،و،و،و…اورررررر← اطناشر ..😒
{كسرة}.مرتو بلتدي كل يوم مع زمن الطرمبة🤦‍♂️
4-الفطور وده كل الناس عارفاهو ثابت في الموظفين كلهم .

5-المشاكل حقت وقفت قدامي وما بتخش وعلى بالطلاق خاشي وانا بايت هنا وقاعد من امبارح وعربيتي قطعت… يلا دي ناس الطرمبة بيوقفو ليها الطرمبة ساعة على الاقل ..عشان يشتغلو بعد الزمن الرسمي وياخذو (اوفر تايم) من اصحاب المركبات(رشوة)
ده اللي عرفتو انا .. وما خفي كان اعظم
..

وقفت سألت واحد من العمال قلت ليهو هل في مشكلة في البنزين مامتوفر ولا حاجة قال لي امبارح التنكر جا يفضي لقى الخزانات الاتنين تحت الارض مليانه مشى وقف انتظر لحدي ما خلص واحد من الخزانات حتى فضى فيهو.

وده رجعني لكلام عضو لجنة ازالة التمكين انو مافي مشكلة في البنزين
يلا المشكلة وين ؟! في الطرمبات .
.
لو قلنا ننتظر الناس تنظم نفسها براها وتوعى نكون بنحلم ساي .
لازم يكون في حزم في الموضوع ده من جهة الحكومة عشان تنتهي ظاهرة الصفوف ومايكون في لوم على الحكومة من جهة المواطنين

وهنا يكون دور لجان المقاومة بالتعاون مع الجهات الامنية للتعامل بحزم مع الموضوع ده عشان راحة الناس وعشان ماتكون ثغرة يدخلو بيها اعداء الحكومة ويقنعو ضعاف النفوس انو الحكومة فاشلة ويجونا زاحفين في مليونية(200نفر😂😂)

ياليت كلامي ده يصل لوزارة الطاقة او الجهات الامنية او الجهة المعنية بكلامي ده أياً كانت
شكرا
والسلام عليكم ورحمة الله وبركاته