ثريد: البيت ١٢ في الخريطة التوافقية … #أبراج #خرائط_فلكية
من فترة طويلة وانا بقول هكتب ثريد عن البيت ١٢ في الخريطة التوافقية نظراً لأهمية الموضوع ولكن زي ما اغلبكم عارف اني طبعاً مش نافعة ومواعيدي دايماً مضروبة 💃 بس بحبكم وبتحبوني وهنعدي لبعض لأننا عشرة عمر. الثريد دي طويلة الي حد ما فيفضل انك تبدأ فيها عزيزي القارئ وانت رايق..!
١. شوف عزيزي القارئ انا عايزاك تتعامل مع الخريطة كمنزل كبير و كل بيت فيها بيمثل غرفة ليه خصائص معينة. تخيل معايا "البيت ١٢" كغرفة في بيتك ولكن غرفة بترمي فيها الكراكيب، بتخزن فيها امور مش بتستخدمها بشكل يومي، غرفة كده شبه سرية عارف ان محدش بيدخلها او يعرف اللي فيها غيرك.
٢. عشان تبقي الامور واضحة من البداية احنا هنتعامل مع صاحب البيت ١٢ علي اساس انه "صاحب الغرفة" المليئة بالكراكيب و هنتعامل مع الشخص صاحب الكواكب او الكوكب اللي بيقع في بيتك ال ١٢ علي اساس انه "ضيف" بيزورك في بيتك. وقبل ما نبدأ كلامنا عايزة اوضح كذا نقطة هتفرق معاك في فهم الامور،.
٣. خلينا نركز شوية مع الشخص صاحب البيت ١٢ لأنك لازم تشوف كذا حاجة اولهم علاقة الشخص ببيته ال ١٢، هل مثلاً الشخص عنده كواكب و بالتالي البيت ده نشط في خريطته وهو معتاد علي طاقته ولا لأ؟ ولو عنده كوكب ولا عدة كواكب هل وضعهم ايجابي، قوي ولا وضعهم سلبي؟
٤. البيت ١٢ من اصعب واقوي البيوت فلو الشخص صاحب البيت بطبعه سلبي، بيخاف يواجه او عنده حساسية عالية هيتعب لأن تخيل معايا كده لو انت شخص مهمل وكسول وبتحب تعمل كل حاجة في اخر دقيقة وعندك غرفة بتخفي فيها كل الفوضي اللي في بيتك وفجأة زارك شخص وصمم يقعد في الغرفة دي تحديداً هتعمل ايه؟
٥. نفس الفكرة الشخص صاحب الكوكب اللي بيقع في بيتك ١٢ بيختار اصعب غرفة يقعد فيها لأنها مليانة عقد و كلاكيع و اسرار و مخاوف و احلام وكل شئ فيها عشوائي فأنت مش عارف حرفياً ده ممكن يشوف او يكتشف ايه وهو قاعد، ومن هنا بنعرف ليه صاحب البيت اغلب الوقت سهل يبقي عنده شكوك تجاه صاحب الكوكب
٦. ومن هنا بتبدأ اللعبة بين الطرفين لأن صاحب البيت بنسبة كبيرة مش عارف الموجود في بيته ١٢ وامور هو لسه بيحاول يكتشفها خاصةً لو هو مش متصل بطاقة بيته ال ١٢ بس في نفس الوقت مفيش شئ يخليه يشك كلياً او يقاوم صاحب الكوكب لأن الشخص حرفياً ماعملش حاجة بس الوضع الي حد ما محرج او مخيف.
٧. وده يخلينا نركز علي صاحب الكوكب لأن لو صاحب الكوكب "مرن" ومش دقيق مش هيفرق معاه وهياخد قعدته ويمشي لكن لو صاحب الكوكب اللي مشرف في بيتك ١٢ "وغد" وشرير ساعتها بقي القصة هتختلف كلياً عزيزي القارئ وهنبدأ نشوف اكشن بحق وحقيقي.
٨. نفس الكلام ينطبق علي صاحب البيت ١٢ بمعني ان لو الشخص مدرك لمخاوفه، عارف عيوبه ومشاكله كويس و عنده نسبة وعي موقفه هيكون افضل بكتير من شخص شكاك بطبعه و موهوم او بيخاف ومن النوع اللي بيكبت وبس لأن ساعتها اي شخص هيفعل بيته ال ١٢ هيتعبه حتي لو الدوافع بالفعل ايجابية وكويسة.
٩. اللي بيحصل عادةً ان صاحب الكوكب اللي بيقع في بيتك ١٢ بيبدأ يشوف حاجات في حياتك وفي شخصيتك انت بالفعل مش قادر تشوفها سواء ايجابية او سلبية خاصةً لو بنتكلم عن كوكب حامي زي الشمس او المريخ او كوكب ذكي زي عطارد وده بيأثر علي صاحب البيت وبيحسسه ان علاقته بصاحب الكوكب غير وده صح.
١٠. التحدي في علاقات مماثلة ان صاحب البيت ال١٢ مش بيعرف يهرب من صاحب الكوكب حتي لو صاحب الكوكب مش بيحاول يلاحقه وحتي لو مفيش بينهم تواصل مادي او علي ارض الواقع، صاحب البيت بيفضل متصل بطاقة صاحب الكوكب لوقت طويل ومن هنا بنعرف ليه بيحلموا ببعض وليه في تخاطر قوي بينهم.
١١. في نفس الوقت صاحب الكوكب بيبقي عنده اصرار كبير انه يعرف كل حاجة عن صاحب البيت وممكن يدفعه لتذكر بعض الامور او التجارب القديمة. وفي اسوأ الظروف لو صاحب البيت ١٢ قاوم او رفض بيبدأ صاحب الكوكب يشكك فيه او يتهمه بإنه مش بيحبه او يراوغه بأسم الحب والاهتمام وده بيحصل بدون وعي بينهم
١٢. لو بنتكلم عن طرفين عندهم ادراك وخريطتهم بتدعمهم الوضع هيختلف لأن ساعتها صاحب البيت لأول مرة هيلاقي حد يعرف يفتح له قلبه بدون اي خوف او خجل وبالعكس صاحب الكوكب هيساعده بطرق غير مباشرة لتخطي تحدياته وهيدفعه للنمو لأن في نسبة تسامح وقبول مش ممكن تلاقيهم في علاقة تانية.
١٣. في نفس الوقت صاحب الكوكب هيكتشف مع صاحب البيت رغبات واحلام مختلفة وجديدة عليه وسهل يحس انه مش مرتاح لوهلة حتي لو مفيش شئ يدعو لذلك، فلو صاحب الكوكب شخص جاف او غير مرن وتقليدي مع صاحب البيت الوضع هيختلف تماماً وهيتعلم يعني ايه حب، يعني ايه تضحية وعطاء ومرونة، هيتعلم يحلم.
١٤. بطبعي لا اميل للمبالغة فمسألة ان ممكن تكون عارف الشخص من حياة سابقة او يكون ظهر في حياتك مرة اخري لا تثيرني ومش رومانسية من وجهة نظري لأن الماضي الله يرحمه احنا في الحاضر 😅 ولكن خليك عارف ان الشخص ممكن يكون ظهر عشان يلهمك لطريق جديد، يلفت انتباهك لأمور غير واضحة وده المهم.
١٥. سوء الفهم: سهل علاقة مماثلة تكون عشوائية او نوايا اطرافها تتفهم غلط لأن اوقات كتير التواصل بينهم بيكون قائم علي التلميح والتخمين وعلي فكرة احياناً الطرفين بيحبوا تكون العلاقة مفتوحة ومش في اطار محدد والمثير هنا ان كل ما يبعدوا عن بعض كل ما تواصلهم ببعض يقوي وانتمائهم كمان.
١٦. مش حابة اطول في الثريد عن كده لأننا لسه لم نتعمق في اثر الكواكب المختلفة، كل ده بنشرح الطاقة العامة للعلاقة لأن لما نتكلم عن الشمس غير لما نتكلم عن عطارد او الزهرة وغيرهم، فالمسألة محتاحة تدقيق بالتأكيد خاصةً لو عايز تعرف العلاقة دي هتكون سرية ولا لأ، الشخص عدو ولا لأ وهكذا..
دايماً بقول ان العلاقات معقدة فامكانية نجاحها او فشلها معتمد علي الاشخاص ومش الخريطة التوافقية مع العلم ان الخريطة التوافقية هتفتح عيونك علي امور كتير فيها تخليك تتعامل بشكل مختلف تماماً ولذلك هي خريطة في غاية الأهمية ولكن دايماً شوف خريطة كل طرف وافهم طاقته كويس قبل ما تحكم.
اتمني الثريد تعجبكم و مهتمة اسمع تجاربكم، تعليقاتكم وقصصكم تحديداً مع البيت ١٢ وعايزة اشوف تفاعل وحركة ونشاط يعني نحب بعض شوية يا شباب 💃
وكالعادة الكلام هنا مش هينطبق علي قصص وتجارب الجميع لأن كل علاقة ليها ابطال مختلفين.
واتمني للجميع يوم مبهج، مشرق وجميل ☀
بحبكم أبطالي 🦄💜
وكالعادة الكلام هنا مش هينطبق علي قصص وتجارب الجميع لأن كل علاقة ليها ابطال مختلفين.
واتمني للجميع يوم مبهج، مشرق وجميل ☀
بحبكم أبطالي 🦄💜
جاري تحميل الاقتراحات...