الإنسان يكون في أسعد حالاته إذا عاش حياته بناء على القيم اللي يؤمن بصدق فيها، ويصبح تعيس إذا صارت أفعاله غير منسجمه مع إيمانياته، لذلك مهم جداً إنك تلتزم بقيمك ولو كان السبب أناني بحت، عشان ضميرك يرتاح وتقدر تنام في الليل.
قبل سنوات أثناء علاجي من الإكتئاب قابلت رجل يستخدم أسلوب علاجي يسميه Acceptance and commitment therapy "العلاج بالتسليم والإلتزام" شرح لي مفهوم بسيط جداً ومنتشر في كل الأديان، التسليم بالقضاء والقدر والإلتزام بالقيم اللي أنفسنا تحب تتمسك فيها.
التسليم كان يقصد به إن جزء كبير من المعاناة اللي نمر فيها يكون سببه ممانعة المشاعر والظروف السلبية، وإنه إذا سلمنا لهذي الظروف والمشاعر بدون مانقاومها بتمر بشكل أسرع، وشبهها بالموجة الكبيرة إذا أقبلت على السباح، المفترض مايقاومها وإنما يسلم لها عشان يصعدها وتمر بدون ماتتغشاه
أما الإلتزام بالقيم فيقصد به الكلام اللي قلته فوق، إذا التزمنا بقيمنا حتى لو البسيطة بنشعر برضا عن أنفسنا، الإلتزام بقيمة الإعتناء بنفسك،الإلتزام بقيمة الصلاة، الإلتزام بقيمة عدم الكذب، إذا التزمت بقيمك شعورك بالقوامة على نفسك يزيد وشعورك بالعجز ينخفض، والعجز هو عصب الإكتئاب.
سألني شخص ليش تكتب كثير عن الصحة النفسية والإكتئاب؟ والسبب إن فيه ناس كثير ينظرون لي بتقدير واحترام، وأبيهم يدرون إن حتى شخص يحترمونه مثلي جاه إكتئاب، فبالتالي مايقسون على أنفسهم إذا هم مرو بنفس المشاكل، الحياة تسبب اكتئاب، اللي مايكتئب لو مره بحياته ماعنده مخ، ارفقو على أنفسكم.
جاري تحميل الاقتراحات...