ثريد اغبى هروب (الهروب للبقالة)
طبعا بداية الموضوع راح اقولكم عن شخصيتي ك طالبة كنت مؤدبه مره ومو جوي المغامرات ولا الهروب وحتى الحصص ما اهرب منها لين جاء ذاك اليوم اللي قلت فيه يارغد اكسري الروتين الحياة مره وحده وياليتني ماكسرته
كنت اشوف بنات فصلي يوميًا يروحون البقاله اللي قريبه من المدرسه ودايم ينقفطون من المديره ويرجعون يهربون قلت اكيد الموضوع فيه متعه ومغامره وقررت اني اجرب...
وجيت اتفقت مع خويتي ووافقت على طول وقمنا نجمع الريالات والخمسات واتجهنا للشله اللي دايم يهربون وقلنا نبي نجرب ونهرب معكم استغربوا واستانسوا بنفس الوقت لانهم يشوفوني الكاش ودايم يبون اعطيهم فلوس عشان يهربون وهالمره الصرافة جات معهم!!
طبعا من خبرتي في الاستماع عرفت كيف التخطيط والتخفي عن السواق اذا جاء والسرعة في الرجوع للمدرسة في حال انه باقي ما جاء وخلاص صار وقت التنفيذ
لبسنا عباياتنا وشنطنا وجهزت سحاب الشنطه نص مفتوح عشان السرعه في وضع الاغراض داخل الشنطه وتوكلت على الله وكان ذاك اليوم احر يوم مر علي في حياتي بس قلت بنفسي البقاله عند اللفه بنروح ونرجع سريع
المهم مشينا ولاحظت ان الطريق طول وانا خوافه قعدت اسألهم متأكدين رايحين البقاله والا مكان ثاني (شكلي كنت احسبهم بيخطفوني) ومامداني اكمل الجمله الا وحده منهم اللي تراقب الطريق قالت الحارس جاء!ولفيت اتأكد وطلع صدق جاي يلحقنا!!!
وكان ذاك اليوم اكثر يوم ركضت فيه بحياتي لدرجه اني ما صرت احس برجولي خوفًا من القفطه بحكم اني اخر وحده فيهم واقرب وحده للحارس يمديه يمسكني وهم يغدرون ويكملون هرب
واخيرًا لما حسينا الوضع امان وضيعناه رحنا للبقاله اللي حتى مويه مافيها بس اهم شي المغامره وتجمعوا علي وجيه الفقر كل وحده تبي فلوس💔
صرفتهم بكم ريال وشريت بطاطس صغير وحطيته بالشنطه (كل هالعناء والركض عشان بطاطس صغير) وانطلقنا للعودة وانا على بالي بنرجع نفس الطريق لين قالت القائده المتمرسه "لا خلونا ناخذ لفه بالحي كامل عشان محد يشك" وهنا جات الصدمه
وما مداني اقول رأيي الا سحبوني معهم وكملت ركض بدون كلام وما ادري ليه كنا نركض اصلا... المهم في نص الركض لاحظت انهم يبتعدون عني كل شوي قلت وش السالفه هم سريعين والا انا البطيئه؟!
قعد هالسؤال ببالي لين حسيت بكتمه واني بموت ما اقدر اكمل وما اقدر اتنفس واطالع شايب قاعد عند باب بيته مستغرب من هالمجانين اللي يركضون كنهم شغالات هاربات وحاولت اكمل ركض لين استسلمت واحتزمت بخويتي المحزم العريان اللي سحبت علي عشان ما تنقفط
واخيرا وقفت واخذت نفس وخليتهم يسحبون علي وكملت مشي بشويش لين رجعت المدرسه وتأكدت 10 مرات ان السواق ما قد جاء ودخلت وفضحت نفسي قدام المناوبه ولقيت حمير القايله اللي سحبوا علي وتلاعننا وحلفت يرجعون لي ريالاتي واكلت بطاطسي الصغير اللي مافيه الا خمس حبات واستمتعت بكل لقمه
وشاركتني خويتي المحزم العريان ايسكريمها واكلت منه وانا معصبه بس كان حر موت ماعندي الا هالخيار وليومكم هذا وهي تضحك علي
وبس هذي كانت سالفه الهروب الغبي اتمنى نالت اعجابكم وانتظروا جديدي
جاري تحميل الاقتراحات...