الكاتب الايطالي دينو بوتزاتي صاحب رواية صحراء التتار اللي كلتمتكم عليها صدرت له مجموعة قصصص سنة ٩٨ تقريبا في هيئة الكتاب . نسيت عنوانها واسم مترجمها للاسف بس اللي فاكره ان الازهر اعترض عليها علشان فيها قصة فيها تجديف والحاد
القصة دي كمان نسيتها لكن المهم ان سمير سرحان رئيس الهيئة الله يرحمه في الحالات دي ما بيوجعش دماغه بيصادر الكتاب ومعني المصادرة ان الكتاب لن يدخل في حسابات الهيئة فكان بيتركه لعمال المخازن يتصرفوا وكانوا بيبيعوه في الازبكية بملاليم ويشتريه الجمهور اسرع من اي كتاب
لكن المهم ان في قصص بوتزاتي كانت قصة مذهلة لايمكن انساها لعظمتها وكان اسمها الطابق السابع . ايه حكايتها؟ مريض عنده حمي دخل مستشفي قالوا له حالتك بسيطة حتقعد في الطابق السابع كام يوم وتخف بالعلاج .سأل اشمعني الطابق السابع عرف ان الطوابق حسب الحالات وكل ماتنزل تلاقي الحالات الاصعب
بعد يومين استاذنوه ينزل الطابق السادس علشانةفيه ست مريضه ومعاها طفلين عيانين ومافيش مكان وطمنوه خلاص قربت تخف . نزل الطابق السادس لقي ناس عندها حمي اقوي استحمل وبعد يومين معلش حتنزل الطابق الخامس علشان المرضي كتير وهانت .
هوب بعد يومين طلبوا منه ينزل الطابق الرابع وهو يثور عليهم علشان بتظهر عليه اعراض مرضي كل طابق يطمنوه وينزلوه طابق الي ان نزل الطابق الاول وفيه المنتظرين للموت ومات . طبعا قصة مافيهاش كلمة فلسفية مباشرة
ومنها تعرف ان الحياة خدعة والنتيجة مقررة سلفا مهما قاومت فالخدعة اقوي من الارادة للاسف
جاري تحميل الاقتراحات...