قابلاتك الصورة هذي او صور زيها يكون فيها الكلام ملخبط او ناقص حروف ومع ذلك قدرت تقراها؟ وفرحت عشان اللي حاط الكلام كاتب لو قدرت تقراه فعندك قدرة خارقة؟ يؤسفني اني نخربلك فرحتك هذي....
وحدة من المحاولات لتفسير كيف الانسان يتعامل مع المعلومات اللي قدامه اسمها ال top-down bottom-up approach، هذي تقول ببساطة انه فيه طريقتين للتعامل او معالجة المعطيات اللي قدامك واللي هنا top-down او bottom-up، مش فاهم؟ ابسطهالك
نبدو بالbottom-up، في العملية هذي انت زي مالاسم يقول تبدا من تحت وتطلع فوق، في العملية هذي انت تركز على التفاصيل متاع الحاجة اللي قدامك، تركب التفاصيل هذي على بعضها، وبعدها تطلع بالمنتج، فاطن ايام ما كنت تتعلم في الحروف والقراءة؟
زمان كنت لما تشوف كلمة قدامك، تبحت في شكل كل حرف قدامك عشان تعرف الحرف هذا شنو، تركب الحروف هذينا على بعضهن (تتهجاهن)، عشان تعرف الكلمة في النهاية هي هذي بالضبط الbottom-down..
بالنسبة لل top-down فهي عملية معقدة اكثر، ليش؟ لأنها ببساطة تبدا من فوق وتنهي لتحت، تبدا من الموقف، من السياق وتستخدم معاهن في ذاكرتك انت عشان توصل لتفاصيل الحاجة اللي قدامك، كيف؟ زي الصورة اللي فوق مثلا...
انت كشخص تتحدث وتكتب بلغة ما، مش محتاج انك تركز في تفاصيل الكلمة عشان تقراها، يكفيك مثلا انك تقرا اول حرف و اخر حرف عشان تعرفها، زي كلمة تفاح، احتمال كبير حتقراها صح حتى لو كانت مكتوبة تافح، لأن ذاكرتك مخزنه ان مدام بدايتها تاء ونهايتها حاء يبقى تفاح
اما لو كان فيه تلميحات اكثر او الكلمة جت في سياق معين فالاحتمال هذا يزيد، عشان نقارنلك بين الاثنين مرة اخيرة، هلك دزوك تجيب عصير معين انت ما تعرفش ونقوله ان اسمه عنبر ج، لما تفتح ثلاجة الدكان حتقرا الاسماء بالاسم عشان تعرف العصير وهذي bottom-up،
اما لو مشيت مرة اخرى تشري في العصير هذا فبدون ما تقرا شن مكتوب انت عارف ان الباكو البرتقالي اللي مغطاه صفراء هو عصير عنبرج ومرات مش حتفطن انه منتج مقلد اسمه عبنرج زي ما تدير شركات واجد وهذي هي الtop-down
ختاما هذي صورة بسيطة لتوضيح تأثير السياق والtop-down وكيف ان نفس الشكل مرة قريته 13 ومرة قريتهB
#عنبرج
#عنبرج
جاري تحميل الاقتراحات...