لمن كنت خلاص خاشه الجامعة أبوي قعدني و بدا يتكلم معاي عن مجتمع الأولاد قال لي انتي بتي الكبيرة ولازم اوعيك من هسه عشان لمن تحصل ليك حاجه انا الحكون السبب لانو ما فهمتك وما وعيتك ولازم أكون أنا صاحبك قبلهم كلهم ف زي اي مجتمع فيهو الكويس والكعب وفيهو البقيف معاك العمر كلو والبخذلك
قال لي طبعا ماف مشكلة تصاحبي أولاد بس الخطوط الحمرا واضحه والفيها شك من البدايه ما تهبشيها انتي البتلزمي الولد حدودو ممكن يكون واحد يكون ظاهر عليهو كويس مع الناس كلها بس معاك قليل أدب دا بسببك انتي خطوطك الحمرا المفترض ما يتعداها انتي ما وضحتيها ودا غلط كبير منك انتي ما هو
أو واحد يكون كويس معاك شديد ومحترم و هو في سكة شمال لكن بسببك انتي و وضوحك ما بقدر يتعدا الخط وثقتك و وضوحك وصراحتك دي اهم نقاط عشان تواجهي ايي مجتمع ومكان عشان ما تندمي لمن ما اشتغلي بالنقاط دي
وممكن اقول ليك انو خوة الاولاد أقوى من البنات ولو وصلتي مرحلة إنو يكونو أصحابك بالجد م كلام ساكت ف اضمني إنو م حيحصل ليك شي من الاولاد الدايرين ليك الشينة لانو الأولاد في بعضهم بيناتهم حاجات كتيرة م حتفهميها ف لو واحد صحبك شديد وقال ليك ابعدي من الولد د وجادي أحسن ليك ابعدي
أهم شي قال لي عرفيهم بينا عادي وخليهم يجو البيت عادي وقعدات و ونسة ونتعرف بيهم ممكن لي قدام عادي يجونا في البيت تكونو مارقين انتي وصحباتك واصحابك يجو يسوقوك من البيت ويكلمونا ونقول ليهم بتنا دي امانتكم إحنا زمان كنا بنسوي مع صحباتنا الاهلهم ما عندهم مشكلة مع صحوبية الأولاد كدا
وبنرجع صحبتنا البيت لكن لمن وحده يكونو اهلها صعبين إحنا زاتنا بنكون ما دايرين نجيب ليها مشاكل ولو حصل اي شي الأولاد أصحابك عادي ممكن تلقيهم قبل البنات اذا ضمنتي خوتهم وبرضو في بنات كويسات لكن مجتمع البنات اكعب وما مضمون وبكونو بصطنعو الولد بكون واضح ما بلف وبدور
وجزو كبير من الابهات البكونو حابسين بناتهم ومادايرنهم يصاحبو أولاد بكونو وهم شباب من النوع الطايش العمل حاجات كعبة وحركات مع البنات وما ادراك خايف من "كما تدين تدان"الجزو الكعب مسيطر عليهو قايل دا البحصل في اي مكان مع أيي واحد لي اي بت وما داير بناتو يحصل ليهم الكان بشوفو زمان
في النهاية قال لي دا جزو بسيط وريتو ليك واديتك المفتاح انتي بعداك بتفتحي الباب الصح وتقفلي الغلط وخليك قوية و واثقة من نفسك انتي وم يكسرك ولد أو حتى وحده كنتي قايلاها صحبتك شديد وطلعت لا واستودعتك الله الذي لا تضيع ودائعه♥️
جاري تحميل الاقتراحات...