يقولون كثر الدق يفك اللحام ، هذا امر صحيح وينطبق على الانسان في كثير من الأمور لكن الأمر المهم اللي ودي اتكلم عنه " التأثير في الأفكار " ، الحين اذا انت انسان ملتزم محافظ وعندك مبادئ وقيم واخلاق تربيت ونشأت عليها والبيئة اللي تعيش فيها تساعدك على التمسك بهالقيم .. يتبع

ما عليك ان شاء الله خوف من الانحراف والتخلي عن مبادئك ، لكن لو عشت في بيئة أخرى مختلفة تمامًا فـ شيء طبيعي تتغير فيك أشياء ومع الوقت ممكن تتغير كليًا ، الأمر يحتاج وقفة مع نفسك ، الحين في هالزمن اغلب الناس يقضون ما بين 6 الى 10 ساعات او اكثر يوميًا على منصات التواصل .. يتبع

الاجتماعي ، وهذي بيئة أخرى ! واذا الواحد يتابع حسابات اشخاص يختلف معهم في اشياء كثيرة ولكنه مستمر في متابعتهم وقراءة ما يكتبون او سماع ما يقولون ويتكرر هالامر يوميًا على مدى شهور وسنوات تتوقع انه ما راح تتأثر أفكاره ؟ وبالذات الاشخاص اللي جعلوا من الدين عدو لهم ويحاولون بكل طريقة

ووسيلة هدم اخلاق المجتمع والقيم والمبادئ ، " بمتابعتهم كأنك تعيش في بيئة فاسدة " في رأيي ان الاستمرار بمتابعتهم خطير حتى لو كان الهدف الرد عليهم لأن مع الوقت بما ان اغلب متابعينهم يحملون نفس افكارهم بتشوف كثيرين يأيدونهم وممكن يأثرون في أفكارك بأساليبهم وخبثهم ..

عن نفسي مع اني الحمدلله واثق من التمسك بمبادئي بفضل الله لكن لا يمكن اتابع حد من هالنوعية ..
مدري اذا قدرت اوضح الفكرة اللي براسي او لا ، لكن هذا اللي قدرت اقوله والله يثبتنا واياكم ولا يفتنا ويجعلنا مفاتيح للخير مغاليق للشر ويسخرنا للدفاع عن الدين والوطن