إذا كنت تعاني من مشاكل #القولون سواء الهضمي أو العصبي، فأنت زميل في الألم والوجع، وراح أشرح لك طرق تخفف من الآم القولون قدر المستطاع، لكن قبل كذا نبي نذكر بعض الحقائق.. تابع التغريدات التالية..
أول شيء، تهيج القولون يعتبر من اكثر الامراض شيوعا، يعني لست وحدك من تعاني، يعاني معك مئات الملايين من الناس، وهالشيء يفترض انه يخفف عنك من الألم النفسي لعلمك انك لست وحدك..
الألم الناتج عن القولون هو ألم مزعج، غير متطور في الغالب. يعني ما راح يتحول -ان شاءالله- لمرض خطير، او يزيد ألمه عن الألم المعتاد.. راح يستمر على نفس المستوى في الغالب..
ألحين نجي للمهم، كيف نتعامل مع القولون وآلامه.. خلوني أبسط لكم المسألة لأن كثير من الاطباء ما يبسطونها.. تشتكي دايم من قولونك وتروح تفحص ويقولك الدكتور سليم وانت في داخلك تقول تخسى مانيب سليم لو اني سليم وش أتألم له 😡 ولست تلام على ذلك، خصوصا لما تكون دافع مبالغ للفحوصات..
تخيل ان قولونك مكيّف شباك، معليش آسف على التشبيه، لكن اسمع للنهاية، والمكيف ذا ما عاد يبرّد، او براده صار خفيف، وتوديه للباكساني وبعد الفحص يقولك الكمبرسر كويس والمروحة كويسة..يبيله تنظيف بس.. وبالفعل ينظفه بمويه بس وتنحل المشكلة اللي كانت مأرقتك.. 😏
المكيف هو قولونك، والغبار والوصاخة هو بقايا الأكل اللي ما انهضم زين في قولونك واللي يسبب لك آلام وما تكشفه الفحوصات..
يبقى اخيرا،طيب كيف نحل المشكلة او كيف نخفف من تبعاتها؟ تابع التغريدات القادمة
يبقى اخيرا،طيب كيف نحل المشكلة او كيف نخفف من تبعاتها؟ تابع التغريدات القادمة
أولا، تحتاج انك تتوقف تماما عن بعض الاكل المثير للقولون وراح تتوقف مؤقتا لين ينظف قولونك وبعدها بكيفك تاكل بس باعتدال.. والاطعمة المثيرة للقولون نقدر نحصرها بالتالي: المشروبات الغازية، القهوة، مشتقات الحليب، الدسم، والفلفل والبهارات الحارة.. تقريبا ذي..
ثانيا، بعد توقفك عن بعض مصادر مثيرات القولون، تحتاج انك تصبر وما تنتظر نتيجة سريعة.. النتيجة ما راح تتضح لك الا بعد اسبوع تقريبا من التوقف، او اسبوعين بعد.. يعني خلك صبور ولا تستعجل ولا تقول ما فيه فايدة.. جسمك يحرز تقدم لكن عليك بالانتظار.
ثالثا، خلال فترة توقفك حاول انك قدر المستطاع تاكل اشياء مفيدة، طبعا انا متفهم كونك ما تقدر تغير نظامك الغذائي بسهولة، لكن حاول انك تتحمل شوي وتاكل بدون شبع، وتكثر موية تغسل فيها قصبانك 😶 وتجرب على مهلك فواكه، وكل ما كانت الفواكه مقطعة كل ما زادت الرغبة في أكلها 😌
رابعا: لا تحرم نفسك من المشي، مو ضروري تروح لممشى، او حديقة، او نادي رياضي.. لا، عندك الحوش، السطح، غرفة كبيرة مفتوحة، امش ربع ساعة متواصلة بشكل يومي.. طلّق رجولك، فكر في مشاريعك المستقبلية، خذ راحة من القعدة ومن الجوال، لعضلاتك عليك حق.
قبل الاخير.. معظم آلام القولون منشأها نفسي في اعتقادي.. عشان كذا، كل ما كنت اكثر راحة كل ما كانت آلام القولون اخف، وربما تختفي.. وعشان ترتاح، حاول انك تركز باللي تفكر فيه، وركز في جسمك، اذا وجدت نفسك مشدود الاعصاب حاول انك ترخيها وكرر الشيءنفسه عدة مرات لا تنسى نفسك متوتر..
أخيرا.. ثبت علميا ان بعض المشروبات ممكن تساعد في تخفيف أوجاع البطن والقولون، منها النعناع واليانسون، والكمون... وكذلك فيه حبوب مص بالصيدلية اسمها "رينيه" مصنوعة من خلاصة النعناع، مالها اي اعراض جانبية، لها فوائد كبيرة في تخفيف تشنجات البطن وانتفاخاته.. 👍
اذا استمريت على الكلام اعلاه لمدة اسبوعين فقط انا اضمن لك ان الوجع سيخف بنسبة تتجاوز الثمانين بالمية.. وتقدر بعدها ترجع لحياتك الطبيعية وتاكل اللي تبي بشكل معتدل.. وان رجعت لك مشاكل القولون..كرر الطرق اعلاه.. وتعايش مع القولون، ويدٍ ما تقواها.. خامسها 👳♂️👳♂️ وبس..
جاري تحميل الاقتراحات...