هذا موضوع عن عنايتي ببشرتي أعطاني نتيجة ممتازة، بشرتي مختلطة واستخدمت كثير كريمات لكن هذا الشي الوحيد اللي ناسبني، الأفضل استشارة الطبيب في جميع الأحوال، هذي كريماتي مشيت عليها كورس يحتاج صبر لكنه سهل، هذا الكورس للي عندها حبوب أو بثور، وكذا بتصير بشرتك مع قيام الليل وبر الوالدين
كريم أكنيزول ٥%، يشبه تركيبة أكرتين ودفرين لكني جربتهم لفترة طويلة ولا أعطوني نتيجة، أكنيزول هو الوحيد شال كل البثور وعالج بشرتي الحمدلله، يحتاج شهرين إلى ثلاثة عشان نوصل للنتيجة النهائية، اللي ماتستمر لاتبدا، ينحط بدون إضاءة كمية قليلة جدًا على وجه نظيف وجاف ضروري نظيف وجاف.
أكنيزول ماينحط حوالين الفم ولا حوالين العين، خلال النهار واقي شمس حتى لو في البيت من الحرارة والضوء، واقي شمس يوسرين ممتاز خفيف ومايسوي طبقة ولا يثقل المسامات لكنه خلص من عندي ونيفيا كويس يمشي الحال لكن مو زي يوسرين مناسب أكثر موجود في تطبيق صبار وكل الصيدليات،
باقي اليوم ترطيب بمرطب بيبانثين الأزرق فقط مو أي نوع ثاني لأنه خفيف ومايسد المسامات، أو أي مرطب خفيف عندك مثل سيتافيل المهم مايكون ثقيل، بعد كورس شهرين ونص تقريبًا راحت كل البثور والحبوب والرؤوس السوداء وجيت أعالج الآثار باستخدام كريم بيجمانورم.
بيجمانورم نقطة صغيرة على وجه نظيف وجاف، ماينحط حوالين العين والفم أبدًا، ينحط على الرقبة بعد لأنه يوحد اللون ويفتح فيصير وجهك نفس رقبتك، لازم واقي شمس وترطيب ضروري وخلال هالفترة ممكن يتقشر وجهك وماتقدرين تحطين ميك أب ولا أي غسولات وصوابين وأي شيء معطر على الوجه.
جربت كل أنواع الغسولات الطبية الغالية والرخيصة بدون فايدة، لين جربت غسول هيمالايا خالي من الصابون ويخفف الآثار وممتاز جدًا مستمرة عليه من شهور طويلة وناسبني مع الكورس موجود في كل مكان، هذا النوع فقط ناسبني بالنيم والكركم
هذي تجربتي قد تناسبك وقد لا تناسبك لكن الله يعلم حابة الكل يستفيد، أسعارهم رخيصة كلهم، أكنيزول ٦ ريال أو ١٦ مو فاكرة، بيجمانورم حول ٦٥، نيفيا واقي الشمس ب ٥٠، المرطب بيبانثين ب ٢٠ ريال.
الكريمات تحطون منها شوي مره قد حبة العدس، لا تكثرين وتسوين فيها كريمة لأن تصير نتيجة عكسية.
الكريمات تحطون منها شوي مره قد حبة العدس، لا تكثرين وتسوين فيها كريمة لأن تصير نتيجة عكسية.
اللي ماتلتزم بالطريقة كلها صح ماراح توصل لنتيجة، أنا ماحسيت باحمرار ولا حكة ولا تهيج لبشرتي لكن في حال حسيتي بشيء من هذا القبيل وقفي المقشر وكملي ترطيب لين ترتاح بشرتك وارجعي عليه وهكذا، يعني عاملي بشرتك بطيبة وإحساس، اللي تستفيد تدعيلي واللي ماتستفيد تدعيلي برضو مش حوار يعني!
بيجمانورم استمريت عليه شهرين وراحت الآثار كلها، لايستخدم لأكثر من ثلاث شهور لأنه كورتيزون يرقق البشرة لو طولتي عليه، ثلاث شهور ولو باقي آثار توقفينه وترجعين له بعد فترة، بالنسبة لأكنيزول عادي تستمرين عليه بشكل متقطع أيام وترك للحفاظ على النتيجة، لو تذكرت أي حاجة كمان برجع أكتبها.
جاري تحميل الاقتراحات...