القصص الشخصية
الصحة
العائلة
المجتمع
الصحة العقلية
قضايا اجتماعية
القصة الشخصية
إساءة معاملة داخلية
الفقر
سوء المعاملة
قضايا الأسرة
السلام عليكم،اتمنى اي احد يمر من هنا ينشر ، امي ضحية حرق بمادة الأسيد من المجرم ابوي ، بتكلم من البداية لاني مو عارفه من وين ابدأ، فعشان كذا بتكلم عن حياة امي من بدايتها... #حق_رشا
من عمرها ٥ سنوات افترقت عن امها بسبب طلاق ابويها (ابوها طلق امها لانها اصيبت باضطراب العقلي شيزوفرينيا "انفصام الشخصية" طبعًا ما يحتاج اوضح لكم سوءه وانانيته لانه واضح) وبكذا امي تبدأ اول معاناه في حياتها انه قدر لها انه تنحرم من امها
، تزوج ابوها بأمرأة قاسية تعذبها طوال ١٠ سنوات بتجاهل منه الى ان صارت ١٦ تقدم لها ابوي و تزوجته بالاجبار من ابوها وزوجته بفارق ١٤ سنة بالعمر وفوق كذا كانت قاصر اجبرت على ترك المدرسه رغم انها كانت من الاوائل ،عاشت في فقر شديد مع اربعة اطفال وفوق كذا ضرب واهانه وظلم
لكن بعد سنة امي رجعت للدراسه واضطرت تعيد الثانوية من البداية (بمحاولة من ابوي بإيقافها زي حرق كتبها الخ..) في عام ٢٠١٣ اصيبت اختي الي كان عمرها ٦ سنوات بسرطان الدم (لوكيميا) وطبعا لان ما كنا نروح المستشفى "اهمال من ابوي"كنا نروح المستوصف
وكانوا ما يعرفون وش فيها الى ان تطورت حالتها ووصلت للاغماء ودخلت المستشفى بعد ما رفعنا طلب للاماره مرتين لانه التكاليف كانت مستحيلة ،في ذاك الوقت امي كانت تدرس وفي نفس الوقت كانت مرافقة لاختي ومع ذلك كانت من الاوائل الدفعة وكرمت من امير المنطقة الشرقية
لكن للاسف اختي توفت بعد سنة واحده من بدأ العلاج وينضاف وجع اشد لاوجاع امي ، لكن ما استسلمت ورجعت بعد سنة ونصف تكمل جامعة لكن عمرها فوق العمر المسموح وظلت فترة طويلة جدًا تحاول ترفع طلبات استثناء الى ان قبلت
في ذيك الفترة كانت اسوأ الفترات لان ابوي كان يهاوش ويكسر وحالة هواش دائمة مع امي ( بالرغم امي كانت تصرف علينا كل ذيك الفتره من جمعية دراسية وهي المفروض كانت لتكاليف الكتب والمواصلات الخ.. ، لكن لان ابوي ما كان يصرف علينا شي وحتى كنا نخاف نطلبه)
في نهاية السنة الاخيره صارت مشكله كبيره بين ابوي وامي وكان بيحرق كتبها (كان ضد دراستها لانه كان يبغاها عاجزه او بمعنى اقرب زي مستواه)، وطبعا كأي انسان طبيعي بعد صبر ١٦ سنة فقر وضرب وتعذيب امي طالبت بالطلاق في اليوم الثاني، ابوي رفض
اضطرت امي انها تقدم على الخلع وكانت عندها دلائل على ايذائه لها لكن رُفضت بحجة انها غير كافية، فجلست قرابة الشهر في بيت اهلها الي ما كان يدفعون هلله عليها اضطرت تشتغل في ذيك الفتره في مهرجانات مؤقتة عشان تشيل المصاريف اليومية وايضا مصاريفنا لان ابوي ما كان يدفع شي علينا
المهم امي بدأت في جلسات الطلاق وابوي ما حضر الجلسة الاولى وطبعا لان القوانين الي كلها في صف الذكور قال لها الشيخ اذا ما حضر ابوي الجلسة تأجل للشهر الي بعده وهكذا ومافي اي قانون يجبره انه يحضر ، تخيلوا وقتها شعور الضغط الي على امي من اهلها ولا ابوي ولا من القوانين الظالمه!
اضطرت امي انها تروح لعند ابوي تكلمه كأنسان عاقل لكن ابوي استغل الوضع (انها كانت لوحدها ) وحرقها بالاسيد بعلبة كاملة (حرفيًا بدون اي مبالغة علبة كاملة)، انتقامًا مع تخطيط طول المدة الي كانت في بيت اهلها
الحادثة صارت قبل اسبوع واحد فقط من موعد تخرجها (الي كانت تحلم فيه من وقت تركها للمدرسه الى عودتها للجامعه كل صعوبات الي عانتها بسبب تمسكها بدراستها عشان حتى ذي اللحظة البسيطة مقارنة بجهدها انحرمت منها)
جلست في العناية المشددة شهرين و بقسم التنويم شهرين، خلال الفتره هذي ابوي راح عند قسم الشرطة واشتكى على امي! انه هي جت وهاوشته وحرقت نفسها عنده! طبعا حجزوه الى ان تطلع امي من المستشفى عشان تبدأ جلسات المحكمة في البداية كان احتمال نخسر القضية بقولهم انه يمكن هي جد حرقت نفسها وتكذب
لكن بسبب تخالف وتبديل اقواله (متخيلين وش كانت كذبته الثانيه قاعد يقول انه هي هاجمته بالاسيد وهو حط يده دفاعا عن نفسه فانسكب عليها! متخيلين كيف ضميره المجرم وهو مطلع نفسه الضحية!! ) بدوا يشككون فيه ويجبرونه على الاعتراف بعدها اعترف عشان يُخفَف من عقوبته
وحكموا عليه بتعويض مادي لامي بمبلغ ٥٠٠ الف تقريبًا ، لكن ما جا اي شي من المبلغ من ابوي او من اهله والحين مرت سنتين ولا شي جا الي المفروض امي تكمل فيه علاجها . (هنا التقرير طب الشرعي لكمية الضرر ، والثاني حق معلومات القضية وتقدير التعويض المادي للضرر)
قبل يومين كلمتنا جمعية السجناء انه محد قاعد يدفع وانهم احتمال "ما اكدوا لنا" يدفعون (اقل من نصف المبلغ !)مقابل انه امي تعفو عن ابوي! متخيلين الالام ووالاثار الجسدية والنفسية وصبر السنتين بمبلغ ما يغطي وحده من عملياتها وفوق كذا تعفو عنه! وغير يمكن مو اكيد!
هذا السبب الي خلانا اجي التويتر واسألكم عشان لا نضطر لجحف الحق هذا! المبلغ ابدًا ما رح يعوض الاثار النفسية او حتى الجسدية لان بعض الاثار والتشوهات ما تروح لكن على الاقل يخففها. (هذي "بعض" الصور للحروق الي صورتها اليوم ، ما قدرت احط صور كلها لان بتكون حساسة للبعض)
كتبت قصة امي كامله لانه صدق عانت بما يكفي ما ابغى بعد فوق كل ذا حقها يروح ، وامي احق بالمبالغ الضخمة الي تندفع للقتلة الي بعضهم ما يطول حتى اسبوع الا والمبلغ اندفع
جاري تحميل الاقتراحات...