الصورة متداولة بشكل ساخر عشان واضح ان السؤال غريب لأن كل اللي مكتوب يبدو أنه حاجات أولية. ولكن التعريف هنا يبدو لي انه مبني على نظرية Maslow في الخمسينات اللي بيقسم فيها الاحتياجات لهرم قاعدته الحاجات الأساسية اللصيقة بالإنسان والثانوية متعلقة بمحيطه وبالتالي الاجابة:الصحة.
وعشان نشرح الموضوع ببساطة فالحاجات الأساسية هي اللي من غيرها الإنسان مايقدرش يعيش فسيولوجيا بسبب عدم قدرته على استدامة حياة في البيئة اللي عايش فيها مثلا: المأكل، المسكن، الملبس لو حاجة من دول مش موجودين الإنسان في خطر داهم على حياته هيمنعه من قدرته على توفير باقي احتياجاته
هتيجي تقول طيب هي الصحة ممكن تبقا حاجة ثانوية ازاي يعني؟ هقولك ثانوية هنا مش معناها "مركونة على جنب" زي ما التعبير بيوحي أنما معناها أنك عشان مجتمع يقدر يحقق احتياجات زي الصحة والأمان لابد أنه يتوافر اقامة الاحتياجات الأساسية للفرد زي الأكل والمسكن والملبس.
وعشان ندي مثال بسيط: هل هتعرف تبني نظام صحي متكامل لو انت عايش في مجاعة؟ هل لو درجة الحرارة 40 في الصحرا وفي واحد ماشي هيغمى عليه من ضربة شمس ماشي عريان ومعندوش مأوى أنهي هيبقى أهم، حاجة يلبسها فوق راسه أو مأوى ليه ولا انك تديله دوا يحافظ بيه على صحته؟! 😄
طبعا ده تفسير النظرية يعني واهي كلها نظريات بتحاول تربط ما بين دوافع الانسان النفسية وعلاقتها بالنظام الاقتصادي وبتحاول تأسس للأولويات في الاحتياجات ودراسة الأنماط الاقتصادية لمجتمع من خلال معرفة درجة توفير احتياجاته الأساسية والثانوية
جاري تحميل الاقتراحات...