المثالية المُفرِطَة مُمِلَّة ، أي حاجة ع الشعرة مُبهِرة بس بيتزهق منها ، كل حاجة معمولة مَسطرة تخطف إللي يشوفها بس-مؤقتاً- عشان مفيهاش روح ، النجاح الأوڤر -غالباً- بيخلي صاحبه دمه تقيل ، الأفراح السينييه إللي بالملايين بهجتها بلاستيك ،..

الراجل الوسيم الغني الناجح الشيك المحترم اللي جسمه حلو وصحته حلوه يتقلق منه ، مفيش سِت مافيهاش غلطة تنفع تطيقها أكتر من عشر دقايق ، السكر الزيادة بيجزع النِفس ، البدلة والجزمة الكلاسيك والفستان السواريه والهاي هيلز في منتهى الشياكة بس تكتيفة وقطمة ضهر ،

كل ما الحاجة قرَّبت من الكمال أكتر كل ما كانت مربكة ومريبة ودمها تقيل أكتر .
مفيش زي رحرحة لبس البيت المبهدل، ومفيش زي متعة تنطيط اللبس الكاچوال ، الألدغ هو الوحيد المميز ما بين ألف لسان طبيعي ، مفيش أجمل من السفريات إللي ماتظبطلهاش
، ومفيش أحسن من إللي عرفناهم صدفة من غير ترتيب.

المجد للدهولة والزروطة والرحرحة والشرابات الفردة وفردة والرباط المفكوك والدقن الطويلة والشعر المنكوش والكروكس عالشراب واللبس إللي عالسرير والنوم إللي عالكنبة ،وليسقط المفروض واللازم وإللي مايصحش والكتالوج والخطوط والجداول وحضرتك ويا فندم ومعاليك وسيادتك وتحت أمرك .
@Rattibha