كفايه سياسة النهارده واحكيلكم حكايتي مع العفاريت
كان يا ماكان في سالف العصر والاوان لما قررت اتجوز اشتريت شقة في المعادي ولظروف سفري في الوقت ده قفلتها فتره، ماكنتش اول مالك لها، نزلت من السفر علشان اظبط الشقة قبل الجواز، قبل الفرح كنت بضطر اني ابات فيها علشان اخلص الرتوش اللي باقيه،
اول يوم نمت فيها صحيت الساعه ٣ الفجر على صوت كركبة في المطبخ زي ما يكون حد موجود، طبعا قلت دي تهيئات وحاولت انام، الصوت اتكرر بشكل اعنف، بدأت استدعي كل افلام الرعب اللي اتفرجت عليها وبعدين افتكرت ان فرحي بعد كام يوم فدبت فيا روح الشجاعة وقلت مايصحش اومال،
وقررت اشوف ايه بيحصل دخلت المطبخ ودورت في الشقة كلها على مصدر الصوت مفيش طيب المنور برضو مفيش المهم ماطولش عليك قول طول الموضوع ده اتكرر مرتين تلاته وانا قررت ما اركزش فيه انا داخل على جواز والتوتر مش من مصلحتي😏 اتسحلت في الترتيب للفرح وسافرت شهر العسل،
اول يوم رجعت كنت مرهق من السفر جدا نمت نوم عميق صحيت على جرس الباب الساعه ٦ الصبح بصيت في الساعه وقلت مين مجنون جايلي دلوقتي، روحت افتح الباب وانا مش مركز من الارهاق والنوم ك،فجأة واحده ست عجوزه لابسه اسود بتقولي ازيك يابني انت العريس اللي ساكن جديد؟
قلتلها ايوة حضرتك، سألتني انت كويس قلتلها الحمدلله كررت السؤال مرتين ومشيت، ققلت الباب ورحت كملت نوم وانا مش فاهم،لما صحيت افتكرت اللي حصل وبدأت اتوتر نزلت للبواب سألته فيه ست خبطت عليا الصبح وصفتله شكلها قالي مفيش حد من السكان شكله كده وبعدين مفيش حد طلع العمارة اساسا،قلتله نعم
فجأة حسيت اني يسرا في فيلم الانس والجن😏 بدأت اقلق بس في نفس الوقت مش عايز اصدق ولا استسلم للفكره لانها مرعبة من ناحية ولو هي حقيقة هاعمل ايه وانا لسه اول ايام ليا في الشقة والجواز، المهم ما اطولش عليك قول طول بدأت اشغل قرآن كتير لحد ماحصل تطور جديد،
كل اما انام اصحى على حد بينفخ هوا سخن في وشي وبدأت اصحى من النوم مفزوع وشكلي بقى مش ولابد في البيت😏 مراتي بدأت تقولي انت فيه حاجة موتراك قلتها لا مش انا اللي يتقاله الكلام ده😢، انا زي الفل وقلبي حديد، بدأت هي كمان تسمع اصوات في المطبخ سألتني انت سمعت الكركبة اللي في المطبخ
عملت من بنها طبعا وقلتلها لا طبعا مفيش اي اصوات وفجأة حله اتهبدت في ارضية المطبخ قالتلي سمعت،قلتلها عادي يعني مفيش حاجة انتي قلبك خفيف كده ليه انتي متجوزة راجل عيب تخافي وانتي جنبي🙄 انا هاروح اشوف فيه ايه وادخل الحمام،طبعا انتوا عارفين انا رايح الحمام ليه بعد صوت الحلة
اللي اترزعت في المطبخ😏 رحت الحمام واذ فجأة لمبة الحمام فرقعت و الإزاز نزل على دماغي ماحسيتش بنفسي غير وانا خارج اجري من الحمام في نفس وضع بوحه الصباحي وهو هربان من ولاد ابو اسماعين، مراتي بدأت تترعب وانا طبعا مش عارف اخد نفسي وبحاول اقنعها
ان إليكترونات التيار الكهربي بتتفاعل طرديا مع التيار اللي جاي من المنور فبتعمل منطقة ازاحة كهرمغناطيسية فاللمبه فرقعت،وانا هاعيط من جوايا، ما اطولش عليك قول طول، الموضوع ده بدأ يتكرر في الشقة كلها لمبات تفرقع والكهربا كلها تعمل قفله جبت حد راجع التوصيلات كلها
واكدلي ان كل حاجة تمام، بدأت اتأكد ان فيه حاجة مش تمام وخاصة اني كل ما اشغل قرآن يحصل ققله في الكهربا، بدأت اقضي اكبر وقت بره البيت ومش عايز ارجع البيت الموضوع اتحول لأزمه فعلا بس مكمل، لغايه ما في يوم وانا في الليڤينج سمعت مراتي بتصوت جريت عليها لقيتها بتعيط
وبتقولي السرير بيتحرك بيا بطريقة رهيبة، وبدأت تقولي الشقة مسكونة وانا مش هاقعد فيها تاني حاولت اقنعها ان اللي حصل مجرد توابع للزلزال الي حصل في مصر سنه ٩٢ لان المعادي بتقع في حزام زلازل شرق اسيا😏 لكن خلاص كان فيه يقين ان الشقة مسكونة وان اداء اللهم احفظنا بيتطور تدريجي
والشقة اتحولت لقبر حرفيا خيالات ماشية في الشقة في كل مكان و لمبات تتحرق كل يوم واصوات رهيبة وحد يصحينا من النوم، لغايه ما في يوم راجعين من بره متأخر لقيت فريزر التلاجة مفتوح على اخره ودم نازل منه مغرق المطبخ وهنا ماحسيتش بنفسي غير وانا بجري انا ومراتي على السلم بالشكل ده 👇
و نسيت اي كلام قلته عن القلب الجامد والرجولة والكلام الهجايص ده كله، ما رجعناش الشقة طبعا ونمت اليوم ده عند حماتي ،مراتي قررت انها مش هتقعد في الشقة حجزت كام يوم في فندق لغاية ما اقرر هاعمل ايه، حاولت اروح الشقة بس الموضوع فعلا اصبح لا يحتمل و قررت ان اسيب الشقة فعلا
وبدأت ادور على شقة تانيه ولو بشكل مؤقت وفعلا سيبت الشقة بعد شهرين من جوازي، جبت شركة تنقل العفش وتغلف الحاجات كنت واقف معاهم طول الوقت بعملهم شاي اكتر من مره، نزلوا العفش ومش باقي غير البوتجاز اللي كنت بعمل عليه الشاي دورت على مفتاح علشان افك الانبوبة اللي كانت لسه شغالة
من دقيقتين واذ فجأة اكتشف ان الخرطوم مش متركب اساسا سألت العمال في حد فك الانبوبه وكان الرد الصادم ان مفيش حد جه جنبها، بدأت اتحول زي توفيق الدقن وانا وقف
ومن يومها قلت المعادي لا ،يحرم عليا الكيف لو قطعوا رقبتي بسيف، طبعا خدت فتره علشان ارجع طبيعي زي الاول و الحمد الله ان الضرر كان مؤقت 🙄😏
جاري تحميل الاقتراحات...