رتبها

جوه هاي التغريدة
راح انشر مجموعة ذكريات وقصص من بغداد خلال فترة ٥ سنين من التوثيق والاعمال الفنية والسياحية والتعريفية لكل ضواحي ودرابين بيت العراق الكبير بغداد❤🇮🇶

لتسمي نفسك صاعد كية اذا متصعد كية من الطيران للبياع بعز الصيف والحر
ويصعد وياك كهوجي
يمكن كد مشربنا كهوة دفعناله الكروة مرتين

هنا كلشي يوكف، عقلك كلبك الوقت المكان
هنا تبقى صافن وتمد رجلك وتعوف الكاميرا وتصفن..
ساحة الفردوس

الكاظمية اذا متهت بيها تتيه بيها روحك، من دربونة لدربونة ومن قصة لقصة ومن خان لخان

اهل الشواكة عدهم كهوة تصير على النهر يم الزوارق مال صيد سمج
هاي الكهوة ليلية، بيها تلفزيونين
يجون يباعون لعبات الطوبة او يدخنون نراكيل ويصفنون على دجلة و منظر جسر الشهداء والمدرسة المستنصرية العتيقة وجامع الخفافين والوزير والآصفية وبنايات شارع الرشيد
مزاج كرخي بحت

هاي اكو جايخانه بالأكمكخانة (المتنبي)
فوك قيصرية حنش، يندلوها بس الاعتاد الاوتاد من اهالي بغداد
بعيدة عن هوسة المتنبي الصبح
صغيرة ومتفرعه من مكتبة، تجرلك كراسي من الداخل ويطلعلك طبلة وتكعد
وممكن يسويلك ريوكات بمطبخه المتواضع
فتخيل تكعد وتاكل مخلمة وجاي مهيل على هذا المنظر الصبح

حسين راجع من التحرير وكاعدين بكهوة ابو زهراء بالكرادة داخل و صار الحجي على المدرسة المستنصرية والعمارة البغدادية
فاني لا اكولكم ولا تكولولي، لزمتها للسبحة الفروزج
رفعت ايدي اليمنه افرفر بيها وأحجي
وذيج مخارج الحروف مال اهلنا
ومن الفرحة الكاع مشايلتني 😂❤

هاي مره جنا نتمشى اني والولد جماعتنا فوصلنا يم جامع،
كتلهم: يابه نطب للجامع
واحد منهم كلي: يابه الباب مكتوب عليها مغلق لاغراض الصيانة
جيت للباب دفعته، طلعلي حارس وشيخ الجامع كلي "شونك عيوني مهندسنا حسين تفضل اغاتي"
المهم الولد سماني داح باب بغداد 😂😂😂
وهاي صورة من سطح الجامع

هاي لمن اصدرت كتابي الأول سألوني وين حتسوي قراءة الكتاب؟
واحنا لا اختارينا قاعة مليانه مصورين ولا صالات ودعوات، طلعنا بوجهنا لبغداد القديمة
نمشي ونوكف يم معالم المدينة ونقره للناس كلهم بالشارع، هاي الصورة كبال المدرسة المستنصرية وويايه امين مقداد و آلته الموسيقية "أدد"

مرقد مولانا
العاشق العارف بالله، الحسين بن منصور الحلاج البيضاوي البغدادي
هذا المكان جان بيت الحلاج الي جات تكية لتلاميذه، وجثمان الحلاج الطاهر حركوه وماله قبر الا رماد جسمه المنثور بدجلة
هذا المكان بمحلة المنصورية قرب مرقد السيدة زمرد خاتون بالكرخ القديمة

براء روح النخيل الهائمة بكل نسيم الهوه الي يهز سعفاتها
براء بنت روح بغداد
اتذكر هذا اليوم ورا الحادث الي سويته قبل ٣ سنين وجنت قريب الموت
وجينا اني وبراء كعدنا على رصيف مول المنصور نشرب ريدبول وباربيكان كنوع من الاستمتاع الحياة 😂😂❤
@Baraamahmouds

كلاسيكو بغداد الأزلي
زبيب حجي زبالة بالرصافة
زبيب حجي عبيد بالكرخ
يفوتكم طعم العسل الي بزبيب حجي عبيد تحس الحجي يقراله للعسل قرآن حتى يصير دبل حلاوة

هاي الصورة من احد الجولات السياحية لضفاف بغداد القديمة الي جنت اسويها ويا @BilWeekend
هاي الجولة بالذات جانت المفضلة، جانو ويانا طلاب طب من منظمة ال IFMSA واكثر شي حبيته هو اهتمامهم وشغفهم وسؤالهم عن الرايحة والجاية بكلامي
هاي الصورة جوة قبة بيت والي بغداد❤

مرقد السيدة الطاهرة زمرد خاتون في جانب الكرخ محلة شيخ معروف
هذا المكان يقارب عمره ٧٠٠ سنة، وعمارة هذا المكان وقبته المخروطية من نوادر العالم
هذا المكان اجيه جنت الصبح قبل الفجر، ولمن تشرق الشمس تدخل اشعتها من شبابيك القبة الدائرية.. وصوت الطيور تغرد
روح زمرد الصوفية.. ليهسه بيه

الاعتاد الاوتاد من اهالي بغداد
لا ... وانما الوتد الأكبر
الكرخي الباشا والأفندي وأبن العم عبدالله سرمد
هاي الصورة فوك عمارة البهبهاني تصميم رفعت الجادرجي
جنا نحضر لاكبر معرض حي بالشرق الاوسط يمتد مسافة كيلومترين لصور من كتابي "الف قصة وقصة" معلكة على بنايات شارع الرشيد ❤

من تسولف ويا جيس الاسمنت وتلبسه شماغ الأسطة حتى يصير نفس الجص ويطلعلك البناء بغدادي
اي داد فدوة اروحلك تعال بالعيني والاغاتي بأيدي ولا تعنفص عليه وتتاخر يلا تيبس

انت حتكون أسعد انسان ببغداد
لمن هاي السدارة تعتلي راسك
وهاي السبحة الفيروزج تجقجق بأيدك

الكرخ القديمة شي يجر شي
ياخذك درب حيفا لساحة الطلائع
تكول يلا بس امشي للشيخ معروف
وراها تكول ديلا هي سيدة زمرد قريبة
وراها تكول مولانا هم قريب عليه خلزوره وأصلي ركعتين.. والكيم ابو سامي يزعل علينا اذا مرينا بمحلة المنصورية وما سيرناله وسيرنا لأبو المغيث منصور الحلاج

يسر اليوم قرر يعيد الصورة هاي
بس لو شوية متقدمين جان جتي فت

محلة شيخ معروف الكرخي
المكان الي اذا تنطي للتكان الف وتريد ٤ بطالة مي يكلك "اخذ خمسة الدنيا حارة وحتعطشون وتدللون ومع السلامة"
حتى ميصير عندك فرصة تتفاهم وياه 😂😂😂❤

تحضيرات القصة:
-جاي
-جكارة
-ايدك اليسرة على ركبتك اليسرة
-قنفة عتيكة
-الناس الطيبة @BanLayla2 @YahiaKareem5

أعظم القصائد لبغداد
تكتبها الطيور بأجنحتها
على قباب جوامعنا الفيروزية
هاي الصورة سنة ٢٠١٨، صعدت فوك منارة جامع الحيدرخانة وبوكتها نسيت الأكو والماكو والألية والعليه
يا ريتني باقي هناك ومماشي الزمن من يومها

ال stary night مال فان كوخ بس بعلاوي الحلة

سنة 2018
فوك احد اقدم المنارات بالعالم ويقارب عمرها ألف سنة
احد اعتق الآثار العباسية في العالم
منارة جامع الخلفاء (سوك الغزل) في الرصافة القديمة
بالأفق يظهر السوق العربي وكنيسة اللاتين وعمارة ادفيش عبود وبنك الرافدين وعمارات شارع حيفا

نظرة ال"اجقك اجقك"
حتحصلها لمن تبدي تجفص وتكمز كدام واحد كبحي مثلي
وتكثر هذه النظرة في شارع المتنبي حيث الكثير من المكمزين المجفصين والدجةدبنك

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد