مرحبًا أنا أسمي مُهجة عزيز ،بحكيم اليوم عن تفاصيل قصتي مع مرض #فقر_الدم_المنجلي ،أتمنى تفيدكم ولو بحته صغننه 🌧🤍✨!
بالبداية وقبل كل حاجة نبدأ من البداية عام 1996م بابا وماما تزوجوا ،ووقتها كان مافي فحص قبل الزواج للامراض الوراثية ،بعدها رزق بابا وماما بأخويا الأكبر وكان وقتها "حامل" للمرض ،ولكن ماتم تشخيصه.
في عام 1999م نورت على الدنيا ،بمرض فقر الدم المنجلي ماكانوا اهلي يعرفوا عن اصابتي ،إلا في بعد ما بلغت سن السادسة ،في مرحلة الابتدائي كان ماتجيني ألآم حادة ،كان مجرد ألآم بسيطة ،مقدر أمشي بسببها وأجلس طريحة الفراش بقية اليوم.
في مرحلتي المتوسطة جتني زكمة بسيطة بس جلست أكاني منها لأسبوع عكس اخوتي البقية ،وفي يوم من الأيام جاني ألم شديد وبعد يوم اختفى.
وصلت للمرحلة الثانوية واشتد المرض معي ،وعرفت إن المرض يتأثر بالإجهاد النفسي والجسدي بطريقة أو اخرى ،تعرضت لعدة نوبات دخلت على اثرهم المستشفى ،لكن ما طال الأمر بس اخذت مسكات وريدية ،وخرجت سالمة ،إلا في يوم كتبوا تنويمي ولكن خرجت لأن عندي اختبار نهائي.
وإيوا وصلت للمرحلة الجامعية ،لكن وللأسف أول سنة بالجامعة كانت جدًا نفسيتي تعبانة ،خلتي اوقف اكل فترات طويلة ،ووصلت لدرجة اكل ساندويش وحدة لما أبدا احس إني ما اشوف شيء ،مما أثر وقتها كثير على صحتي لدرجة نحفت 7كيلو بشهرين ،ولسبب تهالك صحتي حصلت كثير نوبات ليا.
عدت السنة وتلتها سنة كانت شبه خالية من الأحداث المثيرة للإهتمام ،لكن بسنتي الأخيرة بالترم الأول جاتني زكمة فجأة ،وطولت معايا بعدها تحولت لإلتهاب رئوي دخلت على اثره المستشفى يوم لأني ماكنتش قادرة اتنفس ،وبعدها خرجت.
بعد كم يوم كنت خارجة لبيت احد قرايبي وفجأة قلت لماما احس ظهري يألمني ،وماجلست شوي حتى بدأ كل الالام مقدرت اتحمل وجلست ابكي ،رجعت البيت وقلت لبابا: اذا ما خف لين الفجر لازم اروح ،كان الألم على غير العادة شديد ،جاء الصبح والألم لساه رحت المستشفى.
وانصدم الدكتور بهبوط حاد بالدم وصل نسبة دمي وقتها 6/13 وبأسرع شيء لغرفة العناية اللي اتمت فيها ثلاث ايام مابين تبديل دم ،وتركيب دم ،مرت الأزمة وعرفت من الدكتور إن اتفه إلتهاب ممكن يسبب أزمه صحية وتدهور بنسبة الدم عندي ؛لأن جسمي يعطي رد فعل عكسي بعد عملية مقاومة ويسحب الدم.
مر الترم بسلام وحل الترم التاني ،جاء كورونا وكنت من الحسبة اخربط بالأكل وما اكل كويس ،جات بعدها نوبتين اضطريت اروح المستشفى فيهم واخذ اقوى المسكنات ،وإلى حد ما وكنت اهدى ،بس في التانية قال الدكتور دي اخر مره نعطيها المرة الجاية تبديل دم لأن اعطيناها جرعة اكبر.
رجعت البيت وخف الالم بعدها اختفى تمامًا ،وفي يوم رايق كنت امشي فيه بطني قام يوجعني ،وكانت لأول مره في الحياة يألمني بطني اثر نوبة ،مقدرت اتحمل ورحت المستشفى ركبوا كيس دم مافاد ،بدلوا دم مافاد ،سويت صبغة واكتشفوا إنو هالمرة المرارة إلتهبت.
وإيوا كان إلتهاب شديد ،استأصلوها بنفس الاسبوع اللي كنت نايمة فيه بالمستشفى ،وخرجت اليوم التاني وعرفت إن من الطبيعي لمرضى الأنيميا يستأصلوا المرارة قبل سن 30 ،وهذا لان تحلل الدم السريع عندنا يسبب تراكمات في المرارة.
بعد عملية استئصال المرارة صرت أكثر صرامة مع نفسي ،وكثير أشياء تجنبتها ،وكمان عرفت إني لازم ما أرهق نفسي ،وبس شكرًا لقرائتك قصتي ويارب افدتك 💉♥️✨!
جاري تحميل الاقتراحات...