بأقول لكم على أغرب تجربة حسية مريت بها في حياتي، وإلى اليوم ماعندي تفسير واضح لإيش صار بالضبط، في 2007 كنت مريض بألم مزمن في المثانة، راجعت عدة أطباء لعدة أشهر ومحد منهم قدر يعطيني تشخيص أو علاج، كل الفحوصات قالت مافيك شيء.
الألم كان مزعج لدرجة إني بعد شهر من إصابتي به أضطريت أترك عملي، ماكنت أقدر أنام الليل بسببه، أستقلت وقررت أرجع لبيت والدتي في الدوادمي، طلعت من الرياض في الليل بسيارتي وبعد تقريباً ساعتين من الرحلة أشتد ألم المثانة معي لدرجة إني وقفت السيارة على جنب الطريق.
يوم وقفت نزلت من السيارة كنت أبي أئشر على أي أحد وقف لأني خشيت إنه يغمى علي، طحت جنب السيارة وبديت أتشهد لأني حسيت إني بأموت، وعلى اللحظة اللي كنت أشعر إنها اللحظة الأخيرة شعرت بنشوة سلام داخلي قوي جدا جدا ما اقدر أوصفه، حسيت بالشعور اللي يقولون يسمونه اليوفوريا
ما أبالغ إذا قلت إنه كان ولايزال ألذ وأحلى شعور حسيت به في حياتي ولا كنت أتخيل إن فيه شعور بهالجمال والحلاوة، كأن الجزء اللي من نفسي مسؤول عن الألم والنكد إنفصل ومابقى إلا الجزء المسؤول عن السعادة، قعدت في سكرة هذا الشعور يمكن عشر دقايق، بعدها صحيت.
الألم حق المثانه كان لايزال موجود، بس خف، والشعور الحلو هذا حسيت إنه خلاني في حالة سلام داخلي غريب، قعدت يمكن أسبوع كامل وهالشعور أثاره موجوده معي مثل العطر، من كثر صدمتي بهالشعور أذكر إني يوم وصلت للبيت خليت السيارة شغاله ونسيت أسلم على والدتي لأني كنت في حاله نشوه غريبه جداً.
خف ألم المثانه في الأسابيع اللي بعدها لين اختفى لكن هالشعور الجبار اللي حسيت به نصف حياتي وخلاني نوعاً ما أصير منفتح للتجارب الروحانيه اللي بعض الناس يدعي إنه مر فيها، اقرب شيء لقيته لتفسير اللي صار معي هو إن الكائنات الحية إذا أيقنت إنها بتموت يفرز مخها كمية أندورفين كبيرة.
هذا مقال يتحدث عن هذي الحالة، الحقيقة إن هذي التجربة خلتني نوعاً ما متصالح مع فكرة الموت، وإذا كانت اللحظات الأخيرة من الحياة بتكون مثل ذيك التجربة اللي مريت فيها فهي خير ختام ممكن يشعر به الإنسان لرحلة الحياة لأنها بدون مبالغة عشر دقايق عن خمسين سنة. bbc.com
أحياناً أقرأ عن التجارب اللي يوصفها البوذيين والصوفية أو الناس اللي يستخدمون المهلوسات، و وجدت إنه ماهي صدفة إنهم يصفون أشياء تشبه اللي شعرت فيها، مثلاً الصوفيه يقولون أشياء لها علاقة بوحدة الوجود أو إنهم وكل شيء صارو واحد، وهذا الشعور اللي حسيت فيه
صعب إني أشرح لكن اللي شعرت فيه وأعتقد إنه بعث في نفسي سلام داخلي قوي هو تقرير وإيمان قوي جاء في نفسي بأني أنا مو فقط في جسمي وإنما موجود في كل شيء، فبالتالي جسمي ماعاد يهمني، فلو مات جسمي أنا بأظل موجود في كل شيء، ادري خرابيط لكن هذا المنطق الغريب اللي كان في ذهني.
التجربة هذي خلتني إذا شفت البوذيين أو الصوفيين يقولون خرابيط متشابهه "أنا كل شيء وكل شيء أنا" صرت أتوقع إن هذول الجماعه مرو بتجربة روحانية مثل اللي أنا جربتها بس هم يفسرونها من خلال إيمانياتهم، ولاصرت ألومهم إذا تعلقوا في أفكارهم لأنها تجربة قوية وغريبة جداً.
وأيضاً ما ألوم الناس اللي يخوضون هذي التجارب ويفك معهم شيء أو يتغيرون لأنها تجربة عميقة وغريبة وتغير مفهومك عن الحياة وإيش الحسيات المعقول إننا نشعر فيها.
هذا فيديو لعالمة مخ وأعصاب تحكي في مؤتمر تيد عن شعور سلام غريب جاها أثناء إصابتها بجلطة في المخ، وأذكر إني يوم شفته اول مره على طول قلت عجيب هذي المرأة شعرت بنفس الشيء اللي انا مريت فيه لأنها وصفته بالضبط زي مريت انا فيه، يوجد ترجمة عربية في الخيارات
youtu.be
youtu.be
جاري تحميل الاقتراحات...