مرحبا.. سوف أتناول #سلسلة_معلوماتية من الماضي الجميل، بعنوان: قصة بداية "محمد في البكالوريوس" تخصص #علوم_المكتبات_والمعلومات، الفشل حصل إلا أن النجاح كان له بالمرصاد...كنت مبتدئ خائف والآن متعلم واثق، من باب #مشاركة_المعرفة نتناول تجربة ممكن تفيدك! ننطلق...
تمهيد: عند إقتراب تخرجك من التعليم العام وتوجهك إلى التعليم الأكاديميي يجيك ذاك الشعور الغريب "خوف على فرح"، خايف من اللي بيجي، وفرحان عشانك كبرت وبتدخل الجامعة، وفي ذاك اليوم وأنت بالمدرسة يوصلك كتاب...
الكتاب: "كانك لاحق عليه تراك لسى شباب" دليلك نحو مستقبلك التعليمي والمهني – إعداد الإدارة العامة للتوجيه والإرشاد بوزارة المعارف، لبجاد بن محمد العتيبي (كان المدير العام للمدارس السعودية بوزارة المعارف)وعبدالكريم بن سليمان الجربوع (أعتقد مدير عام الاختبارات والقبول بوزارة التعليم
معلومات: في الماضي ما كان عندنا ذيك التسهيلات ولا كان عندنا شبكات تواصل إجتماعي عشان تسأل عن تخصص تبغاه، ما كان فيه الا اسأل عمك والا خالك والا اسأل اللي تشوفه فاهم، وتقول له وش رايك في التخصص الفلاني، ولكن هذا كله ممكن يكون ولا شيء لما يكون حولك واحد خاض التجربة (أخ).
تنوير: كيف عرفت عن التخصص؟ لدي اخ أكبر مني سن دخل للتخصص لمدة عام، وكنت أقرا واتعبث (لقافه) في كتبه ومذكراته، وممكن نسمي هذا شغف تعلم، كنت اقرا واستغرب كلام كبير كبير ماافهم منه شيء، بس عاجبني...
جديد قديم: لما تخرجت من الثانوي كانت نسبتي مرتفعة (تراني لحقت على أسئلة الوزارة)، ولكن كان في صدمة ما يسمى بإختبار القدرات، شيء جديد أول مره نطبقه مافي مذاكرة ولا منهج ولا كتب، المهم جبت العيد أول إختبار والثاني الحمد لله سلمت منه.
قبة الجامعة: لما رحت أنا والوالد الله يحفظه لــ #جامعة_الملك_سعود وهي خياري الأول، واللي فيها مكان كبيرة أسمه القبة مكان التقديم، لما دخلت ما اشوف الا بس ملفات لونها أخضر وناس كثير، أستلمت طلب التقديم على الجامعة وقالوا لي سجل رغباتك وكمل بياناتك.
الأب: شكراً لكل أب رائع يدعم أبنه ويقف معه في كل شيء، قدم لي والدي قلمه عشان أكتب "طبعاً ما جبت قلم" أول خيار كتبته كان #علوم_المكتبات_والمعلومات وبعدين كتبت خيار قدمه لي والدي بدون ذكر أسماء (تخصص له علاقة بالشريعة والقضاء)وما اذكر كم تخصص كتبت بس في تخصص أخير سبب مشكلة
المرحلة الأولى: المكان مزدحم وعالم وما تسمع الا كلمة التخصص فل فل (مليان) تبي كذا احطك في هذا التخصص، ايه ايه زين هالتخصص (تسليك طبعاُ)، المهم جاء دوري، والموظف يشيك على الملف والنسبة والقدرات المهم طالع فيني قال محمد وراك كاتب هالتخصص الأخير؟ قلت ما ابيه قال نسبتك حلوة نحطك فيه
المرحلة الثانية: الموظف يقنعني أغير التخصص وأنا مُصر لا مابي خلينا على المكتبات والمعلومات، طيب التخصص الثاني زين لمعدلك وباين ما شاء الله عليك شيخ شيخ (يكبر راسي)، أقوله لا شكراً، طبعا الوالد سألني محمد تبي هالتخصص متأكد، قلت إيه ابيه، المهم الموظف زعل علي يقول بكيفك
المرحلة الثالثة والأخيرة: دخل محمد #جامعة_الملك_سعود عام 1426هـ تخصص #علوم_المكتبات_والمعلومات والفرحة ما تشيلني مبسوط من قدي دخلت الجامعة وبلبس عقال (يذكرونها بعض الناس ترى لازم تلبس عقال وتشخص) ونادر اللي ما يلبسون شماغ.
بيئة جديدة: التعليم الأكاديمي مختلف جداً عن التعليم العام، أسلوب تدريس جديد ولم يسبق للطالب ان مارس هالطريقة لما كان في المدرسة، لما يدخل الدكتور ويقول لك اذا دخلت محد يدخل بعدي؟ هنا أنت ما تدري وش يقصد؟ والا لما يقول أكتب معي؟ والا لما يقول تكليف – وش معنى تكليف (واجب)؟
الصعوبة: يالله يا الكتابة في المحاضرة الأولى تسحب على بعض الكلمات وتنسى وتخاف ويجيك احباط ما تدري تركز في المحاضرة والا في الكتابة، ونفسك جهاز يسجل كلام الدكتور، وأصلاً ما تعرف احد في القاعة وكلهم نفس وضعك، والدكتور الله يهديه سريع، واذا وجه لك سؤال يا ساتر يجيك مغص.
الإحباط: أول فصل دراسي هو أصعب فصل على الطالب لأنه بإختصار يتأقلم ببطىء على النظام الأكاديمي، قاعات! ومكاتب أعضاء هيئة التدريس؟ الكرسي الكرسي الخاص بالطالب غريب شكلة ويجيك سؤال غبي الأن اللي يكتب باليسار كيف وضعه؟ أين أضع كتبي؟ على الأرض!
الفشل: صناعة علاقة وزمالة من أول فصل صعبة، لذلك تحتاج وقت حتى تتأقلم وتجد ذلك الرفيق الصالح، لذلك تجلس وحيداً تتدبر في خلق الله وتكلم نفسك عادي، المهم يعجز عقلك أن يشكل فكرة أنك طالب جامعي
الصدمة: عند إقتراب الفصل الأول من الانتهاء تقترب الاختبارات وتخاوض أول أختبار أكاديمي في حياتك، ما تدري وش تذاكر كلام الدكتور والا قصة حياته لما كان طالب مبتعث والا الكتاب والا المذكرة، أنا مين وهو مين و فيه إيه؟ وتخبتر وتجيب العيد!
الإشعار: لما أختبرت كنت أنتظر النتيجة، وايه نعم أنا من جيل الاشعار الورقي ولا تكبرني الله يرضى عليك تراني لحقت على البوابة الأكاديمية وأنا اول دفعة جربتها، وصلني الإشعار الاخضر لدرجة دخت وما عرفت افتحه "اللي داخل يضيق الصدر فعلاً" ! على فكرة ما كان عندنا شيء أسمه مرشد أكاديمي.
النتيجة: معدل سيء للغاية، مقرر ظُلمنا فيه ورسبنا فيه وما ان في سند (مرشد أكاديمي) يقدر يساعدنا وياخذ حقنا، ومقررات نتائجها لا تُشرف، ما هذه البداية السيئة؟ كل شيء ذهب مهب الريح! ماذا حصل؟ جلست في الجامعة يوم كامل ضايق الحال ومتألم وشايل هم شيء واحد (أبوي) وش بقوله؟؟؟
قرار: بعد تفكير طويل قررت أترك الجامعة وأتنازل عن طموحي الصعب وأبحث لي عن شيء اسويه، مع أن أبوي ما سألني عن نتيجة أو معدل! إلا انني اتخذت قراري لأني ببساطة فاشل وما قدرت أكون مثل ما أبي، قرار الخروج لم يكون يخص محمد فقط بل كانت السفينة مليانه والاغلب مثلي!
فرصة: لما تروح تسأل عن إجراءات سحب الملف هنا يجيك شعور سيء، وخلال هالفترة اللي تشوف وش لك وش عليك، من هنا بدأت قصة جديدة ظهر فيها بطل جديد أعدلني عن رأيي وكان سبب تغيير حياتي، كان توه راجع من الخارج عضو هيئة تدريس جاي يطبق ما تعلمه بشغف...
1- كان يجدنا نجلس في الممرات وواضح علينا الإستسلام والانهزام، كان يحاول يدخل بيينا ولكن ما سمحنا له،وكان يبغى يأدي دور المرشد الأكاديمي، ولكن تم اتخاذ القرار ولا رجوع راح نطلع، إلا أنه قدر علينا بكوب كافي من د.كيف ههههههه لا تسألني كيف؟ القهوة سر من أسرار الحياة! وتكسر الحواجز
2- عشرة شباب جمعتهم مشكلة، ودكتور واحد هدفه واضح وصريح هؤلاء هم أبناء التخصص ولن أتنازل عنهم! حاول فينا بكل طاقته، جرب معنا كل شيء عشان نعدل عن فكرة الخروج، عن فكرة الانسحاب! عززنا بكل ما تعلمه حتى وصل به الحال أن يكون أب وأخ، يتصل يقول وينك فيه الان؟ والمحاضرة؟
3- قدر علينا انتصر، بعد ما جاوب على سؤالنا: هل نستسطيع رفع المعدل، أغلبنا بدينا من 2.57، قال أنتم قدها وراح نتساعد عشان نوصل بس المهم والاهم مع بعض، كلنا بيد بعض لا تتركون أحد من زملائكم، أسندوا بعض واللي يتراخى شدوه وأدعموه، أنتم كذا وكان يحرك يديه..
4- من هاللحظة تشكل عقد بينا وبينه عقد شخصي اننا راح نتغير ونستمر في الدراسة ونكمل ونرفع معدلاتنا ونكون الأفضل، راح نكون الأفضل، وبدأت طلباته الغريبة اللي مع غرابتها كانت جميلة لما يوزع كتب علينا مع أنه ما يدرسنا ولا مقرر إلا أنه كان يدرسنا تدريس شخصي
5- وجدت كتاب في مكتبتي كان منه والكتاب من خارج التخصص، قال محمد أقراء الفصل الاول من هالكتاب وراح نتناقش فيه نقاش حاد، تدرون ليش قال كذا؟ لأني كنت أعاني من مشكلة سوف أحدثكم عنها لاحقاً، ولكنه عالجني بدون ما أحس، وبديت أتحسن أكثر وأكثر... "خوف وقلق وتوتر"
6- كان محمد ما يتلكم وهو يطالع الاخرين ويناظر تحت وكان يتكلم ويده داخل جيبه من التوتر، وكانت الركب تلعب من الخوف لما يتكلم أمام الآخرين، وكان الدكتور يحاول يطلع محمد من هالحاله وما أنسى محمد طالعني محمد سو كذا محمد طلع يدك من جيبك وحرك يديك وأنت تتكلم، محمد وزع نظرك محمد محمد
هههه أسف طولت وطلعت عن المطلوب من القصة بس الحماس مدري أكمل والا لا لأنه سوا اشياء هالدكتور كبيرة جداً وصبر علي، أعذروني أكمل لاحقاً إذا تبون...
عدنا لإستكمال ما توقفنا عنده من قصة شاب بدأ بصعوبة وأستمر بحذر ووجد في طريقة نور أنار له درب من دروب الحياة "الحياة الأكاديمية"، نستكمل القصة على بركة الله...
7- كان محمد يتعلم من ذلك الدكتور وفي نفس الوقت كان يتضايق من شدة الدكتور ومدى قسوته، إلا أنه تحمل وتحمل حتى يرى نتيجة أفعال هذا الدكتور؟ ولماذا يقسوا عليه ويطلب منه القراءة والحديث والمناقشة والتطلع للامام مع تخيل سيناريوهات مستقبلية ووضع إحتمالات...
8- حتى سمعنا تلك الكلمة من عضو هيئة تدريس في القسم "مجموعتكم ما تمر على مقرر إلا تسحب معاها كل متعثر، وش سركم" لكل دكتور مجموعة يحب يدرسها يجد متعة في مخاطبتهم لأنه يعيش معاهم (التعايش التعليمي) ويمارس شغف التعليم، وليس فرض أنه لازم يقوم بدوره في تدريس المقرر ويأدي الأمانة وبس..
9- نفذنا العقد اللي بيينا وبين ذلك الدكتور، والأهم أننا كلنا مع بعض دون ترك أي أحد في الخلف، يا ننجح يا ننجح مافيها كلام!! ولكن جاء الكلام وجاء خوف منه بشكل ما تتصورونه، لما تستدعى للقسم ويكتبون أسمكم على باب القسم (الحضور حالا لرئيس القسم) في اسرع وقت ممكن..
10- هنا كل واحد يسأل الثاني أنتم مسوين شيء؟ أحد قايل شيء؟ يا شباب ما يصير أسمائنا كلنا تكتب كذا بدون سبب، عادي تكلموا لا ندخل وأحنى ما ندري وش السالفة؟ وبدأت الإتهامات توجه وحنى لسى ما دخلنا، يلا ندخل بس لا تصير معركة عند باب القسم!! المهم أسلحتكم معكم (أقصد الدفاتر ههههههههه)
11- دخلنا وقابلنا السكرتير قلنا مكتوب أسمنا برى، قال هذا أنتم؟ لعله بكلمته هذي جاب لنا أم الركب (اللي يعرف أم الركب يعرف عنها) خوف مو طبيعي، قال: ادخلوا ادخلوا الدكتور ينتظركم، ودخلنا وقال الدكتور نعم؟ قلنا أسمأنا مكتوبه برى، قال هذا أنتم؟؟؟ < لعل ردة فعله ضيقت صدورنا زود...
12- أول سؤال للدكتور بعد ما جلسوا خمسة والباقين واقفين: كيف سويتوها أبي أعرف لأول مره عدد كبير يسويها من زمان ما مر علينا هالعدد، ردة فعلنا تقول: وش مسوين وش السالفة، حتى تكلم أحد قال دكتور وش السالفة، ممكن تقول لنا وش حنى مسوين؟
13- قال لا تفكرون أن عملك فيه شيء بالعكس أنتم مجموعة ممتازة وعملتم عمل نتناقش فيه بمجلس القسم، أنت مجموعة كبيرة أنتهت من البكالوريوس في وقت قياسي! نبي نعرف كيف؟ العادة طالب اثنين والا ثلاثة بس عددكم! وأنتم الان خريجين هالفصل؟ < هنا كل واحد يطالع الثاني وش خريجين من بيتخرج لسى؟
14- قال: كمان الجميع يثني عليكم من الزملاء في تفاعلكم بالمحاضرات ومشاركاتكم والتكاليف، فعلاً أنتم مجموعة نفخر بها وعشان كذا أنا ارسل لكم كلمات الشكر والثناء من الزملاء على مجهوداتكم وأحب أقول لكم في مفاجأة في انتظاركم أول ما تتخرجون، لازم تكونون أفضل مثال لطلاب التخصص
15- طبعا انقطع التركيز لما قال تخرجتوا؟ كل واحد يطالع الثاني وش خلصنا بس كيف لسى وشلون؟ هل يعقل؟ كيف نعرف وش باقي؟ ايه صح حنى كنا ناخذ كل صيفي حسب طلب الدكتور هذاك من ثلاث سنوات وحنى ما انقطعنا عن الدراسة؟ خلصنا! معقول! درسنا كم الان ، صح حنى في التدريب الميداني الان !!!!!
16- المفاجأة أصعقتنا زيادة وهي عبارة عن (أفهمها أيها القارىء) وطلعنا من عند رئيس القسم ورحنا لمين؟ ايه لذا الدكتور اللي وقعنا معه العقد، يا حلو ابتاسمته من بعيد وحنى رايحين له، دكتور هل خلصنا؟ وكمان وش هالمفاجأة طيب واللي يقولون بتجلسون عاطلين مثل اللي تخرجوا؟ كيف وشلون؟ صدق؟
17- طالعنا الدكتور بكل تتواضع قال هذا جهدكم وهذا عملكم وأنا عند وعدي وكل واحد يتأكد من معدله (وفعلا معدلاتنا فوق الثلاثة وتحت الأربعة بكم شرطة) يعني بنتخرج بمعدل يرفع الرأس، والحمد لله ما استسلمنا الحمد لله ما سحبنا ملفاتنا الحمد لله إللي ارسل لنا الدكتور (فرحة لا توصف).
18- مع التخرج والفرحة التي لا توصف، فتحت لنا أبواب وليست فقط المفاجأة (التعليم وفي الرياض، الوظيفة الحكومية، الوظيفة بنظام العقد، حتى الشرقية رحنا لها عشان نتقهوى عندهم بس الرطوبة رجعتنا) والسبب؟ نفذنا اللي علينا وزيادة وصنعت الشخصية والمشروع وضع أساسه، وأساس متين وأعمدته مدعومة
19- في التعليم سألنا المعلم، وفي وظيفة العقد سألنا الخبرة، وفي الشرقية سألنا البحر وما رد علينا الله يهديه، وفي الوظيفة الحكومية قبلنا فيها لأن للأسف سمعنا كلمة من نفس الدكتور (ما يزال العقد ساري والمشروع لسى في بدايته والامر بيدكم إذا بتكملون والا لا) وش المشروع؟ "الماجستير" ايش
20- الزبدة من العشرة 3 كملوا وأنا أحد هؤلاء، الامر متعب لدرجة دراسة وعمل ومنزل، ولكن لسى المشروع ما يزال في طور التنفيذ، هل كملنا الماجستير؟ طبعا كملنا حنى عيال #علوم_المكتبات_والمعلومات وقدها وعندنا القدرة في استمرار المشروع، هل انتهى المشروع؟ لسى لازم ينجح مو عشانا عشانكم انتم!
النهاية 1: الدكتور مؤمن بربه والامانه اللي يقوم بها لذا صدق نفسه وقدراته، الطالب صدق الدكتور وآمن أن الحل وارد، إياك تسمح لأحد يقول لك أنت فاشل وراح تفشل وأنتهى كل شيء خلاص ما يمديك، نعم سمعت هالكلام ومن زملاء التخصص وأنك راح تكون عاطل عشر سنوات، ياخي هل لازم مستقبلي يكون مثلك؟
النهاية 2: دام في خطة (أ) راح يكون عندك (ب) و (ج) وغيرها، لا تتنازل بسرعة، ونعم عارف والله تعب وراح تتعب وتمل وتطفش من الضغط، راح تكون في أسوء حالاتك ولكن مافي شيء يدوم كل شيء راح ينتهي في يوم من الايام لذلك، راك يكون من الماضي وتتذكره، أصنع علاقاتك في المجال وأفهم نفسك وقدراتك
النهاية 3: أنا شاب سعودي ومعي شباب قدرنا نغير مستقبلنا والان كلنا في أعمالنا ونمارس حياتنا وفينا اللي لسى في المشروع وفي اللي وقف عند مرحلة، لكن المشروع لازم يكمل لو بس واحد يخلصه راح يفتح مجال لجميع المتخصصين أبواب جديدة في سوق العمل لأن المعلومات جمعناها باقي نعمل بها (المعرفة)
النهاية4: ما سألت نفسك ليش محمد الهلال حسابه جديد؟ من وين طلع؟ وليش 2020؟ راح نسلمكم المشروع وأنتم كملوا (كتب علينا الشقاء والعناء لأجل أمر يخدم المصلحة العامة) وأنتم مصلحة إيجابية يجب ان ترى النور مثل ما شفناه أنا وزملائي راح تشوفونه، المعرفة عندنا والان نعمل على #مشاركة_المعرفة
#سلسل_معلوماتية الماجستير، العمل والدراسة، كتابة الرسالة؟، وظائف الماضي والحاضر والمستقبل، هل هناك خطة جديدة؟، سلسلة خااااااااصة عن التصنيف السعودي للمهن والمسميات الجميلة التي تناولها عن التخصص، تبون سلسلة عن ذاك الدكتور؟ ترى إلى الان ما زال المشروع قائم وما يزال شاد علي هههههه.
وهنا يأتي دور رتبها، تفضل @Rattibha أتحفنا بجمال عملك...
جاري تحميل الاقتراحات...