بكرة هكلمكم في tips كده للعزل المنزلي واللي عملناه، بس حقيقي الموضوع صعب ومش سهل، الأدوية -حرفيًا- صعب الحصول عليها، ولو لاقيتها هتلاقيها مضاعفة الأسعار، مش مضاعفة لأ، أرقام خيالية. حافظوا على نفسكم، وحقيقي في مصر، الوقاية هيا كل العلاج.
صباح الخير، هقول tips سريعة كده خفيفة من غير أدوية عشان الناس سألتني كتير، وأنا ضد كتابة الأدوية بالشكل ده، وخصوصًا ان بروتوكول العلاج في كل حتة.
أول حاجة مهمة، لو جالك كورونا، أو suspected لازم لازم تبلغ كل اللي حواليك، وتبلغ اللي كنت مخالط لهم، وتبلغ صحابك والقريب والبعيد، ليه؟ عشان psychological support ده مهم جدًا جدًا، متعزلش نفسك لوحدك، كورونا مرض زي أي مرض تاني، مش عيب انك تُصاب به، العيب انك تخفيه.
تاني وأهم حاجة: DONT PANIC. متخافش، ان شاء الله كله هيعدي، وأي شيء تقدر تتعامل معاه، ولو خفت هتسوء الموضوع، طالما أعراضك كلها بسيطة ومفيش ضيق تنفس، عزل منزلي ومتقلقش.
مهم جدًا تختار الأوضة اللي هتعزل نفسك فيها، أوضة بيدخلها الشمس، تهوية جيدة، ولو قدرت تستخدم حمام منفصل يبقى أفضل -وده صعب مش متاح للناس كلها- في حال استخدام نفس الحمام في البيت، هتعقم وراك كل حاجة بنفسك بكحول، واللي يدخل وراك يدخل بعد ساعة أو اتنين ويعقم وراك.
مهم جدًا نقطة الحركة في البيت لو عازل نفسك في بيت معاك أهلك أو زوجتك أو ولادك أو أخوك، الحركة بحساب، هتتحرك من أوضتك للحمام، يبقى تبلغهم قبلها، يدخلوا أوضهم وتتحرك، متحاولش تلمس حاجة مش محتاج لها، مش لازم.
قلل حركتك في البيت قدر المستطاع، وخليها في مواعيد ثابتة عشان متتعبش الناس معاك، يعني تقدر تثبت مواعيد الحمام، البيت يصحى، يدخل الحمام، وانت بعده أو العكس، على حسب ظروف كل بيت.
أوضتك بقى، كل حاجة ليك هتستعملها تبقى disposable يعني تستخدمها وتترمي، أطباق أكل، كبايات، غيرها، يبقى عندك في الأوضة حاجاتك الشخصية عشان محدش يضطر من البيت يلمسها أو يتعامل معاك.
يبقى عندك سوايل كتير، اشرب سوايل سخنة كتير، -بجانب علاجك اللي بمتابعة طبيب- ركز في علاجك كويس جدًا، متزهقش، متستعجلش، الأمور تتاخد واحدة واحدة وهتعدي ان شاء الله.
مهم جدًا صحتك النفسية، ابعد عن أي حاجة توترك، كلم صحابك، زمايلك، فيديو كول، اتشقلب عشان تبقى نفسيًا كويس، كل واحد بطريقته، اقرا، يومك هيعدي سريعًا.
مهم جدًا الناس اللي بتتعامل مع مريض الكورونا سواء أهل أو أصدقاء، متتحسسهوش انه عبء، تعاملوا عادي، مع أخذ كل الاحتياطات، لو هيبقى في contact يبقى هو لابس ماسك وانت لابس ماسك، اضحكوا وتعاملوا مع الموضوع بجدية، وببساطة في نفس الوقت، وهيعدي ان شاء الله.
أي مرض، جزء كبير منه نفسي، متخافش، ومتستهترش، خذ حذرك، وفي نفس الوقت يومك عادي، قبل ما تُصاب كنت بتقرأ؟ بتذاكر؟ بتتفرج على حاجة؟ كمل زي ما انت.
في حاجات خفيفة بتهون على اللي عازل نفسه، صاحبك يكلمك، زميلك يقولك انا تحت الشباك بص لي، جارك ينادي عليك يقولك مش عايزة حاجة؟ فيديو كول يفرق، قبل كده بقى: يقين بربنا وعفوه ولطفه وكرمه وشفاءه. اليقين التام.
ولو في كلمة تلخص كل ده: متتخضوش، ربنا يحفظ الجميع ويعافيكم ويحفظكم، ويعدي الفترة الصعبة دي على خير.
بمناسبة متتخضوش: مينفعش تكلم مريض كورونا وانت صوتك خايف، أو بتعيط عليه، ده أكتر حاجة مدمرة ليه، لا مكالمة زي ملهاش لازمة، النفسية مهمة جدًا جدًا، وبالنسبة لك كمريض، نام كويس جدًا جدًا، نام واشبع نوم زي ما بيقولوا، اصحى اعمل اي حركة، امشي في الأوضة، الرياضة مهمة.
زمايلي كانوا بيكملوني فيديو كول كل يوم حرفيًا، كأننا عادي مفيش حاجة، وبنفتكر أيام سوداء في النبطشيات ونضحك 😂
مهم جدًا كمريض، متكلمش حد تاني تسأله عن أعراض، يعني فلان أُصيب، كلمه اطمن عليه فقط، متكلموش تسأله عن أعراض، الفيروس لعين ملوش كاتلوج، كل واحد مختلف -حرفيًا- عن التاني، ناس أشعتها صعبة جدًا، وأعراضها خفيفة، والعكس.
تابع نفسك كويس، تابع أعراضك، بتتحسن؟ بتقل؟ في أعراض جديدة بتظهر؟ حرارة؟ كل ده تابعه، وربنا يحفط الجميع :)
جاري تحميل الاقتراحات...