رتبها

[#ثريد] المشرحة:
قصة واقعية يرويها خريج بكلية الطب. كانت رغبته ان يتخصص في علم التشريح. ولكن؟

-في البداية السلام عليكم خليني ارمز لاسمي ب (محمد) حبيت اشارك الناس بقصتي لانها افظع حاجة كان مرت علي ف حياتي وما اظن تاني اخاف بعد الخوف العشتو ف الفترة ديك.
⭕ارجع فوق اعمل رتويت واعمل لايك للثريد قبل ما تقرى زاتو🙂🔥♥️⭕

اتخرجت من كلية الطب جامعه بحري وكان هدفي انو اتخصص ف علم التشريح لانو مجال نادر في السودان وعدد الأخصائيين فيهو يتعدوا ب اصابع اليد وانا اصلا ماكنت بخاف من جو المشرحة والجثث.

عدت الايام واشتغلت الامتياز وبديت في التخصص وكنت كل يوم بستفيد وبتدرب وبتعلم اكثر واكثر لحدي ما جا اليوم الاتغيرت فيهو حياتي.

في يوم من الايام جات ٣ جثث المشرحة وكان علي انو اشرح واحدة فيهم كانت الجثة ف الكيس ف لمن ختيتا ف النقالة ووديتا ف الطاولة حقت التشريح وفتحت الكيس جاني اشمئزاز من المنظر الشفتو!

كانت انثى في منتصف العشرينيات من العمر طولها ١٦٥ ومجهولة.
-والحاجة السببت لي الخوفة ف البداية انو وشها مافي!
مشوه زي ما تكون بمشرط عملو دايرة ف وشها وشالوهو في الجمجمه بس والعين.

بديت اشتغل وبديت اشرح وكانت آثار التعذيب مالية جسمها كلو ضربات وجروح. وواصلت لحدي وقت طويل من الليل.
زي الساعه ١٢ كنت انا وفي عامل برة بس الموجودين ف المشرحة وانا بشتغل ومركز ف جهه البطن والمعدة اتلفت لوشها وانا هنا اتخلعت.!!

انا متاكد اول ما بديت التشريح عيونا كانت بتعاين قدام.
-لمن اتلفت لقيت عيونا بتعاين لي تحت!!! والله زي القعد تتفرج فيني وانا بشرح فيها! انا من الخلعة نطيت لي ورا وضربت النقالة الكان جبت فيها الجثة ووقعت جا الحرس البرا سألني قالي يازول مالك؟ انا بخلعة كدة قلت لالا مافي شي..

انا قلت يمكن انا تعبان من الشغل الكتير ف بديت اهضرب احسن لي ارجع البيت وارتاح وبكرة اكمل. رجعت الجثة جوة الكيس وختيتا ف الثلاجة. بعد ما دخلتها جوة الثلاجة وقفلتها لمن بعدت منها مسافة متر كدة حسيت بكركبة جاية من التلاجة زي كانو البت اتحركت جوة!!

رجعت فتحت التلاجه عايز اشوف في شنو بس مالاحظت شي غريب ف البداية لكن لمن ركزت لقيت انو الكيس حق الجثة مفتوح من جهة الوش؟ انا هنا بقيت مافاهم هل في حاجة غريبة او انو الإرهاق عمل لي تخيلات انا كنت محتار شديد! قفلت الكيس وقفلت التلاجه وقلت خلاص كفاية الليلة( وما اكذب قلبي كان بدق.).

ركبت عربيتي ورجعت البيت كنت تعبان شديد لدرجة ماقادر افتح عيوني على الآخر امي قالت لي خش استحمى وانا مجهزة ليك اكل ف المطبخ قلت ليها كويس.

خشيت الحمام وقلعت قميصي وبقيت واقف قدام المراية الجمب الحوض بعاين في وشي وعيوني واضح فيها التعب دنقرت على الماسورة وشلت موية كتيرة وغسلت وشي فجاة كدة ولسة عيوني مليانة موية الرؤية ما واضحه زي اللمحت في المراية في بت وراي! انا من الخلعة اتلفت وراي ما لقيت شي.!

استحميت وسريع سريع وطلعت اكلت ورقدت فغرفتي.
بليل كدة انا حسيت بشي قعد جمبي بطرف السرير وينادي فيني كان صوت بت حنين شديد لدرجه انو انا بقيت مستغرب فتحت عيوني وعاينت وشفت بت جميلة بتعاين لي وتتبسم قمت على حيلي من السرير وبستغراب قلت ليها انتي منو؟...

ما ردت ولسة بتعاين لي وبتتبسم زي الماسكه الضحكة فجاة كدة الصوت الحنين اتغير لصوت كدا مخييف فيهو صدى وماقريب لاصوات البشر كلو كلو قالت لي عايزة اشيل وشك ؟؟؟فجاة حسيت بالم كدة على شكل دائرة ف وشي لمست جبهتي وعاينت في يدي لقيت في دم؟؟؟

لقيت دم انا طيرت عيوني وقلبي وقف عايز اقرا ايات لكن والله طارت لي اي حاجة.. عايز اعاين ليها اقوليها عملتي شنو شفت المنظر الصدمني لقيتا بدون وش؟؟؛ نفسسس شكل الجثة الفي المشرحة بس زي كانو هسي اتقطع!!بيكب دم وهي بتضحك بصوت مخيف وقامت ونطت فيني خنقتني وكانت قوية شديد.

وانا واقع ف الارض وهي بتخنق فيني بقوة ما عادية حقت بشر الدم النازل من وشي لمن حسيت بيهو خشا عيوني شعور بشع شديد فجاة لقيت نفسي قمت من السرير مخلوع ونفسي قايم شديد وبديت اقح قلت الحمد لله طلعت بحلم قمت مشيت خشيت الحمام غسلت وشي لكن لمن عاينت لروحي ف المراية لقيت في شلخة ف جبهتي؟.

كانت خلاص الدنيا بقت صباح استحميت وصليت ولبست هدومي ومشيت الشغل قلت الا اعرف قصة البت دي شنو سالت الحرس عن الجثث الجات قالي انو جثة البت لقوها في بيت ومرسوم حوالينا دائرة في نصها نجمة وشموع ومالقو ليها اهل ولا زول اتعرف عليها فا الناس راجية نتايج التشريح للتحقيق..

استغربت من كلامو ونجمه شنو وكلام فاضي شنو دا كلام افلام وما اقتنعت بالقالو كلو كلو لكن مستحيل الهضربة الخصلت لي امس دي تكون ساي (انا بنفي الحاصل من الخوف) دخلت جوة المشرحة اول مرة اخش وانا خايف للدرجة دي ماشي خطوة خطوة على الثلاجه..

فتحت الثلاجة وطلعت الجثة وكانت بتعاين لي قدام ما تحت قلت ماااحنك الليلة الا اشوف النهاية شنو.. طلعت الجثة وختيتا ف النقالة حسيت زي الجثة اتحركت وسهلت لي النقل قلت ما حنك والله الليلة الا اكملا معاها لآخر شي.

لمن بديت اشرح ف الرجلين محلة الفخذ لانو كان في اثار تعذيب بمسامير عاينت فوشها لقيت عيونا بتعاين لي!!
ختيت المشرط وغمضت عيوني وقريت المعوذات ولقطت الشجاعه العندي كلها وفتحت عيني لقيتا بتعاين لي في عيوني حتى بعد ما بعدت منها..

فجاة بقيت سامع نبضات قلب؟؟. ونبضات سريعه زي كانو خايفة من شي...فجاة اتكلمت قالت( اخيرا جو. ح ارتاح) ... هم منو وفي شنو وانتي منو وانتي بتتكلمي كيف وانتي ميته؟؟؟؟ انا مخي ضرب فجأة الكهربا قطعت بقيت ماشايف شي سمعت زي الفي حاجة انطعنت جمبي؟ جات الكهربا اتخلعتتتت قربت اجن انا.

بقيت واقع ف الارض من الحاجة الحصلت قدامي دي مصدوم!
-فجاة بعد ما الكهربا جات لقيت مسمارين مغروسات ف عيون البت ووتد بتاع خشب ف قلبها؟ جو كيف؟؟ جو من وين؟؟؟! الناس جو لقوني واقع ف الارض وماسك رجولي.. ودوني مكتب وجابو لي موية وعصير وبللو لي راسي بموية....

من الوقت داك قدمت استقالتي وغيرت تخصصي والحمد لله انا هسي نائب اخصائي جراحة قلب واوعية دموية وسافرت برا البلد بس لسة القصة دي ماعايزة تفارقني ولا منظر البت ماعايز يروح من ذاكرتي...

انتهى الثريد ياريت يكون عجبكم💓🙏
.
لو ماعملت لايك امشي فوق اعمل لايك ورتويت🌚
.
لو عايز ثريدات زيادة وزيادة اعمل فولو🙏♥️🔥
.
وشكرا ♥️🔥

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة