يوم السبت ٣٠/٥ كنت نبطشي وانا في العمليات حسيت ان سخن شوية ومصدع، فقلت هنزل أريح شوية وغالبًا شوية برد والأمور هتتظبط، نزلت سكن الأطباء أحاول أنام مفيش نوم، ووجع في الجسم كله وتكسير وحرارة عالية.
جالي الأخصائي قالي عندنا حالة كبيرة لو سمحت عايزين نحضّرها وكده، قلت له طيب أنا بس تعبان شوية وهنزل أعمل صورة دم وأشعة مقطعية على الصدر، ونرلت عملتهم والاتنين طلع مفيهمش حاجة وكويسين، وأنا بردو تعبان ومش شايف قدامي، قلت لنفسي خلاص نجمد كده نكمل النبطشية،
طلبت من مدير التمريض قلت له لو سمحت أنا عايز أعمل مسحة عشان أنا بدأ عندي أعراض، والمقطعية مفيهاش حاجة، قالي طيب يادكتور ممكن نسحبها بكرة عشان نطلبها، قلت له بكرة امتى؟ قالي الساعة ١٠ صباحًا ان شاء الله، قلت ماشي، كملت النبطشية وأنا مرهق وعندي مرضى في الرعاية وسهران جنبهم.
تاني يوم، السخونية زي ماهو، والتعب بيزيد، الساعة ١٠ نزلت الطواريء، هنعمل المسحة ياجماعة؟ لأ الساعة ١٢ تنزلنا يادكتور، نزلت من ١٢ للساعة ٢ مفيش حاجة، أكلم نايب المدير يقولي مفيش مسحات، روح اعمل مسحة في مستشفى زايد العام! قلت له لأ مش هعمل مفروض يتعمل هنا، قالي مفيش دلوقتي.
أخدت نفسي وانا تعبان ومشيت، روحت البيت وقررت أعزل نفسي وأتابع نفسي والأعراض، تاني يوم حرارة وهمدان في الجسم، تالت يوم بدأت أخد حاجات للحرارة، وبدأت أعراض تانية زي فقدان حاسة الشم والتذوق تزيد.
يوم الأربعاء كلمت مدير التمريض تاني، قلت له دلوقتي أنا عندي كل الأعراض وكده تهريج، أنا هاجي بكرة عشان أعمل مسحة، وقررت أروح الخميس، وأنا رايح أخدت رأيي @b3boly أخويا قالي عيد المقطعية وصورة الدم.
وصلت وأول ما دخلت سحبت صورة الدم، ودخلت عملت الأشعة المقطعية وانتظرت كم ساعة عشان المسحة، المقطعية كان فيها groubd glass patches بتعت الكوفيد ١٩ ومع الأعراض المستمرة أنا كده عندي كورونا، نعمل مسحة؟ أخدنا المسحة.
النائب الاداري في المستشفى وهو أخصائي الباطنة بتاع اليوم شاف الأشعة قالي انت مفروض تتحجز، أخدت رأيي محمد أخويا نفس الرأي، ساعتها معرفتش أفكر، خصوصًا اني عايش مع أخويا وهو طالع من MI وhigh risk انه يبقى infected مني.
قلت له ماشي نتحجز، عشان لازم monitor for Saturation -نسبة الأكسجين في الدم- ، النايب الأداري -وأخصائي الباطنة- قالي هنكلم مدير المستشفى عشان "مفروض ان كل مستشفى خصصت دور عزل لأطبائها- قالي هكلم لك المدير، قلت له في أدوية متوفرة فوق؟ قالي لأ الأدوية المهمة هتجيبها انت.
كلمت نايب المدير قالي حرفيًا: مفيش حجز قبل نتيجة المسحة ما تطلع. مردتش عليه، وكلمت زميلي أخصائي الباطنة، قالي بص انت بالأشعة دي لازم تتحجز، قلت له ها؟ وبعدين؟؟؟ قالي مدير المستشفى رد عليا وقالي حرفيًا: معنديش عزل للأطباء، وكلم طواريء الوزارة أو ١٠٥ معنديش حجز.
ساعتها أنا معرفتش أعمل ايه، طب أطلع أتخانق معاه ولا أعمل ايه، كلمت أخويا محمد @b3boly قلت له ايه رأيك، خصوصًا ان حتى لو اتحجزت مش هيبقى في monitor ولا أدوية، قالي خلاص تعالى، هات أشعتك وتعالى.
مش دي المشكلة، مدير المستشفى مش بس رفض حجز طبيب مصاب عنده، وقال ان معندوش عزل، لأ وكمان رفض اني أخد أجازة، كلمت أخصائي الباطنة بقوله طب والأجازة؟ رده: مدير المستشفى قال ان مفيش أكتر من ٤٨ ساعة اجازة، وانت مع نفسك، أو من أجازاتك.
أنا حقيقي، معرفتش أعلّق، عشان لو علقت كانت هتبقى ألفاظ يعاقب عليها القانون، قلت له طيب، أنا همشي، وهعزل نفسي، وهبلغ مرضي، وشكرًا جزيلًا ليكم.
أنا يوم الخميس ده كان أسوء يوم في حياتي المهنية، تخيل، اُصبت في مستشفى بتعتك، ومدير المستشفى رفض يحجزك، ورفض يديك أجازة، بدون أدنى مهنية، أو حتى فهم للطب، المهم رحعت، واتفقت مع محمد أتعزل في البيت، وكلي خوف على محمد مش عليا عشان هو high risk، بالمناسبة، محمد كان نبطشي يومها.
كلمني تاني وأنا راجع، قالي أنا بوفرلك العلاج، وشوية وهاجيلك عقبال ما حد يجيي يستلم مكاني في الرعاية، وبعدها بكم ساعة جالي البيت وبدأنا العلاج.
على الساعة ٩ كده، قررت أكلم النقابة، دكتورة منى مينا مبتردش، دكتور ايهاب مبيردش، قلت مش مشكلة، أركز في علاجي بس ونشوف هنعمل ايه، كذا أستاذ ليا يشوف الأشعة يقولي انت كويس؟ انت ازاي متحجزتش!!!
دكتورة منى تاني يوم الجمعة، لاقيتها بتكلمني الساعة ٨ ص، بتقولي انت كلمتني البارح، حكيت لها بالتفصيل كل ده، قالت لي نصيحتي ليك تعزل تفسك في البيت، وتكمل علاج مع اخوك، وسيبهم دول بيعكوا، ده غير ان العزل فيه مهازل، وحالات mild بتذخل على حالات severe وممكن تتعب أكتر.
ليلة الجمعة والسبت قعدت أفكر، وفي الاخر استقريت على اني أكمل في البيت، ومحمد يتابعني -رغم انه high risk- والحمد لله حتى الآن الأمور مستقرة وكويسة.
ده الأسبوع التالت ليّ من ظهور الأعراض، واليوم العاشر من سحب PCR ، أنا حتى الآن المسحة لسه مظهرتش، وبكلم مدير التمريض بشكل شبه يومي، الرد ان في مشكلة في المعامل المركزية، وان مفيش مسحة دلوقتي بتظهر قبل خمس أيام.
السؤال دلوقتي: لو أنا مش دكتور وفاهم وعارف أشخص نفسي، وأخويا طبيب بيعالجني وقدرنا نجيب الأدوية كنا هنعمل ايه؟ والمريض العادي يعمل ايه؟
حاجة أخيرة، أخصائي الباطنة كلمني وقالي كلم الوزارة او ١٠٥ كده، قلت أكلمهم -وأنا عارف النتيجة مسبقاً- رد عليا ولد كده ابن حلال مؤدب، أخد بياناتي، وقالي ان شاء الله بعد ساعة هيكلمك دكتور، وأنا منتظر من ساعتها الدكتور ده يكلمني، أو الولد D:
جاري تحميل الاقتراحات...