رتبها

تعرف ايه عن مشكلة سد النهضة ؟
——
شوف الـ Thread

نبذة تاريخية عن العداء بين مصر و أثيوبيا
—
حصل عداء في عصر الخديوي اسماعيل بين مصر و أثيوبيا ، الخديوي اسماعيل بعت جيش لإحتلال أثيوبيا ، المهم انتهت معركة جوندت بهزيمة مصر و فوز أثيويبا
——
أثيوبيا عندها أعلى وسام عسكري في البلد اسمه [ جوندت ] 🙄

- في بداية عهد جمال عبد الناصر قبل التحول للإتحاد السوفيتي كان علاقته كويسه مع الامبراطور هالا سيلاسي ، بسبب ان اثيوبيا كانت تتبع الكنيسة المصرية ،بعد تحول عبد الناصر للاتحاد السوفيتي بدأت العلاقات تتوتر بسبب تدخل أمريكا في دعم أثيوبيا ، وقتها رفض الامبراطور توقيع اتفاقيات النيل

- بعدها بدا عبد الناصر في دعم حركات التحرر في افريقيا ، زي الجزائر و الكونغو و دعم حركات انفصاليه في أريتريا و الصومال ضد اثيوبيا و ده من أسباب توتر العلاقات الدائم

- بعد حرب ٧٣ بدأ السادات في التوجه لأمريكا و ساب الاتحاد السوفيتي ، بعدها في ١٩٧٥ يموت إمبراطور اثيوبيا و تتحول اثيوبيا للإتحاد السوفيتي بعد ما كانت مع أمريكا ، وقتها كانت اتفاقيات السلام بين مصر و الكيان الصهيوني ، عشان السادات يسرع من مفاوضات السلام دخل حلف السفاري

- في حلف السفاري ده عبارة عن مجموعة دول تحت رعاية أمريكا لمحاربة الشيوعية ، اللي كانت وقتها في أثيوبيا 😂
- فيبدأ صراع جديد بين مصر و أثيوبيا ، بمد مصر السلاح للصومال لمحاربة إثيوبيا ، و مصر وقتها كانت عامل مهم في دخول الصومال لجامعه الدول العربية

- بعدها يبدأ عصر مبارك و محاولة إغتياله في أديس أبابا عاصمة أثيوبيا و يبدأ بعدها يهمل العلاقات بين مصر و أثيوبيا ، لحد ما جت أثيوبيا في ٢٠١١ أعلنت عن بناء السد

- ملخص الأحداث ، إن مصر و اثيوبيا بينهم عداء تاريخي و مصر بتدفع تمن سياساتها في أفريقيا الفترة دي ، خصوصاً بعد نمو و نهضة دول أفريقيا ، في أثيوبيا هما بيكرهوك نفس كرهك لإسرائيل لأنك في نظرهم دولة استعماريه و دولة ساعدت الدول زي الصومال و ارتريا في محاربتها

- تعالى نشوف توزيع المياه
—
من حدود السودان كمية المياة اللي بتكون في النيل حوالي ٩٤ مليار متر مكعب
، منهم ١١ مليار متر بيتبخر في السودان ، و ١٠ مليار في بحيرة ناصر ، يتبقى ١٨ مليار للسودان و ٥٥ لمصر

- مصر لها مصادر مائية تانية غير النيل ، حوالي ١٤ مليار من إعادة هدوير الصرف الزراعي و بيستخدم في الزراعه ، حوالي ٧ مليار صرف صناعي ، حوالي ٦ مليار مياه جوفيه ، مليار مطر ، مليار اادة تدوير الصرف الصحي

- أثيوبيا بينزل فيها مطر بمعدل ٩٠٠ مليار متر مكعب سنوياً يعني قد نهر النيل ١٠ مرات ، لكن أغلبهم بيضيع في الارض و التبخير ، في اثيوبيا ٣ روافد بتمد نهر النيل بتمثل ٨٥٪ من مياه النيل
—
١- النيل الازرق اللي هيتبي عليه السد ٥٤٪ من النيل
٢- فرع عبرا : ١٣٪ من النيل
٣-فرع الصباط : ١٤ ٪

- في ٢٠٠٨ كان السد عباره عن سد صغير بهدف توليد الكهربا ، السد بتاع الكهربا مختلف عن السدود الزراعية بمعنى ان سد الكهربا المياه بتعدي فيه عشان يولد الكهربا و بعدها يمشي في مساره عادي ، لكن السد الزراعي بيحول المياه لترع عشان الزراعه

- بعد ٢٠١١ و ثورة يناير مصر كانت مشغوله في الشؤون الداخلية ده اللي خلى اثيوبيا تطور فكرة السد من سد صغير لسد عملاق لتولد الكهربا ، الفكرة في ان السد العملاق بيحتاج لبحيره عملاقه وراه ، و ده سبب الخلاف الرئيسي

- مصر بتقول لإثيوبيا إن ممكن تولدوا كهربا بسد صغير و بكفاءه أعلى من السد الكبير ده عشان البحيرة اللي وراه تكون صغيره و متأثرش علي حصة مصر من النيل
- ترد أثيوبيا ان النيل بتاعنا و المياه بتاعتنا و براحتنا

- مصر بتقول لإثيوبيا ان مدة ملئ البحيرة تكون من ٥-٧ سنين
- اثيوبيا بتقول لمصر هما سنتين
———
يحصل مفاوضات وصلوا لمدة من ٣لـ ٥ سنين تقريباً

- عشان تفهم عمل سد الكهربا ، ان المياه بتوصل لارتفاع معين عشان تحرك التوربينات وبعدها تعدي تاني و ترجع في نفس المسار و تدخل النيل ، بس المهم تكون في مستوي معين عشان يحرك التوربينات

تاني مشكلة و هي حصة مصر من النيل في مدة ملئ البحيرة
—
- مصر قالت ان عايزه يوصل من ٤٠ لـ ٤٥ مليار بدل ٥٥ مليار
- اثيوبيا بتقول هما ٣٠ مليار بس
—
يحصل مفاوضات و توصل لانهم يتفقوا علي ٣٧ مليار

طب هنجييب المياة الباقيه منين ؟
—
من بحيرة ناصر ، بحيرة ناصر اكبر بحيرة صناعية في العالم حوالي ١٦٤ مليار متر مكعب ، و أكبر حوالي ٣ مرات من بحيرة سد النهضة ، فالعجز خلال سنوات ملئ البحيرة هتسده من مياه بحيره ناصر

- بحيرة سد النهضة سعتها حوالي ٧٠ مليار متر مكعب ، الطبيعي عشان تولد كهرباء لازم يتم تفريغها وقت الفيضان عشان تتولد الكهربا و الا مش هيكون لها لازمة ، المهم ان الـ ٥٠ مليار اللي كانوا بيجوا لمصر بدل ما هيجوا في ٤ شهور ، هيجوا علي السنة كلها

- في فبراير اللي فات في المفاوضات برعاية امريكا بعد التوسط لحل وسط انه يكون حصة مصر و السودان طول فترة ملئ الخزان ٣٧ مليار ، اثيوبيا قالت بس ده يكون علي طول مش في فترة ملئ الخزان بس ، و ده طبعا اترفض من مصر

- تدخلت امريكا و قالت نتفاوض الاول علي مرحلة مرحلة و خلينا نتفاوض علي ملئ الخزان الاول ، اثيوبيا رفضت الحضور و التوقيع و اعلنت انه هيتم البدأ في ملئ الخزان في ١ يوليو ٢٠٢٠

- حسب التقارير اللي طلعت من الشركات الاجنبيه المسؤولة عن مشكلة السد ، قالوا ان كل المشاكل ممكن تتحل بسهوله ، بس الفكرة في بعض الاسباب
١- العداء التاريخي بين مصر و اثيوبيا و حالة عدم ثقة من الطرفين

٢- الحشد الشعبي في اثيوبيا حول السد ، سد النهضة في البداية كان اسمه سد الحدود ، بعدها تم تغيير اسمه لأسم سد النهضة او سد الالفية الجديدة و تم تمويل السد من الشعب الاثيوبي بمبلغ 4.7 مليار دولار في حين ان ميزانيه اثيوبيا ٢٠ مليار ، يعني حوالي ربع ميزانيه الدولة

- الحشد الشعبي ده اللي خلى مسألة الرجوع في أي قرار من قرارات السد أمر مستحيل ، خصوصاً مع الانتخابات المقبلة في اثيوبيا و رئيس الوزراء بيواجه منافسه فبالتالي الامر صعب و لازم يلتزم بكل وعوده

- مصر صعبت تمويل السد من جهات اجنبيه ، الامر ده خلى مشروع السد مشروع قومي
- اثيوبيا بلد بتعاني من الانقسامات العرقية و الدينية و تم حشد كل الطوائف دي حول السد باعتباره مسأله نهضة و كرامة لإثيوبيا

٣- مصالح و جهات اجنبيه
—
الموضوع ده معقد شويه بس هحاول ابسطهالك
——
من مصالح كل دولة و كل شركة ان الازمة دي تطول لان ده معناه شغل لهم و مصالح ازاي ؟
—
- ده هيخلي مثلا مصر تفكر في بناء مصادر اخرى للماء زي محطات التحلية ، فهيخلي شركات تشتغل في المجال ده

- هيخلي مصر تفكر في الحل العسكري ، ده معناه ان مصر هتطلب سلاح معين عشان تضرب السد ، زي مثلاً صفقة السوخوي المتوقعه من روسيا
- هيخلي اثيوبيا تفكر في الدفاع ضد هجمة مصر ، هيخليها تشتري سلاح ، زي ما اشترت منظومة دفاع جوي من اسرائيل نشرتها حول السد

- اثيوبيا أعلنت عزمها عن بناء سدود أخرى ، ده هيخلي الشركات المسؤولة عن السدود و الاستثمارات تزيد بشكل كبير في اثيوبيا و ده هيخلي الشركات و المستثنرين يضغطوا علي حكومات بلادهم انها تضغط علي مصر

٤- خوف مصر بعد التنمية في دول افريقيا ان دول المنبع تبني سدود طالما اثيوبيا بنت سد و ده هيخلي الامر بعد كدا اكتر صعوبه ، و ده اللي حصل فعلاً بعد عزم اثيوبيا بناء اكتر من سد جديد و وجود نوايا في دول المنبع انها تبني سدود بالاضافه زي ما قولنا لـ المصالح الاجنبيه

٥- كدا كدا حصة مصر الاساسية من النيل مش هتكفي ، لأن في حسب التوقعات في سنة ٢٠٥٠ عدد سكان مصر هيوصل لـ ١٧٥ مليون ، بالتالي لازم مصر تفكر في حلول بديلة و اضافيه ، و بالتالي الحكومة مستحيل هتسكت علي الحقوق المائية لانها مستحيل تقف قدام شعب مش لاقي مياه

٦- رفض الحكومة الاثيوبيه الاتفاقات السابقه المخصوصة لحصة المياة و تعليلهم بكدا ان الاتفاقات دي مكنتش من الحكومة الاثيوبية نفسها ، كانت من الاحتلال الايطالي و بعده البريطاني و بالتالي تعليل اثويبيا ده ان الاتفاقات مكنتش مسؤولة عنها

٧- حسب كلام الابحاث و المفوضيين ، فكان كلامهم ان مصر كل شوية تندهش و كانت متعشمة جامد 😂😂
و تفسيرهم ان مصر بقالها ٩ سنين من ٢٠١١ في المفاوضات دي و مخرجتش بفايده واحدة و كل شوية تندهش من الموقف الاثيوبي

- ايه خيارات مصر ؟
—
هرتب الخيارات من الأحسن للاوحش
—
١- البحث عن حلول بديلة لمشكلة المياه و ده اللي اعلن عنه وزير الري عن وحود استراتيجية مصر ٢٠٥٠ بالحبث عن بدائل زي محطات التحلية و استخدام تنكلوجيات احدث في الزراعه و ده هيكلف مصر حوالي ٥٠ مليار دولار

- الحل ده كدا كدا لابد منه حتى لو مشكلة سد النهضة مش موجوده ، خصوصاً مع زيادة عدد السكان لـ ١٧٠ مليون خلال ٢٠٥٠ ، لكن طبعا مستحيل يتم في فترة زمنيه صغيره بسبب التكلفة الكبيره و بالتالي وضعت استراتيجة لحد ٢٠٥٠

٢- الضغوط الدولية
—
ان مصر تستخدم الضغوط الدولية علي اثيوبيا لمحاولة ان مصر تنفذ شروطها في سد النهضة ، الموضوع ده صعب جدا زي ما قولنا لعدة أسباب
—
١- الحشد الشعبي الكبير في اثيوبيا للسد و مستحيل ان مسؤول يخاطر بمنصبه و ده اللي خلى حل المشكلة اصلا معقد

٢- كل حاجة لها تمن ، الضغوط الدولية اللي هيتم تنفيذها لازم مقابل لها ، و ده اللي حصل في الموقف الامريكي ، ترامب وافق ان يتدخل و يضغط علي اثيوبيا مقابل ان مصر تتمنع من اي تسليح من روسيا
- الصين هيكون لها طلبات مقابل الضغط
- السودان نفس الكلام

- كل حل سياسي و ضغط سياسي من الدول لازم مقابل له ، و اللي بيزود ده صعوبه هو المصالح نفسها ، زي ما قولنا في حالة امريكا و ده طلب صعب ، الصين و الدول التانيه اكيد هتطلب طلبات صعبة مقابل ده

- ده غير ان زي ما قولنا مصالح اسرائيل في سد النهضة ، ده اللي خلى هناك ضغوط من الامريكان و الاسرائلين علي مصر بسبب مشكلة السلام و صفقة القرن ، و ان مصر ههتتازل عن ايه من مواقفها مقابل الضغوط ، خصوصا زي ما قولنا مصالح اسرائيل في المنطقة

٣- الحل العسكري
—
و ده تم التلميح له و اعتقد ان ده هيكون الحل الأخير
—
١- بناء قاعدة برنيس الجوية و البحرية في حلايب علي حدود مصر الجنوبية
٢- طلعات تدريبة للمقاتلات المصرية للتزود في الوقود جوا
٣- عزم مصر شراء مقاتلات هجومية زي السوخوي ٣٥ و التايفون الاوربية

٤- اخبار بخصوص موافقة جنوب السودان علي انشاء قاعدة عسكرية مصرية علي بعد ٢٠٠ كم من سد النهضة لكن تم نفيها
٥- نشر منظومات دفاع حوي صاروخي حول سد النهضة

- المشاكل بخصوص الحل العسكري هتتمثل في
—
١- حشد الرأي العام العالمي و الافريقي و اقناع دول حوض النيل ان مصر بتدافع عن حقوقها ، خصوصاً بعد تخوف مصر من ان دول حوض النيل يكون سد النصهة دافع لبناء سدود في دولهم

٢- ان الحل ده مش هيحل المشكلة من الأساس ، دول افريقيا دلوقتي بتنهض و بقا في دول أحسن من مصر زي رواندا ،وفالموضوع مسألة وقت ، فالحل العسكري هيحل المشكلة دلوقتي ، طب بعد ١٠٠ سنة ؟

- بعد ١٠٠ سنة هيجي جيل جديد هيكون عنده نفس فكرة بناء السد ، و الله أعلم وقتها انت هتكون فين و هما فين ، ممكن يكونوا وقتها اعلى منك فالمشكلة مش هتتحل
- كمان الامر ده هيزود العداوة التاريخية أكبر ما هي أصلاً و بالتالي اي مشكلة بعدها مش هتقدر تحلها سياسيا

- ارجع و اقول تاني ان الحل العسكري هيكون اخر حل و اسوء حل فيهم لكنه امر لابد منه لان مسالة المياه امن قومي ، و عشان نتكلم بحياديه فمستحيل اي رئيس و اي حكومة هتقف قدام ١٠٠ مليون واحد عطشان خصوصاً مع الزيادة السكانية

- الفكرة ان المشكلة زي ما قولنا مش في السد نفسه او مدة ملئ البحيرة لأن بحيرة ناصر هتسد الكام سنه دول ، لكن المشكلة في
١- اثيوبيا رفضت التفاوض علي حصة مصر و السودان و قالت انها هتكون ٣٧ مليار علي طول
٢- لو حصل جفاف في النيل فهيكون الامر كارثي علي مصر لأن كمية المياه هتقل بسكل كبير

٣- سد النهضة هيكون بداية لانشاء سدود اخرى علي نهر النيل ، ده هيخلي الامر كارثي فعلا علي مصر وقتها ، لكن المشكلة الاساسية مش في السد نفسه و مده الملئ دي كلها امور ممكن تدبريها الكام سنة دول

هل الحكومة هتفرط في حق مصر ؟
—
من وجهة نظري لا ، مستحيل اي حد حكومة مهما اتغيرت الحكومات هتفرط في حق مصر المائي ، لان زي ما قولنا مستحيل حد مهما كان هيقف ضد ١٠٠ مليون واحد عطشان ، و ده كان نفس الحل اللي اتطرح ايام محمد مرسي في الاجتماع الشهير اللي كان علي الهوا مع ايمن نور

عشان نربط الخطوط ببعضها
—
- بتوجيهات من الرئيس السيسي ، مصر بعتت مساعدات طبية لجنوب السودان و الصين طب ليه 🤔
- تقوم تركيا بعدها تبعت مساعدات طبية لجنوب السودان 🤔

- مقارنة بسيطة بين مصر و اثيوبيا
——
- في ٢٠٠٩ ٩٥٪ من المصريين بيدخلهم مياه في مواسير ،ومقابل ٤٢٪ من الاثيوبين
- في ٢٠٠٩ ٧٠٪ من المصريين عندهم صرف صحي مقابل ١٣٪ من الاثيوبين

- ٦٠٪ من الاثيوبين بيعانوا من نقص الكهرباء و المعيشة في الظلام الدامس

- اجمالي الناتج المحلي لمصر ٣٣٠ مليار دولار بمعدل ٣٠٠٠ دولار للفرد سنوياً
- الناتج المحلي لاثيوبيا ٣١ مليار دولار ، بمعدل ٣٦٠ دولار للفرد سنوياً
—
مصر ١٠٠ مليون نسمه
اثيوبيا ١٠٠ مليون نسمه

- الملخص ان مصر بتدفع تمن سياستها الخارجية في افريقيا طول الـ ٦٠ سنة اللي فاتوا ، و ده اللي لازم مصر تاخد بالها منه دلوقتي و تطور سياستها مع دول افريقيا خصوصاً مع النهضة الاقتصادية لدول كتير زي رواندا و نيجيريا ، الامر ده هيفتح مكاسب كتير علي مصر سياسيا و اقتصاديا

- ضروري ضروري ان مصر تطور سياستها في افريقيا و تتعامل معاهم بأسلوب أحسن من كدا ، لأن افريقيا هي المستقبل و الناس في افريقيا بيحبوك خصوصاً انك دولة افريقية في الأساس ، لكن اوروبا و امريكا مش بيحبوك و بيكرهوك ، فخليك مع اللي منتمي ليهم و منها يشدوك و تشدهم

- دول شرق اسيا ابرز مثال علي النهضة الاقتصادية ، شوف كانوا فين في الستينات و بقوا فين ، ماليزيا و سنغافوره و الصين و اندونسيا و غيرهم ،وده اللي بتعمله دول افريقيا دلوقتي بعد ٥٠ سنه هنقول شوف دول كانوا فين و بقوا فين و احنا نفضل في مكاننا بنتفرج بس

- بالمناسبة اثيوبيا من اسرع الدول نمو اقتصادي من الدول غير النفطية اللي مش معتمدة علي البترول

و كدا الثريد خلص

تنويه : الـ ٥٥ مليار اللي بتكلم عنهم بتوع النيل الازرق مش اجمالي الحصة ، الحصة كاملة ٩٤ مليار منهم حوالي ٥٠-٥٥ من النيل الازرق

من يومين مصر اعلنت انها هتتوجه لمجلس الأمن ، و طالما مصر خدت القرار ده ، فده اخر حل سلمي وبيكون لحل النزاعات و اللي هيكون له موقفين
١- قرار ادبي او الزامي من مجلس الامن لاثيوبيا في حالة ان المشكلة هتأثر علي السلام في المنطقة
٢- لو رفضت اثيوبيا او رفض مجلس الامن يبقى الحل العسكري

الفكرة ان مصر لجأت للأمم المتحدة و اتدخلت امريكا لحل المشكلة زي ما قولنا و في اخر جلسه بعد المفاوضات رفضت اثيوبيا التوقيع

- الفكرة ان الحل العسكري محتاج تدريب و محاكاة كاملة لكل اللي هيحصل ، مثال علي ده ضرب اسرائيل للمفاعل العراقي استغرق التدريب و المحاكاة سنة كاملة ، حطوا فيها كل السيناريوهات اللي ممكن تحصل و نفذوا تدريب لها ، فالموضوع مش سهل هنقول نضرب يبقى نضرب في وقتها

صورة منذ قليل لرئيس وزراء اثيوبيا و قائد قوات الدعم السريع في السودان بالادوات الحربية بعد فشل مفاوضات سد النهضة

عااجل : مصر تحيل ملف سد النهضة رسمياً لمجلس الأمن

مقارنة سريعه عشان الحرب

عااااجل : السيسي للقوات المسلحة كونوا مستعدين لتنفيذ اي مهمة داخل او خارج حدودنا

- مصر ارسلت من يومين مساعدات طبية لبوروندي و بعتت صدقي صبحي مستشار الرئيس ليشهد مراسم تنصيب الرئيس الجديد ، و ده بسبب ان بوروندي هي الدولة الوحيدة القريبة من التوقيع علي اتفاقية عنتيبي اللي بتمس حقوق مصر و السودان و بعدها تدخل حيز التنفيذ

- من حوالي شهر مصر بعتت مساعدات طبية لجنوب السودان ، لأن جنوب السودان لسه موقعتش برضو علي اتفاقية عنتيبي

- من حوالي شهر برضو ، مصر بعتت مساعدات طبية لجمهورية الكونغو ، لأن الكونغو لسه موقعتش علي الاتفاقية

عاجل وزير الخارجية المصري في اجتماع مجلس الامن بشأن سد النهضة
———
لو لم يحدث تعاون واتخاذ قرار مشترك فان هذا الأمر سيضر باستقرار المنطقة بالكامل

وزير الخارجية في كلمته امام مجلس الامن
—
فرغم أن موقفنا يظل هو أن الحل الناجع لمسألة سد النهضة يتمثل في التوصل إلى اتفاق عادل ومتوازن، إلا أن مصر سوف تحفظ وتؤمن المصالح العليا للشعب المصري – فالدفاع عن البقاء ليس محض اختيار، إنما هو مسألة حتمية تفرضها طبيعة البشر.

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد