رتبها

ثريد عن دراسة الطيران في أمريكا، أتمنى أنه يفيدكم سواء للمعرفة بشكل عام او للدراسة المستقبلية♥️

طبعا قبلها بقول مقدمة بسيطة، دراسة الطيران سواء كتخصص او هواية من أكثر الأشياء الممتعة اللي ممكن تسويها في حياتك وشي مستحيل وصفه

خلال فترة دراستي في أمريكا من ٢٠١٦ إلى ٢٠٢٠ كطالب صيانة طائرات للخطوط السعودية قررت بدعم من أبوي وتحفيز منه أني أدرس الطيران كتخصص ثاني لكن ربي ماكتب بسبب ظروف اني اكمل دراسة الطيران

دراسة الطيران في أمريكا تعتبر أفضل وأيسر من دول ثانية، لأسباب:
١- سهولة استخراج فيزا الدراسة
٢- سهولة المعيشة
٣- تعدد الخيارات الدراسية
٤- سهولة الاجراءات
٥- قلة التكلفة والأسعار التنافسية

طبعا في شي مهم لازم تفهمه قبل ابدأ اشرح النقاط اللي هو أن دراسة الطيران تختلف كلياً عن الدراسة الجامعية لأي تخصص ومسمى الساعات يختلف عن النظام الجامعي

وبشرح النقاط بالترتيب عشان تكون سهلة وميسرة:
- المتطلبات التعليمية والجسدية
- نظام الدراسة والتدريب
- ماهي رخص الطيران وكيف تحصل عليها
- التكلفة الدراسية
- افضل اماكن للدراسة

المتطلبات الدراسية الوحيدة هو أنك تتقن القراءة والكتابة والتحدث باللغة الانجليزية، وجسديا انك ماتعاني من امراض جسدية مزمنة قد تؤثر عليك، مثل الصرع أو الأمراض النفسية.. والأهم مافي طول محدد، الخطوط السعودية هي الوحيدة اللي تحدد الطول بين ١٦٥ سم الى ١٩٥ اظن

نظام الدراسة بحاول أوسع فيه شوي عشان يكون مفهوم وتوصل المعلومة بشكل أيسر.. دراسة الطيران تنقسم إلى جزئين حسب (FAR) Federal Aviation Regulation لوائح الطيران الفيدرالي
- Part 141
- Part 61

الـ141 نظام حضور فصلي خاص بالدراسة النظرية فقط دون الطيران محدد بساعات معينة وتكون نظام اترام وتدرس مع طلاب مثلك لين تخلص وتختبر اختبار الرخصة الكتابي، وبعدها يسجلونك مع قروب من الطلاب لمدرس معين وهو يختار جداول رحلاتك التدريبية

نظام الـ61، تدرس النظري عن بعد عن طريق كورسات اونلاين تخلصها وتستلم وثيقة تثبت اكمالك للكورسات عشان تختبر الكتابي، وتقدر في اي وقت سواء وانت تدرس او قبلها تطير وتجدول رحلاتك مع المدرس اللي انت تبغاه في الوقت اللي تبغاه، وهذه الطريقة تكون أغلى من الأولى لكن أفضل بالنسبة لي

طبعا مافي اختبارت فصلية او نص ترم او اختبارات نهائية او علامات مشاركة، الموضوع تلقي معلومة وتطبيق لها واختبار الرخصة هو الوحيد اللي يحدد اذا انت مؤهل تكون طيار او لا

طب وش هو الاختبار الكتابي او النظري وهل في اختبار عملي؟ بجي عالنقطة هذه بس بخلص الجزئية ذي.. طبعا دراسة النظرية تكون مرتبطة ارتباط اساسي بتدريبك في الطيارة، الهدف منها هو فهم المعلومة عشان اذا طلعت في الجو تتعلم تتطبقها

وراح تتعلم عن الطقس وكيف تقرأ الميتار METAR والردار والفيزياء في الجو وحالات الطوارئ وانظمة السلامة وقوانين الطيران والقواعد الجوية والمناطق المحظورة والارتفاعات والمطارات وخرائط الSectional وروموزها وكيف تتكلم في الراديو واكواد الردار وكيف تسوي في حالات الطوارئ

كثير صح ؟ ادري لكن كل هذه مهمة عشان سلامتك اولاً وسلامة الركاب والطائرة، لأن الجهل هو السبب الأول في الحوادث وكل ذا عشان تكون سليم في الجو وتهبط عالأرض بسلام

الآن نجي على موضوع الرخص وكيف تحصل عليها.. رخصة الطيران هي اللي تسمح لك بالطيران بكل بساطة لكن لكل رخصة قيود وامتيازات، مثلا: رخصة طالب طيران تسمح لك تطير لحالك فقط بدون ركاب وتكون فقط لمدة تدريبك للطيران وهكذا

ماودي اتعمق كثير في موضوع الرخص لكن بعطيك الرخص والتصنيفات المهمة اللي تحتاجها عشان تكون طيار مدني، والرخصة يخش تحتها تصانيف كثيرة بس بذكر اللي تحتاجه فقط

- رخصة طالب Student Pilot
- رخصة طيران خاصة Private Pilot Certification
- تصنيف انظمة او Instrument Rating
- رخصة طيران تجاري Commerical Pilot Certification
- تصنيف متعدد المحركات Multi-engine rating
- رخصة طيار ناقل جوي Air Transport Pilot (اختياري ماهي مطلوبة في السعودية)

رخصة الطالب تسمح لك تكون Pilot-in-command او الطيار المسؤول بغرض التدريب ولايسمح لك انك تشيل ركاب معك غير المدرب لان عنده رخصة تؤهله

الرخصة الخاصة تسمح لك تكون الطيار القائد او المسؤول وتشيل معك ركاب في اجواء VFR يعني تقدر تطير في الأجواء الكويسة وممنوع انك تشتغل بها تحت اي ظرف كان، ولازم تدفع مالا يقل عن ٢٥٪ في المية من تكاليف الرحلة

تصنيف الأنظمة في الرخصة الخاصة يسمح لك تطير في الاجواء السيئة والسبب يعود لتدريبك لأستخدام انظمة الملاحة بدون الاعتماد على النظر خارج الكبينة، وتسمح لك تطير في ارتفاعات اعلى

الرخصة التجارية تؤهلك أنك تشتغل كطيار وهي الرخصة المعترف بها لشركات الطيران عندنا السعودية، ويخش تحتها تصنيف متعدد المحركات واللي يخولك تطير طيارات بأكثر من محرك

طب كيف تحصل على الرخص هذه؟ طبعا هو لازم في كل رخصة تمر فيها لازم يكون في اختبار كتابي واختبار شفهي وطيران واخر اثنين يكونون مع بعض تحت مسمى Check-Ride وطبعا بالترتيب اللي كتبته الا رخصة الطالب ماتحتاج اختبار بس تحتاج الفحص الطبي كباقي الرخص

ونجي للنقطة اللي تهم الكثير، كم التكلفة الدراسية ؟ في الحقيقة مافي رقم محدد كل مدرسة تفرق عن أخرى في تسعيرتها بس عشان تفهم كيف هم يسعرونها لك اصبر معي شوي وبشرحها لك ببساطة

عندك الدراسة النظرية او Ground
عندك تدريب الطيران او Flights
عندك الكتب والمعدات او Materials

الدراسة النظرية تعتمد على اذا كنت ودك بنظام دراسي فصلي141 او نظام اونلاين 61
الأول راح تدفع مبلغ كأنك في جامعة: فلوس الدراسة والكتب والثاني راح تدفع حق كورس الاونلاين وبعض الكلاسات النظرية اللي بتاخذها مع مدربك سواء اجباري او اختياري

والشق الثاني هو رحلاتك التدريبية، راح تدفع الآتي الوقت اللي يمضيه معك المدرب، وايجار الطيارة، مثال: رحلة ساعة دفعت فيها مبلغ ٢٠٠ دولار
- ٥٠ دولار أجرة المدرب في الساعة
- ١٥٠ دولار اجرة الطيارة لمرة واحدة
ونظام الدفع غالبا PAY AS YOU GO يعني ادقع حق كل رحلة بوقتها

واخيرا المعدات، طبعا معدات الطيران غالية سواء من سماعات الطيران الى برامج الملاحة في الايباد ومثبتات الايباد ولوح كتابة عشان تسجل معلومات الراديو

طب السؤال المهم، كم تقريبا تكلف ؟
في الرخصة الواحدة: دراستك الأرضية او الكتابية في ١٤١ راح تكلف مابين ٥٠٠٠ دولار إلى ٨٠٠٠ دولار، وفي ال٦١ راح تكلفك مابين ٣٦٠ إلى ١٨٠ دولار + رحلات الطيران مابين ٨٠٠٠ دولار إلى ١٥ الف دولار + المعدات مابين ٥٠٠ دولار إلى١٤٥٠ دولار + ٧٠٠ رسوم اختبار

وعادة الرخصة الواحدة او التصنيف تكلف مابين ١٣ ألف إلى ٢٠ ألف دولار، وبتطلع بمجموع مايقارب ٥٥ ألف إلى ٨٥ ألف دولار أمريكي عشان تصير طيار

وين أفضل مكان تدرس فيها طيران في أمريكا، سؤال سهل وبدون تردد ولاية فلوريدا لكثرة المدارس وقلة الأسعار والجو المناسب للطيران

أعذروني على الاطالة بس أتمنى أني قدرت أفيدكم بشيء من عندي ممكن يعود لكم بالفائدة العظيمة مستقبلا وماكتبت هذا الثريد إلا عشان ودي الناس تستفيد منه وحبي الكبير لعالم للطيران هو اللي دفعني♥️

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد