رتبها

قصة طويلة حبتين
في ٢٠١٤ كنت بدأت أدرس CMA شهادة محاسب إداري أمريكية معتمدة لها مكانتها واللي بتؤهل الواحد يشتغل في أماكن متميزة و يبدأ مشاور صح في طريق الحياة العملية .. وكنت مره علقت علي بوست علي الفيس بوك عن تجربتي عن الدراسة ودخل واحد اسمه محمد حافظ يستفسر مني عنها ودراستها

وسألني ليه عاوز تدرس CMA وكان من ضمن اجابتي اني عاوز اسافر السعودية اشتغل و أعيش هناك علي طول، وانتهي الحوار علي كده، بعدها بشهر تقريبا لاقيته بيكلمني بيقولي كفيلي اللي كنت شغال عنده عاوز محاسب، تسافر؟
قلتله يا ريت وأنا بصراحة وقتها مش فاكر كنت عاوز أسافر أوي كده ليه..!

المهم وصلني بالكفيل وضحك علي و عملي مرتب ١٥٠٠ ريال وأنا مش فاهم ليه وافقت، و سافرت ولاقيتني بشتغل حاجات كتير جدا إلا المحاسبة، اه فيه حسابات بس مش محاسبة، والحمدلله قدرت بعمل نظام حوافز كويس للموظفين اننا نعمل اعلي إيراد في تاريخ الشركة، بس الكفيل بعد ما حققنا ده رجع في الحوافز

و أنا بدروي عرفته ان ده حيزعل الموظفين اننا نوعدهم بحوافز و منديهالهمش وقلتله أنا من دلوقتي مش مسؤول عن موضوع الإيرادات ده فيه اتنين غيري المفروض دي شغلتهم أنا حشتغل حسابات بس، وبالفعل الايراد نزل جامد الشهر اللي بعده .. وقعد يتمحلس لي لدرجة انه مره بعت لي صورة ابني عشان يستعطفني

الراجل ده أول ما سافرت خلاني أحبه و اقدره جدا ولغاية فترة قريبة كنت بحبه، أول ما رحت اتولد ابني عمار بعد أسبوعين وهو في مصر وأنا في السعودية ومشفتوش في الحقيقة غير بعدها بسنة، لما اتولد قلتله أنا حعمل عقيقة لعمار وانت معزوم، قالي العقيقة كلها علي حسابي و في استراحتي واختار اليوم

فطبعا الموقف ده أنا إلي هذه اللحظه ممتن له وانا اديته كل إخلاص و أمانه طول فترة شغلي معاه، برغم اني كنت أقل موظف كمرتب، نرجع للحوافز بعد ما اتمحلس لي قولتله ماشي انا حبغلهم علي حوافز جديدة واوعدك نعمل إيراد أعلي من أول مره الشهر الجاي، وقد كان وللأسف ده ربي عداوة مع المدير اليمني

المدير اليمني ده جبان و خسيس وأجبن من انه يواجهني مباشرةً، فكان بيرمي علي مساعده المصري للأسف، وانا بصراحة مكنتش فاهم ده ومعرفتش كرهه لي ده غير في اخر ايامي في الشغل، وتوالت الأحداث لغاية ما مرضت أمي وجالها جلطة وشلل نصفي وكان باقي اسبوع واحد بس علي ان مراتي وعيالي يجولي هناك

فأشار علي إني انزل اسبوع أشوفها واجيب مراتي و عيالي وأرجع معاهم هناك، وقد كان نزلت واحد من أجمل أيام حياتي شفت امي قبل وفاتها وشفت أحب الناس لي، ورجعت واستمرت الحياة أقل من شهر توفيت أمي رحمها الله يوم ٢٧/٥/٢٠١٦ يوم الجمعة، نزلت الشغل يوم السبت وكان فيه رواتب وشغل مهم و أنجزته 👇

بعد كده بأسبوع تقريبا أنا كنت تعبان نفسياً جدا لكذا سبب منهم أن أمي توفيت في مصر وأنا مش معاها وخسرت اللي بحبهم وقررت أقدم استقالتي و أرجع مصر وقدمتها بالفعل وبكل شياكه كلمته كرجل وقولتله أنا مش حمشي غير لما يكون فيه بديل ولو حتي سنة وهو حاول اني أرجع في قراري بس عرف انه نهائي

بعدها مباشرةً راح عمل فيا بلاغ هروب في مكتب العمل، أنا اتجننت وقتها .. يا ابن كل اوساخ العالم بقي أنا نزلت الشغل تاني يوم وفاة أمي ومستمر شغال وانت تروح تبلغ عني هروب عشان قدمت استقالتي، ولبست عجز ٤ الاف ريال دفعتهم كمان قبل ما انزل، و جه اليمني ده مكتب العمل قدامي وكذب الخنزير

اللي فات ده حمادة واللي جاي حمادة تاني خالص 😄
فضل يتواصل معاي بعد ما رجعت مصر وأنا مصدتوش ومحاولتش أبين اي شيء .. وكنت في حالة نفسية مش وقته خالص اني اعمل اي حاجه، بعد أقل من سنة رجع لي ال ٤ آلاف ريال اللي نهبهم مني بس بالمصري وبسعر وقتها وكان عندنا حصل التعويم فقيمتهم قلت

محمد حافظ كان الوسيط وهو اللي اداني الفلوس دي، وأنا برغم اني دافعهم سعودي وهو اداهم لي مصري بس متكلمتش وقلت اللي يجي منه، ولاقيته عاوز حاجه مش بيبعتهم لي كده لله او لأنه حس بغلطه، اللي حصل بعدها أنا لو كتبت إسمه مع الكلام ومنشنت وزارة الداخلية السعودية أقل شيء حيتسجن ويتغرم

بس أنا ححكي بدون اسمه وبدون ما أقدم بلاغ للسلطات السعودية بده، أنا بس حابب أحكي حاجه يمكن اخر حكاية شخصية ححكيها
اخترع لي قصة عن صديق له متزوج وزوجته حامل ولازم ينزلوا الحنين بأي شكل لأنه حيحصل مشكلة وهي صحيا تقرييا حيكون خطر عليها وحاجه زي كده، وبيسألني ايه الحل أقوله يعمل إيه؟

للأسف أنا قلتله بحسن نية إنه حبوب اسمها كذا لو جابها واخدت منها كام حباية ينزل الجنين، وقعد يجيب لي فتاوي العلماء في ان الجنين في أول شهر ممكن ينزل عادي لو فيه مصلحة في كده وحاجات زي كده، وجه بعدها بعت لي الصورة دي وصور تانية غيرها وقالي كده يبقي خلاص الحمل سقط، قلته أعتقد اه

هو شاب صغير لسه مكملش ٣٠ سنة وبيتجوز كتير، بيحب الستات هو بس في النقطة دي كان بيغير مني جدا مش فاهم ليه، تقريبا حد فهمه اني كنت دنجوان وأنا صغير وحتي موضوع الأصل ده كان دايما يقولي انت أصلك مولود في بوقك معلقة دهب يقولها بالمصري بسماجه كده، مع انه عنده في حساب واحد ١٠٠ مليون ريال

جه بعدها عاوزني أرجع اشتغل معاه تاني
بس هو مش الشخصية اللي يقولي كده مباشرةً، بعت لي قالي عاوزك ترشح لي محاسب يكون أمين زيك، قلتله وليه ما أنا موجود، قالي بس انت يا عم عاوز راتب كبير و اختلفنا قبل كده و و و
المهم عرض علي ٢٠٠٠ ريال وأنا وافقت و سافرت تاني في نفس المكان ونفس الشغل

رحت هناك وأنا ناوي نية محددة بس للأسف انت لما بيبقي عندك مبدأ معين حتي لو اللي قدامك وسخ مبتعرفش تتخلي عن مبادئك حتي لو هو هفق وانت تقدر .. بس أنا حبيت أمسك عليه حاجات مكنتش عامل حسابي امسكها عليه أول مره 👇، أول مره دي كنت راجل محترم جدا وساذج في نفس الوقت بس قررت ابقي غير شوية

مبدئيا أنا كرهت نوعية معينة من المتدينين شكلا و ياكلوا مال النبي ﷺ ومعندهمش ضمير في التعاملات المالية، لأن هو يظهر كده كمتدين وهو وسخ و فيه كتير من أهل القصيم زيه كده للأسف الشديد، واكترهم طبعا ناس محترمين وانا بحب القصيم وأهلها بشكل عام، لكن أصحاب العمل هناك معظمهم كده للأسف

فشوية كده وقصرت دقني بقي خالص
جات علينا ضريبة القيمة المضافة وأنا هناك وأنا بصراحة بعتقد ان حلال التهرب من الضرائب لو بتطلع زكاة مالك 😂 وهو كان بيتهرب من دفع الزكاة بقوائم مالية مفبركة وأنا كمان ساعدته في انه يكسب من الضرائب مش بس يتهرب منها، أنا للأسف شاطر في الحاجات الخايبة دي

احنا شركة صيانة سيارات، و العميل هو اللي بيشتري قطع الغيار أنا بقيت أضيفها عندنا في الضريبة علي اننا دافعينها و خليت القرعاوي يطلعوا الفواتير باسمنا مع ان العميل هو اللي دافع، وبالتالي احنا كده كسبنا من قيمة الفاتورة ٥٪ بترجع لنا من الحكومة تاني تتخصم من ضريبة الإيرادات 😄

فضلت علي كده وبنزل مصر كل ست شهور، وأنا بكسبه كويس جدا واجيب له خصومات من موري البوية وهو كان متفق معايا يديني ٥٠٠ ريال شهريا حوافز ومدنيش ولا هلله، يعني ١٢ ألف ريال و ٢٠٠٠ ريال مكافأة نهاية الخدمة أكلهم علي وواكل علي أول مره ١٢ ألف ريال بتوع استقدام و ١٥٠٠ ريال شهر راتب
= ٢٧.٥٠٠

ده غير تذاكر الطيران لي ولمراتي وعيالي اللي دفعتهم من جيبي و فرق العملة في ال ٤٠٠٠ ريال
يعني هو واكل علي بتاع ٣٠ ألف ريال تقريبا، بعت له من فترة كده عليهم واني لي عنده فلوس عن طريق وسيط فبعت له الفويس ده وبيشرح فيه الموضوع من وجهة نظره 👇

توضيح في أول ٣٠ ثانية صوت حد أنا مدخله علي صوته، ده صوت المحاسب القانوني أنا كنت مسجله تسجيل كامل بيشرح لي فيه انه بيفبرك القوائم المالية للشركة وبيألف أرقام من دماغه وبعلم الحج ده وغصب عنه لأنه علي كفالته ولو إنه شغال حر
هو هنا بيعرض القصة كلها من وجهة نظره بعد ما طالبته بفلوسي

أنا قررت أمشي من عنده قبل ما امشي بسنة تقريبا
كان فيه واد مدير مالي محترم جالي مره وكان حيشتغل معاه وبنظبط مع بعض نظام محاسبي جديد للشركة كلها عشان نمشي صح، وبعدها مفش أسبوعين وسابه ومشي وفهمت منه إن الراجل ده مش عاوز يمشي صح وده مش مكاني ومينفعش اشتغل مع شخص بالشكل ده

وقتها قررت اني مستحيل اكمل معاه، بس لازم اكمل عقدي السنتين كاملين ومقدمش استقالتي المره دي عشان محسش اني فاشل اكتر من كده، اخر ٣ شهور معاه فيهم حبيت حكايات كتير ححكيها تباعاً ، وان شاء الله القصة كلها حخلصها النهاردة، عشان أنا تعبان جدا نفسيا منها وقلت يمكن لما أكتبها أرتاح وانسي

الحمدلله قبل ما امشي من شركة صيانة السيارات وداني اخر ٣ شهور امسك كافيه كبير في الرياض بتاعه برضه بحكم حبي للقهوة وإني ممكن افيده في التسويق وحاجات زي كده،قبل ما امشي ما كنت عامل نظام تقارير كامل، مفيش حد غير في الشركة وحساباتها زيي .. لأن اللي كان بيجي كان بيشتغل علي قد فلوسهم

لدرجة إني مشيت سنة وجه محاسب مكاني احسن مني و مغيرش حتي خلفية الديسك توب بتاعة الكومبيوتر فضلت قهوة زي ما كنت حاطتها من سنة ونفس التقارير بنفس التصميم اللي كنت عامله، ولما سألته ليه متغيرتش ده قالي ما انت عارف انه ميستاهلش انت بس اللي غلبان يا أبو إبراهيم

رحت الرياض مسكت الكافيه ده عملت الآتي في ٣ شهور
عملت ستارت اب لبرنامج الحسابات بتاع الكافية
وفرت له ٩٧ ألف ريال كان بيشتري محمصة قهوة غالية وأنا دورت و جبت له واحدة من تركيا بالشحن أرخص ٩٧ ألف ريال ونفس السعة
جبت لهم موردين حلا سعرهم أقل و حاجتهم أرخص من اللي بيجيبوه

هو طبعا كان عمل معايا اتفاق ان بعد ٣ شهور حيديني ٤ آلاف ريال بس أنا الحقيقة مكنتش حكمل ولو ب ١٠٠ ألف، وقلت لكل العصافير عنده إني مش حكمل وهم طبعا بيوصلوله، و هو بدوره كان بياخد خطوة انه هو اللي يمشيني بس بمشكلة، هو مبيحبش حد يسيبه بيحب هو اللي يمشي الناس، و ده حصل اكتر من مره

فيه واحد كان معانا قدم استقالته، اجتمع معاه واقنعه يستني و رفده هو بعدها بأسبوع 😄
هو مريض نفسي علي أغلب الظن .. وبدأت في اخر شهر أحرق دمه بقي في كذا موقف وفي نفس الوقت وسطت مدير سعودي اني حمشي أنا عارف بس يا ريت بدون مشاكل، لأني كنت حفضحه لو حصلت مشكلة وأنا مكنتش حابب افضحه

لأن ده عكس مبادئي وكنت حفضحه فيديوهات وصور وحاجات مشينه، هو نفسه ميعرفش أنها عندي ده غير فبركة الحسابات ومشيه الغلط
وده مثال علي ده من رسائل بينا

هنا طبعا أنا قاصد أقول عشان اثبت انه هو اللي عاوز يمشي غلط واننا حاولنا نغير كل الحسابات للفواتير الفعلية و نمشي صح وهو مرضيش
وإلي الآن ماشي غلط
أنا محبتش اخبي اسمه هنا ولا رقمه 😄😜

لما رحت الرياض قعدني في خيمة فوق سطح الشركة بتاعة الدعاية والإعلان بتاعة، وبرغم انها خيمة مكيفة و فخمة بس فيها نمل ابن هرمه، بهدلني لدرجة اني بعتله صورة جسمي وقرص النمل قالي بكره نخلي حد ينضف الخيمة وجاب لي فرشة بتتقفل كده عشان النمل ميدخليش وقعدت جسمي كله متبهدل فترة
ذلني برضه

جه في يوم في اخر شهر يقولي يوم سبت انت كنت فين البارح
قلتله الجمعة إجازة رحت قضيته مع أصحابي، طبعا هو عاوزني اشتغل الجمعة كمان عادي
قالي بتعمل ايه مع اصحابك
قلتله كنت بشرب حشيش 😂
كل الناس لاموني علي الرد ده لأني احرجته وكأني بقوله وانت مال امك، بس انا كنت خلاص ماشي ومش باقي عليه

فيه ولد اسمه محمد عبدالرحمن مصري ده جه اخر فترة انا كنت فيها وعرفت انه بياخد ٦ الاف ريال يعني ٣ أضعاف مرتبي، وهو حمار للأسف حقيقي مستواه تعبان وأنا اثبت ده عملي وكمان كداب وكان كل شوية يشتم لي فيه قبل ما نقع مع بعض أنا وهو لانه كداب و عامل نفسه بيفهم وهو تخين وعفش 😂

في اخر أسبوع سلمته ايراد الكافيه قالي ناقص حسب البرنامج وهو أصلا مبيفهمش في البرنامج
قلت له جميل اكتب لي بس المبلغ كام بالظبط وامضي لي عليه وانا حديلك الريال حاضر
عملت كده لأنه بيكذب ولازم يبقي فيه إثبات ورقي عشان أنا عاوز اطلعه هو وكفيله مبيفهموش وأرد كرامتي عملي

مضي لي دخلت للكفيل قلت له الاستاذ محمد بيقولي ناقص ريال .. انا حدفع الريال ده ١٠ آلاف ريال لو فيه فعلا خطأ, قالي أكيد وفيه شاهد كمان أهو قلته اه حدفع ١٠ آلاف ريال لو فيه خطأ ريال زي ما محمد بيقول
نادي محمد وقالي طلعوا لي انتوا الاتنين ايراد يوم ١٠ أكتوبر كام ونشوف

محمد راح يشوفه ع البرنامج وأنا اديتهوله
أنا مطلعه ٤٩٠٠ و ١٦ هلله و محمد مطلعه ٤٦٠٠
يعني فرق ٣٠٠ ريال .. أنا كنت بطنطت من الفرحة من جوايا ومسكته غسلته بقي
قلتله يا فلان أنا لو شخص حرامي حاخد ال ٣٠٠ ريال فرق دول في جيبي وهو حيمضي لي وانت بتثق فيه، أنا مبقولكش الكلام ده علي

عبدالله معروف كمان أنا كده كده مش موجود بعد كده عشان اللي يجي بعدي يمكن ميكونش زيي .. والأستاذ محمد مبيعرفش يستخدم البرنامج وبيطلع الإيرادات غلط
هو ساعتها حس بالإهانة مش عشان محمد عشان انا بطلعه حمار عملي والشخص اللي جايبه فوقي وبيقولي انت مش ند له حمار ومبيعرفش حاجه

طلب المدير المالي وقاله هات لي إيرادات ١٠ اكتوبر من علي البرنامج وتعالي حالا
وقالي أنا دلوقتي قدامي رقمين ممكن انت غلط قولتله صح
دخل المدير المالي قال الايراد كان ٤٩٠٠ و ١٦ هلله
أنا روحت ضاحك ضحكة وصلت عالية جدا وصلت لأخر الشارع 😂😂
وكان ده أكبر انتصار لنفسي ومعرفتي بقيمتي وقتها

اخر يوم حسيت ان خلاص هو جاب اخره وقرر يمشيني فمحبيتش بصراحة اديله النشوة دي كمان ورحت فورا عامل عدم تجديد عقد وسملته بشكل رسمي المره دي وأنا هنا كنت بستغل انه بيخاف علي شكله في شركته في الرياض وانه متحضر وكده، غير تعامله العربجي في بريدة
و انتهت صفحة ذكرت قليل منها وفيه كتي وجع

اخدت خروج نهائي و روحت قعدت عند واحد صاحبي شوية وعند ابن اخويا شوية ومنتظر الاقي شغل تاني لأن عندي فرصة اقعد هناك شهرين بشكل قانوني بعد الخروج النهائي .. راح مكلم مديره اليمني العرص قالي لازم تمشي انت مسافرتش ليه، لو مسفرتش حبلغ عنك هروب
استشرت الناس ونصحوني امشي

هنا بقي وأنا في قمة الضيق حصلت حاجتين لطفت وبردت قلبي شوية .. الأولي انهم كانوا عاوزين يعملوا شراكة مع رالي دكار ومعرفوش وبعدين المدير السعودي اللي بحبه جدا وبحترمه قالي راسلهم كده يمكن، فعلا بعت لهم ايميل وردوا علي بالموافقة وبعت له انهم ردوا علي ووافقوا برغم اني كنت مشيت خلاص

الموقف التاني
وأنا تحت في الكافية في يوم لاقيت شاب سعودي محترم بيوقفني وبيقولي عاملين الديكور ده فين وأنا حابب اعمل حاجه زي كده، أنا فاهم كويس ومش غبي يعني اني ممكن اتعامل مني له مباشرة واخد عمولتي .. انا معملتش كده
انا اقنعته اننا كيان كبير وممكن ياخد فرانشيز مننا ويدينا نسبة

يتكفل هو بعمل كافية بالكامل واحنا نديله العلامة التجارية بتاعتنا ونفس ديكورات المحل عندنا في مقابل نسبة من الأرباح .. مع العلم اننا أصلا فرع واحد بس ولسه جداد 😄
واخدته وديتهوله وهو عامله بغشومية وقالي خليه يتواصل مع المدير السعودي ومحدش تواصل معاه بعدها للأسف

يوم ما خلاص انا حمشي تاني يوم لاقيته بيكلمني ايه فينك انا هنا في الكافية قلت له لاء انا سيبتهم خلاص وراجع مصر بكره ان شاء الله، قالي لازم أشوفك وجالي اتقابلنا وكان سعيد جدا
قالي متتصورش سعادتي قد ايه انك سيبتهم أنا عاوزك تشتغل معايا عندي مصنع بلاستيك هنا حتي لو مش حنعمل كافيه

في نص الكلام كده قالي انت سيبتهم ليه
قلتله أنا كنت باخد ٦ الاف ريال وعندي عيال كبروا والمصاريف كترت ومتفقناش للأسف في موضوع الزيادة فحبيت أدور علي فرصة أفضل 😄
قالي ولا يهمك تنزل تقضي وقتك في مصر وأنا حبعتلك وموافق يديني أكتر من ٦ الاف ريال وأنا اصلا كنت باخد ألفين بس 😭💔

ونزلت مصر وحصلت كورونا دي ولسه فيه تواصل بس كل شيء متوقف، لما سألت علي LinkedIn رئيس حسابات ياخد كام قالوا اقل شيء ١٠ الاف
فالحقيقة قلت اطور نفسي شوية في الحسابات واسافر علي فرصة أفضل حتي من دي
جات كورونا دمرت كل الحسابات دي للأسف
وهنا انتهت الحكاية الطويلة حبتين 😊

ممكن مساعدة ترتيب هنا 🌹
@Rattibha

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

نسخ سلسلة