طيب عشان الناس دايماً بكون عندها عشم كبير في اللوتري وفي أمريكا ح أوضح كم نقطة لعل وعسي الناس بعد تجي ما تتفاجئ
اولاً اللوتري هو عبارة عن هجرة شرعية لأمريكا بس مابوفر ليك اي امتيازات تانية بل بالعكس انت حتدفع مبلغ 330 دولار عشان تقابل في السفارة
ثانياً انت عشان تسافر حتكون عليك تذاكر الطيران والاقامة واي حاجة هناك لحدي ماتستلم ورقك وتقدر تشتغل فحرفياً مهما كان عندك قروش حتنصرف كلها وحتجي تلقي نفسك هنا بادي من الصفر
فوزك باللوتري من الاساس مايعني ضمانك للفيزا لانه مرات كتيرة ممكن يحصل ليك رفض بل مرات ممكن الكيس نمبر بتاعك مايخش النشرة وماتقابل من الاساس ودي برضو احسن من الرفض الحتخسر فيه ٣٣٠ دولار وماتاخد فيزا برضو
عشان تجي امريكا هنا بتكون محتاج ضامن sponsor ولو ماقدرت توفره فتنسي موضوع الفيزا لانه مطلب اساسي
بعد ربنا سهل ليك وجيت هنا لازم تعرف انه النظام صعب جداً وخصوصاً في البداية لانه مابكون عندك credit history يعني ماحتقدر تأجر شقة وماحتقدر تشتري تلفون او عربية الا تدفع كاش
في البداية لو ربنا سهلها عليك حتضطر تشتغل في junk jobs لانه شهادتك احتمال كبير ماتشغلك وانت اصلاً مابكون عندك رفاهية تنتظر الشغل بالشهادة والشغل بكون براتب ضعيف فحتضطر تشتغل ساعات طويلة او تشتغل دواميين عشان تغطي منصرفاتك
بعد فترة حتلقي نفسك مضطر تتخلي عن العمل لساعات طويلة عشان تقرا خصوصاً لو لغتك ماكويسة وهنا حتلقي نفسك مدروش بين الشغل والقراية لانه ماحتقدر توقف الشغل عشان البلد صعبة وفواتيرك كتيرة
بعد تقدر تقيف علي كرعينك حتلقي سيستم البلد ضاغط وحتلقي قريب ربع مرتبك رايح ضرايب غير انك حتدفع تامين صحي وتامين للعربية رقم معتبر من غير ماتلقي مقابل لكن حتكون مضطر تدفع
ختاماً ماتغرك المناظر الجميلة الحتشوفها هنا لانك ماحتشوفها تاني الا نادراً وحتلقي نفسك مردوم شغل وقراية وغربة وحاجات كتيرة عشان كدا دايماً الاشياء ليست كما تبدو عليه
الاشياء ليست كما تبدو عليه زي ماقلنا انا قاعد في الجاكوزي بتاع السكن وكتبت الثريد دا لكن الحقيقة انا قاعد راجي هدومي تنشف في الlaundry والشمس حارقة راسي 😂😂
جاري تحميل الاقتراحات...