قصة قصيرة: جامعة الكويت تحديداً كلية الآداب/انجليزي قبل 13 سنة كانت بالنسبة لي حلم كبير صعب المنال. قبل 4 سنين قررت احفز هذا الحلم واعطيه فرصه. قبل 3 سنين تحقق نصف هذا الحلم وصرت طالب فيها حالياً سنة ثالثة جامعة الكويت كلية الآداب تخصص اللغة الانجليزية وآدابها مساند ترجمة 💙
شهادتي الدبلوم في البزنس ما استهوتني، ولا لقيت نفسي صوبها لانها مو ميولي ولا اهي رغبتي او طموحي. قبل 4 سنين ادركت ان هذا اهو الوقت المناسب و and it’s never too late شديت على ذراعي، تعبت دوام بنك صبح واروح العصر الثانوية مسائي بنفس الدشداشة. كل هذا لاجل طموحي واني اكون قدوة لعيالي
بعز امتحانات فاينل الثانوية، مريت بظروف صعبة منها وفاة رضيعين توأم لي حديثين الولادة جعلهما الله شفعاء لنا، وقلت لازم استمر عشانهم وعشان اخوانهم بالمستقبل. اهما الي كانو الدافع لي. واديت امتحاناتي كلها بدرجات ممتازة
بعد ماتخرجت من الثانوية (للمرة الثانية) بنسبة عالية بذراعي 💪🏼 قبل 3 سنين مثل هذا الوقت قررت اقدم على جامعة الكويت وكنت مازلت اشوفه حلم صعب المنال! طلع القبول، وبرغبتي الاولى، ماكنت متخيل اني قدرت اوصل لجامعة كنت احلم اني اكون من منتسبينها
اول يوم لي في الجامعة كان شوي صعب، كنت احاول اني اتأقلم مع الوضع خاصة ان زملائي الطلبة والطالبات يفرقون عني بالعمر. انا اكبر من دفعتي بـ10 سنين 😁 لكن الحمدلله خلال ايام قدرت اتاقلم، والكل كان يشوفني مثل اخوه الكبير ويلجأون لي اغلب الاوقات ولا احب اني اخذلهم ودايماً اشجعهم
واتمنى لهم كل خير 🙏🏼قبل سنة تم تكريمي بمناسبة تفوقي الدراسي، ويارب الكثير قادم. العلم لا عمر له، شي انت تبيه وحاطه فبالك (تقدر) تحققه بذراعك، مافي شي مستحيل. حالياً طالب في جامعة الكويت و اب لـ 4 اطفال هم قوتي ومستقبلي وكل هذا الي اسويه لهم قبل لايكون لي.
مشتاق لمقاعد الجامعة، مشتاق لاقلامي واساتذتي. عندي ولاء كبير لجامعة الكويت وفخور جداً اني منتسب لها كأحد طلبتها 💙 شكراً لـ جامعة الكويت، وشكراً لكل دكتور علمني في الجامعة خلال هذه السنوات وشكرا للدكاترة الي تشرفت بمعرفتهم على دعمهم الدائم .. انشهد انهم مثابة اسرتي الثانية 🙏🏼
هذا الي انا ابيه، كتبي الدراسية اعاملهم معاملة طفلي الخامس. دعواتكم لي الله يقدرني ويوفقني بموازنة دراستي مع ضغط تربية الابناء والامور الاجتماعية. هانت ومابقى الا الثلث منها باذن الله 😊💪🏼 #قدها
جاري تحميل الاقتراحات...