علشن باه اللي بيسالوا ليه ماكتبتش عن حر ب الاستنزاف وعن خروج الناس يوم 9 يونيو انا كنت برة بس بعد اسبوعين حبس وكمان تعب ركبي مش مساعدني علي الحركة والعيادات قافلة بس نزلت اسو ق العربة ومعايا مراتي تشتري حاجات للبيت . شوف ياسيدي . اول حاجة يوم 9 يونيو
وبرضه دا مش راي ولا معلومة دا اللي شفته بعيني . انا كنت امين شباب شركة الترسانة البحرية في اسكندرية وكان عندنا اجتماع بالليل في قسم شباب المينا . كل امناء شباب الشركات وحنسمع فيه خطاب عبد الناصر . سمعنا الخطاب ونزل علينا سهم الله لحظات
في اللحظات دي رئيس قسم منظمة الشباب في المينا اللي مجتمع بينا قال الاتي " عبد الناصر خلاص حيبقي زي ماوتسي تونج خارج الحكم ورمز من رموز السياسة " يعني ماكان شفيه تعليمات ننزل الشارع نطالب ببقائه ولاحاجة زي مابيقولوا . دا رئيس قسك شباب المينا كله
صرخنا فيه وشتمناه ونزلنا جري في الشارع بدون اي اتفاق نصرخ حنحنحار حنحارب لقينا شارع البحرية اللي فيه القسم مليان بشر الرجالة بتصرخ حنحار ب والستات بتلطم والبنات والشباب والاطفال حنحارب حنحارب وكله رايح للمنشية .
اي حد يقول لك كان النزول متنظم قل انت كذاب . التنظيم حصل تاني يوم واليفط ظهرت تاني يوم لكن كانت الناس سبقته بشكل عفوي جدا . مش حب في عبد الناصر اكتر ماهو عدم تسليم بالهزيمة . انا للاسف اخدت طريق تاني غير المنشية ومش قاصد
انا كنت رئيس لجنة الدفاع المدني في الترسانة ودي لجنة كوناها مع الحرب فخدت طريق للترسانة . من شارع البحرية في بحري للترسانة في المفروزة طريق طويل قابلت فيه الالف مؤلفة من البشر بتجري بهدوم النوم وهدوم البيت علي المنشية جايين من المكس والورديان والقباري ومينا البصل
وماحد شمعاه يافطة واحدة لكن كله بيصرخ او يعيط . احب بس اقول لكم سيبكم من الاعلام الزفت النا س العادية كانت بتحب عب الناصر من اللي شايفاه . مدارس ومصانع كل اسبوع ومستشفيات وتتخرج تشتغل بعد شهر وتتجوز بعد شهرين وطبعا ماحدش كان يعرف حاجة غير كدا
اي كلام عن احا احا لا تتنحي كذب وفوتو شوب . وانا رغم ان رايي اتغير وعرفت طريق الماركسيين بعد الهزيمة دي بس احب اقول الحقيقة اللي شفتها . المهم وصلت الترسانة مالقتش غيري وكانت اطول واسود لية في حياتي وكمان النور مقطوع خوفا من الغارات . يعني سواد في سواد
نزلت امشي بين ورش الترسانة في الضلمة شفت الاوناش كانها ديناصورات من عصور قديمة ورجعت المكتب ابكي ونمت علي الارض للصبح ورحت المنشية شفت اليفط وغيره اللي اتعملت تاني يوم بقيت اتفرج كاني باشوف بلد تانية مش موقف ولا حاجة لكن الحزن كان رهيب
مع الايام استحملنا الصدمة وضحكنا حتي علي النكت اللي اتقالت لكن نفس الناس اللي قالت حنحارب اتصدموا في محاكمات قادة الطيران بعد كدا ونزلت مظاهرات الطلبة والعمال لاول مرة تندد بالنظام . ماطولتش واعادوا المحاكمات لكن حصلت حرب الاستزاف وهنا بدات الروح المعنوية ترجع تاني ووصلت السما
كانت ايام حرب الاستزاف وبعد الهزيمة عموما صعبة جدا اقتصاديا علي الناس . حاجات كتير بقت قليلة والطوابير ع الجمعيات علشان الارز والسكر واللحة والزيت لكن الناس استحملت علشان حرب الاستنزاف كانت حقيقية وعظيمة . طبعا الطوابير دي فضت ايام السادات وبعد حرب اكتوبر
والناس استحملت بحب وحماس لحد 1975 لكن بعد كدا فضلت الطوابير علشان البلد بتتسرق ودا موضوع تاني . طيب هل ماكانش فيه فايدة من الهزيمة . كان فيه . اظهرت المعدن العظيم للشعب واظهرت ماكان خفيا علينا من اعتقالات وسجون وبدات اعداد كتير من الشباب تهجر الناصرية للماركسية باشكالها
لحد ما جه السادات ونزل التيارات الاسلامية , وبرضه دا موضوع تاني . المهم بدا الشباب يعرف ان النجاح الاقتصادي والاجتماعي مش كفاية وان الديموقراطية هي الحل لطن طبعا الامور مشيت دايما في الطريق المعاكس . المهم بس انيقلت لكم حاجات شفتها بعيني وكمان بالمرة الاغاني اللي حصلت لعبد الناصر
علشان يفضل في الحكم اتعملت بعد ما الناس نزلت وقالت لا حنحارب . يعمي ماكانش ليها تاثير ولا حاجة . سنة 68 الدنيا ولعت مظاهرات بسبب الاحكام الهزيلة علي قادة الطيران .
قصدي الطوابير فضلت ايام السادات مش فضت
جاري تحميل الاقتراحات...