طيب بما اني قاعد مستني الدوا و البنادول شغال و دي حاجة انا مستغربها احب اكتبلكم الثريد اللطيف بتاع حكايتي مع الكورونا وهابقى احدثه كل شوية يمكن ينفعنا
اولا انا ابتدت تظهر عندي اعراض يوم الاتنين ٢٦ مايو والاعراض كانت سخونة مش عالية اوي و اسهال مبرح وتعب هايف جدا، اللي هو لازم اتعب نفسي شوية عشان احس اني دايخ حاجة مش هتلاحظها يعني الا اذا كنت مركز جدا ابتديت اخد الكورس بتاع الكورونا just in case لغاية ما اشوف ايه اللي هيحصل
المهم العرض الرئيسي واللي كان مضايقني الاسهال اللي كان حرفيا قاسي جدا سواء كتقلصات او وجع بطن، حاجة ربنا مايوريكم، رحت بقى مستشفى عملت chest ct وصورة دم و قالولي لا دي نزلة معوية ماتركزش و خد المطهر ده، مع العلم ان دي مستشفى كبيرة و فيها عزل لكورونا
رجعت طبعا البيت باضرب اخماس ف اسداس و بدأت اوقف الكورس واركز ف الاسهال و فعلا اتحسن نسبيا لكن فيه عرض تاني سخيف جدا، الحرارة والتعب، حرفيا كان بيبقى نفسي انام و تعبان جدا بس مش قادر، من اوسخ انواع العيا اللي عدى عليا لدرجة اني كنت ماشي الالي ف البيت الفجر عشان نفسي انام ساعة
طبعا ف وسط كل ده مافيش ولا كحة ولا اي اعراض تقول انها كورونا اصلا، السخونة دي ممكن تبقى من التهاب و طبيعي جدا لو كلت حاجة بايظة مثلا يحصلك كدة، طيب نعمل ايه الحرارة وصلت لمرحلة سخيفة جدا اللي هو لو نمت ساعة هاصحى حرارتي ٤٢ وحالتي صعبة جدا
طبعا كان الحل الوحيد بالنسبة لي اني احاول انزلها باي شكل لأن البنادول ده كائن فاشل ف تنزيل الحرارة بشكل عام وكنت باقعد بقى اترعش ف البانيو وانا باحاول انزلها وانجح مرة و خمسة لأ، قلت بس لازم بقى نتأكد ده ايه عشان انا مش باتحسن
عملت المسحة والرابيد تست اللي طلع نجاتيف ف خلاص مفروض اكون عرفت كدة انها مش كورونا، لغاية ما فوجئت بالدكتور بتاع وزارة الصحة ملكمني الساعة ٤ الصبح بيقولي المسحة ايجابية
طبعا الموضوع يخض شوية بالذات والحاجات دي دايما بتحدث للاخرين فقط، لكنها حدثت واديني باتعك اهو، على اجانب المشرق الحراوة حدتها خفت شوية والوزارة بعتولي الدوا عالبيت واتصرفت كدة ف كام حد ابن حلال بعت جابلي زبادي و حاجات زي دي
طبعا ف النص بقى انا فقدت الشم والتذوق بعد مارجعت من المستشفى تاني يوم، و بعد ماكنت اول يومين مقضيها دلفري والحياة زبادي خلاط، فوجئت ان اكل الزبادي شخصيا مجهود لا يستهان به
و طبعا ف النص كدة صحيت على حرارة عالية و رجعت ف زوري اتجزع، فبقيت مش قادر ابلع كمان، ومش بس كدة دانا لو اتنفست زوري بيوجعني
المهم ان ماكانش فيه كحة غير ببلغم و دلوقتي فيه شوية كحة برضه بس مش حاجة رهيبة يعني و ربنا يسترها بقى
اليوم التاسع 💪: امبارح كنت بانام على روحي طول النهار والحرارة بطلت تبقى ف الاربعينات تاني، بس لازال التعب موجود وشديد نسبيا مع انخفاض الحرارة، الجديد ان النوم بيخليني احس اني احسن لغاية ما احاول اكل، امبارح صحيت كلت موزة وتمرة عشان اخد الدوا كأني كلت صبنية مسبكة
معدتي بهدلتني والحقيقة مش عارف بجد هو الناس اللي بتقولي كل كويس ده جابت الثقة منين انا مش قادر ابص للاكل اصلا
بشكل عام انا اتعلمت شوية حاجات كدة مهم اوي نعرفها
١- مافيش احتياطات هتنقذك اعمل بس اللي عليك بس استعد و قوي مناعتك
٢- انك تتمنى لحد انه يمرض ده شر مطلق، المرض ده جهنم حرفيا وانا ف عز التعب كنت باصبر نفسي بان سيدنا ايوب عيي سنين وماكانش على لسانه غير الحمد
١- مافيش احتياطات هتنقذك اعمل بس اللي عليك بس استعد و قوي مناعتك
٢- انك تتمنى لحد انه يمرض ده شر مطلق، المرض ده جهنم حرفيا وانا ف عز التعب كنت باصبر نفسي بان سيدنا ايوب عيي سنين وماكانش على لسانه غير الحمد
٣- الحاقا بقى لده، اما تعيا قرب من ربنا حتى لو ماكنتش بتركعها، انا عرفت حقيقي مقدار وساخة اللي بيرايد على مريضة حاطة مصحف قدامها وبتستنجد بربنا، هو مجيب المضطر اذا دعاه فارجوكم بلاش وساخة
٤- انا اخترت اعلن ان عندي كورونا ف المعتاد عشان ايا كانت نهايتها اللي هنشوفها مع بعض تعرفو ان الموضوع مش مأساة وان بكل الاشكال النفسية الكويسة هي اكبر سلاح ف الموضوع مش الادوية ولا الحاجات، الاعلام مكبر الموضوع لدرجة امك متخيل انه طالما جالك يبقى اكيد هتموت
٥- عرفت ان فيه كمية ناس اعرفهم جتلهم و مشيت في مصر وبرة مهولة و عدت ولا حد فيهم قال بم بس طبعا انا وايني بيتش زي مانتو عارفين
٦- اخيرا انا ماعرفش هتخلص ازاي، بس ايا كانت ان شاء الله لو خلصت على خير هاتبرع بالبلازما عشان اساعد غيري ضد المرض ده، وحتى ذلك الحين هادعي للناس كلها
٦- اخيرا انا ماعرفش هتخلص ازاي، بس ايا كانت ان شاء الله لو خلصت على خير هاتبرع بالبلازما عشان اساعد غيري ضد المرض ده، وحتى ذلك الحين هادعي للناس كلها
اه معلش حاجة كمان، بما انك كورونا بوزيتيف دلوقتي حد بالك بقى انك محتاج تتعاامل بحرص يعني مافيش دليفري او اكتب ورقة عالباب ان البيت ده فيه مريض كورونا ف الرجاء التعامل بحذر، عن نفسي انا كنت باخلي اصحابي يروحو يجيبو الحاجة و يحطوها قدام باب البيت وانا بادخلها لمنع الاحتكاك
النهاردة بقى يوم المراجيح العالمي، مش قادر اكل موزة اساسا وشوية احس اني كويس جدا بس ماقدرش اقوم من السرير اصلا فواضح ان الكارونا بتزاولني، اول مرة اخد هيدروكسي كلوروكين دلوقتي، من ناحية تانية خدت محلول جفاف عشان الجفاف كان عامل عمايله طبعا
تعالو بقى اكلمكم عن العذاب النفسي اللي بيجيلك مع كورونا، وحقيقي ده السبب الرئيسي اللي باقولكم تفادوه عشانه، اولا على سبيل المثال هتكره عيشتك كلها، لدرجة اني كرهت كاندي كراش عشان لعبتها ونمت و صحيت رجعت، وف الحلم كانت البتاعة اللي بتفرقع دي هي اللي قلبتلي بطني، مسحتها
بيتي اللي بحبه اوي بقيت شايفه قطعة من العذاب، كأنه زنزانة بيعذبوني فيها ومش قادر ولا عايز احب اي حاجة ف الكون، فكرة الاكل نفسها كانت بتقلبلي بطني ومابين وجع معدتي من الجوع و بين عدم قدرتي عن الاكل والحرارة عذاب
فكرة اي حاجة حلوة ف الدنيا راحت، كل اللي كنت بافكر فيه منظر البيت القذر والشوربة المعفنة اللي ناسيها عالبوتجاز وافكار تانية بعيدة كلها دبان حوالين جثث و لحم معفن و اشلاء بني ادمين، افكار من الجحيم حرفيا، طبعا مش بشكل واضح، بس لقطات بتحلم بيها وانت نص نايم و نص صاحي ومش عارف تعمل
طبعا تقول هالجأ للنوم بعد ماتاخد دش ساقع، حلو اوي، في المعتاد بتنام تروح معدي ١٠ ساعات مثلا لكن لأ، انت هتنام قد ماتنام وتصحى تلاقي نص ساعة عدت فتنهار و تحاول تنام تاني، تحاول بقى تذكر ربنا تستغفر تسبح تعمل اي حاجة عشان تنام تاني
لو هنتفادى الكورونا بس عشان اللقطة دي يا جماعة ف هي تستاهل جدا، هذاب نفسي بشع من افخر الانواع، الفيروس ده حرفيا من الجحيم
ابديت: من امبارح الحرارة عليت تاني مش زي ماكانت لكن اعلى، التحسن والتدهور شكله بيحصل فجأة و بيروح فجأة برضه مش عارف ايه ده، الملحوظة المهمة، ان مع التحسن الاسهال بيرجع، وكل ما الاسهال يقف الحرارة بتعلى والامور بتبوظ ماعرفش ده كلام علمي ولا ايه بس غالبا ده اللي بيحصل
جاري تحميل الاقتراحات...