كيف قدرت اسوي مشروع وانا ادرس الجامعة بنفس الوقت ، (بعت حصتي بالمشروع ب ثلاث اضعاغ المبلغ اللي استثمرته قبل لا اتخرج من الجامعة!) في الثريد الجاي ،
طبعاً الموضوع ماراح يكون عن المشروع قد ما بيكون عن كيف تنظم وتسوي هالشي واكثر باذن الله وتكون لك بصمتك عشان اذا تخرجت الكل يتمنى يوظفك او انت يوفقك ربي وتنجح بمشروع خاص فيك
البداية كانت باني جمعت مبلغ بسيط من وظيفه عملت فيها لاكثر من سنة بارت تايم من هالشغله عرفت ان الجامعة والدوام شي سهل انك توفق بينهم دامك منضبط وما تكبر وتهول بالموضوع
بديت بداية بسيطة لكن بشغف متجر ابيع فيه ادوات فنية مع شريك لي تطورت الى بيع منتجات فنانين وبالاخير صار المشروع تواصل داخلي مع اكبر المؤسسات والهيئات الحكومية
بالبداية بتكلم عن الجامعة ، ميزة انك بالجامعة هو انه عندك اساتذة في المجال اللي يدرسون فيه مثل الدكتور @Dr_AhmedAjina بالرغم انه ماكان يدرسني اي مادة لكن كان احد الدكاتره اللي تشوفهم بالكلية من الساعة ٦ الصباح من قبل المحاضرات ، جلست معه مره اعرفه بنفسي وبمشروعي ومن يومها
هو احد اهم الناس اللي ساعدوني بحياتي العملية والاكاديمية خلال فتره تواجدي بالجامعة وحتى بعد التخرج تواصلي معه موجود كثير اشياء يعود فضلها لهذا الرجل اللي طلع من سلك انه فقط معلم الى مرشد في كل شي وماقال مثل غيره انو انا مهيب وظيفتي اساعده وهو مو طالب عندي
مثل الدكتور احمد راح تواجه ناس كثير تدعمك لكن كل اللي يبونه منك انك بس تبدا ! ، وجود شريك معك بالمشروع اشوفه شي مهم جداً لايكون بس تجيبه عشان فلوسه شغفه اهم من كل شي للمشروع ، الرجال كان فنان ويحب الشغله كنا نتغدا ونتعشا بالمكتب ومانطلع حتى الويكند من الحماس
طبعاً اكثر شي فادني بمشواري هذا وزبده الكلام هو العلاقات ، حاولت ابني علاقات صحية بكل مكان بالجامعة مع الدكاتره بالمشروع بالمهتمين بالمجال وبالرياديين واصحاب المشاريع بشكل عام هي باختصار مفتاح الفرص كثير وظيفية كانت او مشاريع!
اتذكر مره جتنا فنانه مشهوره مره على مستوى السوشل ميديا وقالت انتم مشروعكم عن الفن وما الفن تعالو شاركو بمعرضي
كان حرفياً شي ماقد سويناه اول لكن استانسنا بالعرض اللي مايتفوت تدير معرض فني كامل ومنه طلعنا بعلاقات كثيير لان شغلنا اعجبهم ومنها لشغل اكبر اكبر الى ان وصلنا للعمل مع اكبر الشركات الخاصة والهيئات الحكومية.
التطور اللي صار للمشروع كان كبير جداً وصعب علي كطالب اني اوفق بينه وبين دراستي فاضطريت اني ابيع حصتي فيه عشان اكمل دراسه صح ندمت شوي لاني كنت اشوف المشروع راح ينجح اكثر لكن يكفيني اني عندي الخبرة اللي تخليني اسوي بإذن الله مثله واحسن بالمستقبل
الحين انا متخرج عندي ٤ عروض وظيفية وبخبرة ، وحماس ماله حدود ، مع انه كنت حرفياً اول ما دخلت الجامعة بس اتمنى اطلع منها بوظيفه من كلام الناس لكن اكتشفت ان الامكانيات اللي موجودة اكثر بكثير من بس كذا
هذي تجربتي وان شاء الله تكون لو شي بسيط مفيد لكم 🙏🏻
جاري تحميل الاقتراحات...