يا دكاترة مصر الحلوين الغلابة المطحونين. أنا عارف ظروفكم الصعبة وان السيستم سيئ ولازم تشتغلوا پرايڤت عشان تاكلوا عيش، وده مش عيب. بس من فضلكم لما تكشفوا على حالة اشتباه كوڤيد ١٩ ما تكتبولوش "بروتوكول علاجي" عشان تحللوا فلوس الكشف وتحسسوه بأهمية زيارته لكم اللي مكانش لها داعي أصلا

عزيزي الطبيب المحترم أنا عارف ان عندك ضمير وبالتالي مش هاتكتب لحالة عندها اشتباه كورونا مضادات حيوية وزيثروماكس وتاميفلو وواثق في ضميرك انك مش هتكتب له دوا ملاريا اعراضه الجانبية ممكن تموته لمجرد ان ترامب بيروج له!
كن أمينًا مع المريض وعرفه ان علاجه هو العزل المنزلي وشرب السوائل

عزيزي الطبيب المحترم لما يجيلك مريض عنده أعراض تشبه كوفيد ١٩ ما تطلبلوش تحليل پي سي آر دون داعي ... لو انت في بلد محدودة الموارد وكواشف التحليل عددها محدود، ساعد النظام الصحي في أن تكون الأولوية للحالات الحرجة اللي محتاجة مستشفى ورعاية مركزة