للمهتمين بالشعر الكيرلي ، #ثريد أتمنى يكون مُفيد لكم ، راح يكون طويل شويا ، لأني راح أكتب كل معلوماتي عن الموضوع ، عنايتي وإهتمامي ، ونصائح رئيسية ومهمة ، ونظرًا لضعف المحتوى العربي يارب يكون سبيل في تغيير حياة شعركم ، فضّلوه ، قهوتكم ، ويلا نبدأ 🧸.
اولاً ، عشان أكون صريحة معاكم ، موضوع الشعر الكيرلي ووصوله للمرحلة الصحية والمثالية ، يحتاج إرادة و قوة منكم ، وقرار داخلي بإنك مستعدة للتغيير، فإذا سويتي سكيب للأمور المهمة لصحة الشعر وإلتزمتي بس في المنتجات أو كيف تسوّي شعرك، حتكون النتيجة دايمًا ناقصة ، وهذا قرار ينبع منكم ❤️.
نصائحي ممكن تكون مستحيلة بنظركم مثل ماكانت مستحيلة بنظري ، ومثل مابعضها مازال للآن مستحيل ومو متأكدة من إلتزامي التام فيه ، لكن ! تأكدو ، إن النتيجة اخيرًا راح تكون مبهرة ، راح يكون شعركم صحي وجميل وطبيعي ، ومو محتاج إلا للمويا وكم منتج ويكون بيرفكت.
الخطوة الأولى والأهم والأصعب : لازم ينتهي من حياتك أو على الأقل يخف (الحرارة) بمعنى الإستشوار، السيراميك، الليس، الفير، إلخ، أعرف إنو صعب لكثير بنات ، وأعرف إنو فيه اسباب داخلية وممكن مظهرية وممكن معيارية من المجتمع، حيكون تحدّي لك ! لكنها الخطوة إلي حتغير حياة شعرك تمامًا.
التلف إلي يصير للشعر ، وخصوصًا الكيرلي بسبب الحرارة مايمديكم تتخيلوه ، وممكن التلف ياخذ سنين حتى يظهر ، لكن لما يظهر ! يكون صعب صعب وبياخذ سنين أخرى حتى نقدر نرجعّو لصحتو ، مشاكل تساقط ، الكيرلي يبدأ يختفي أو حتى مايلف ، نفشة ، تقصف ، ومشاكل كثير ، واسألوني شخصيًا.
الخطوة هذي بالذات تحتاج عزيمة ، وممكن شعرك يكون حاليًا تالف وحتقولي كيف بقدر أتخلّى عن هذا الشيء ؟ كيف بيكون شعري ، او ايًا كان ، حابة أقولك .. إنو قدّمي صحة شعرك على كل معيار ، ورأي ، وكلمة ، شعرك بيصير صحي تدريجيًا مهما أخذ من الوقت ، لكنو في نهاية الطريق حيكون مثالي.
الخطوة الثانية أو النصيحة الثانية : الصبغات ، أوكي معاكم أكثر وحدة تحب تصبغ شعرها وهذا الشيء للآن بالنسبالي صعب ، لكن الصبغات الدمار الثاني للشعر ، الصبغ المستمر ، ولو سحب لون اسوأ واسوأ ، بإختصار ، حاولو تبعدو عنها بقدر الإمكان ، شعري حاليًا ضرره من سحب اللون للأسف.
النصيحة الثالثة : الترطيب الترطيب الترطيب ، الشعر الكيرلي لو فيه شيء جدًا مهم عنو ، إنو عادةً يكون جاف ، وتقريبًا الأهم والأهم حتى يكون مظهر الكيرلي ملفوف ، ومتماسك ، ومو منفوش ، فالموضوع كلو عائد للنصائح إلي فوق ٥٠٪ والترطيب المستمر ٥٠٪ .
كيف ترطبي شعرك ؟ كل واحدة ممكن يناسبها شيء مختلف عن البنت الثانية ، ممكن تناسبك ماسكات طبيعية ، ممكن تناسبك زيوت ، بالنسبالي انا الزيوت هي الأفضل ، وهي إلي مستمرة عليها وخاصةً زيت جوز الهند ، ضروري اسبوعيًا من مرتين لمرة ، قبل الشور تتركيه على شعرك ، وبعدها يتغسّل طبيعي.
فيه طريقة قاعدة أسويها هالفترة وأحسها قاعدة تأثر على شعري بطريقة خيالية ، بما إنها إجازة وحظر ، إستغلوا الموضوع لصالحكم ، جيبو أي زيت أو كريم يناسب شعركم ويكون خفيف ، وقسمو شعركم وكل قسم حطوه عليه بشكل خفيف ( بدون الوصول للفروة ) وظفروه ، كل الشعر ، وبعدها ارفعوه وعيشو 🧸.
الترطيب ، مايكون قاصر فقط على الزيوت او الكريمات ، جربو ماسكات مختلفة بشكل مستمر ، انا مو صاحبة ماسكات لإنو اغراضها ماتتوفر عندي غالبًا ، فللآن مافي ماسك ببالي ، لكني في طور التجربة ولو فيه ماسك عجبني راح أنزلو بنفس الثريد ، ولو فيه ماسك ملتزمين عليه إكتبوه بالردود ❤️.
نبدأ الآن بعد ماعرفنا الأساسيات ، إيش الخطوات الصحيحة ، وإيش الاخطاء ، لازم نكون عارفين إنو الكيرلي يحتاج ( عناية خاصة ) ومنتجات مختلفة ، والأمور إلي تنفع مع الشعر الستريت ، تكون كارثة للشعر الكيرلي ، فلازم تبدأو من الصفر مع شعركم ، وتكتشفو إيش المناسب له ، بتطرّق أكثر.
١ - التمشيط : التمشيط ممنوع للشعر الكيرلي ❌ ، ممكن معلومة معروفة لكن لاحظت كثير برضو مايعرفوها ، الشعر الكيرلي لو إتمشط ينفش ، وينفكّ كل الكيرلي ، وكل شيء يخرّب حرفيًا ، التمشيط يكون مناسب وقت الشور ، او بعد الشور لكن بطريقة معينة راح أتطرّق لها ✅.
٢- منشفة الشعر : الكيرلي لابد له منشفة معينة خاصة فيه ومختلفة عن مناشف الشعر العادية ، يا إنها تكون فايبر تول وهذي تكون جاهزة تشتريها ، أو إنك تجيبي تيشيرت قطني من ملابسك وحيكون خيار متوفر عندك وممتاز ، المناشف العادية تسبب نفشّة ، وتجفيف الشعر فيها برضو ينفش الشعر ❌.
الآن نبدأ مع المنتجات : الكيرلي يحتاج لمنتجات برضو خاصة فيه ، الشامبو البلسم ، المنتجات الي تستخدم للستايلنق بعد الشور ، كلها لازم تكون مناسبة لشعرك ، وممكن الموضوع هنا يكلّف ماديًا شويا ، لإنو ممكن منتجات تناسبني ماتناسبك والعكس ، فالموضوع يحتاج تجربة مستمرة ✅.
راح ابدأ بالشامبو والبلسم : لما بدأت عنايتي بالشعر الكيرلي تابعت قنوات كثيرة اجنبية وشفت اكثر المنتجات المشهورة عندهم ، وإشتريت الشامبو والبلسم من الشركة الفلانية ، وكانت تقريبًا ( مثالية ) لشعري ، وكانت على تضرُر شعري إلا إن تعطي نتيجة مرة كويسة ، وماندمت ، ولكن 😅 !
لما خلص الشامبو والبلسم رجعت طلبت ، وتقريبًا كان صارلي اكثر من ٦ شهور إستخدام لنفس الشركة ، لما وصلت الطلبية الجديدة ، ماحسيتها كويسة .. ولاحظت فيه تساقط بشعري وانا عادةً الحمدلله ماعندي ! وكنت شاكة ، لما دخلت كعادتي على قنوات الي اتابعهم باليوتيوب كانت الصدمة 😅.
على شهرة هذي الشركة ، وإن الكل يستخدمها ، لكن طلع فيه قروب بالفيسبوك يضم فوق ٥٠ الف كلهم تضررو من المنتجات فجأة وصار فيه تساقط ومشاكل كثير ، نظريات كثير تقول التركيبة تغيرت او الشركة تغيرت ، المهم إني قطعت الشامبو والبلسم على طول مع إن كنت مبسوطة إن لقيت شيء يناسبني اخيرًا 💔.
مازلت استخدم بعض المنتجات للشركة ، المنتجات تكون بعد الشور للستايلنق ، لكني قطعت الشامبو والبلسم تمامًا ، لذلك ! انا مو حابة أنصّح فيها لإنو هذا الشيء أمانة ، ونصيحتي إلي يبغا إسم الشركة ومنتجاتها ، على الأقل مايكون إستخدامو بس منها ، يعني ينوّع في المنتجات المستخدمة ✅.
بعد ماقطعت الشامبو والبلسم ومع الحظر والمشاكل ، قلت أجرب منتجات سمعت عليها مدح وقريبة مني ، ومتوفرة في صيدلياتنا في النهدي ، وأظن إن للآن ، ثالث إستخدام لها بس ، آممم مو مرة عجبتني وبإنتظار طلبيتي ، لكنها كويسة عمومًا وسعرها كويس ، وممكن تناسبكم !
الآن مع البلسم الأسطوري 😍 ! كنت أستخدمه مع المنتجات إلي قبل وللآن ، وهو من ضمن طلبيتي القادمة ، ياجماعة أتعب وأقول إنو ممتاااااز ، ترطيب فظيع ، نعومة ، الكيرلي يكون بيرفكت ومتماسك ، بإختصار ( يجنن ) ناسب شعري بشكل خيالي ، وخالي من السولفات والجلوتين ✅✅.
خلال الشور : الاشياء إلي انصح فيها ، إنو قبل الشور يُفضل تمشطي شعرك ، ولو تايب الكيرلي حقك صعب ، تحت المويا مشطيه مافي مشكلة ، الأهم لا تتروشي وهو معقد ويتقطع ، طبعًا تتروشي عادي ، لكن وقت البلسم ، يفضل تتركي البلسم على شعرك مدة ٥ - ١٠ دقايق.
نهاية الشور ، ويكون البلسم كآخر خطوة ، نزّلي راسك لتحت ، وظهرك بحيث تكوني كأنك راكعة ، مدري كيف الوصف المهم 😂 ، لكن هالخطوة مهمة ، وبعدها غسلي شعرك وإنتِ على هذي الوضعية ، آخر غسلة خليها كذا ، وبعدها وإنتِ على وضعيتك لفي المنشفة او التيشيرت على شعرك بترتيب من الاطراف لفوق ✅.
الخطوة الأخيرة والستايلنق ، بعد الشور : تحتاجي اولاً لعبوّة بخاخ فاضية ونظيفة وحطي فيها مويا عادية ، ثانيًا طريقة التمشيط ، ثالثًا المنتجات المستخدمة للتصفيف ، راح ابدأ معاكم خطوة خطوة ، ومن هنا تقريبًا طريقة كيف تعملي شعرك 🧸.
اولاً : خطوة تقسيم الشعر ، يمديك تبللي شعرك كامل ( مايكون جدًا مبلل لدرجة يقطر ولا جاف ، لازم يكون رطب ) وبعدها تقسمي الشعر ، او مثل طريقتي أقسم جزء جزء ، وأبلل كل جزء لوحده وبعدها أحط منتجاتي عليه ، وأكمل كذا قسم قسم من شعري ✅.
ثانيًا : بعد ماقسمتي شعرك ، وبللتيه ، هنا نبدأ خطوة المنتجات ، تمام .. المنتجات إلي انا استخدمتها وكانت كويسة لشعري ، هو بديل الزيت من غارنييه ، بصراحة كانت فيه ايام أغسل شعري وأكتفي فقط فيه وبرضو كانت النتيجة حلوة ، ومنتجات الشركة إلي تكلمت عنها إن لا تستخدموها لوحدها Deva curl.
كيف الطريقة ؟ الآن جزء من شعرك متقسّم ومبلول ، تحطي عليه المنتجات ( لا تكثري لدرجة إن الشعر يصير ثقيل أو الشعرة تصير كأن فيها جل ) لأن الشعر بيثقل والكيرلي ماراح ينرفع ويلف كويس ، احط المنتجات بالترتيب على كل قسم من شعري عشان يوصل لكامل شعري ✅.
شيء مهم نسيت أقولو ، وقت تبليل الشعر مشطّو الجزء المطلوب ، وبعدها حطو المنتجات ( لا تكثرو بحيث يصير الشعر ثقيل وماينرفع ويلف كويس او يكون كأن فيها جل ) حاولو تكونو سريعين عشان الشعر مايجفّ ، بعد المنتجات سووّ نفس الطريقة بالفيديو ، وهي الحركة السحرية للشعر الكيرلي 😍✅.
طبعًا حركة الكرنش ، يمديكم بيدكم لكني أفضّل منشفة قطنية أو تيشيرت قطني ، لازم تكونو حنينيّن ومو بقوة لإن بينفش ، ارفعو الشعر من الاطراف لفوق بطريقة مرتبة لإن هذي الحركة هيا الي ترتب وتكوّن الكيرلي ، لاحظو طريقتها بالتمشيط بالفيديو عكسية وبعدها تسوي حركة الكرنش ✅.
بعد مانكون إنتهينا من المنتجات ، وحركة الكرنش ، وبدأ الشعر يتكوّن كويس ، نجي لخطوة تجفيف الشعر ، وهالخطوة ممكن تستغني عنها وتعتمدي على إن الشعر يجف لوحده طبيعي ، لكن لو تبغي كثافة ويكون مرفوع وحرفيًا يكون بيرفكت ، إستخدمي المجفف لكن مو بالطريقة العادية ✅❌.
تجفيف الشعر بالمجفف اولاً مايكون بالهواء لوحدو ابدًا ولو سويتوها رحبّو بأحلا نفشة ، ثانيًا ، يكون إستشوار عادي عندك وإنتِ يمديك تشتري الرأس المناسب للشعر الكيرلي وتركبيه على الإستشوار ، حقتي اشتريتها من سوق كوم ، وفيه اشكال وانواع كثير ، الطريقة نفس الفيديو بهدوء من تحت لفوق✅.
وكذا نكون إنتهينا ، تمام حابة اقولكم ، منتجات ديڤا كرل ، هي المنتجات إلي قطعت عنها لكني مازلت أستخدم منتجات الستايلنق ، لكن رجاءً يا إما عدم استخدامها او ماتستخدموها لوحدها ، طلبتها من امازون وسعرها غالي شويا ، بديل الزيت من صيدلية النهدي ، رأس الاستشوار من سوق كوم ✅.
شيء مهم ، انا مازلت في طور التجربة ، مازلت قاعدة احاول الاقي المنتجات المناسبة لشعري إنتوا كمان محتاجين تجربو وتلاقو المنتجات الأفضل لكم ، لا تبّخلو على شعركم ابدًا ، ودايمًا إهتمو لصحتو ، وترطيبو ، صارلي سنة تقريبًا قاطعة عن إستخدام الحرارة ، وهذي المنتجات إلي أستخدمتها ✅.
قنوات اشخاص اتابعهم على اليوتيوب وجدًا إستفدت منهم بخصوص الشعر الكيرلي ❤️.
أي آبديت جديد لمنتجات راح تناسبني ومجربتها راح أكتبها هنا ، وأي ماسك أو معلومة تخص الشعر الكيرلي جديدة راح أكتبها ، فيه طلبية لشامبو وبلسم راح توصلني قريبًا ومتفائلة إنها بتناسبني وبتناسب الشعر الكيرلي ، لو جربتها وكانت تمام راح أنزلها هنا ، شكرًا لكم ويارب إستفدتوا ❤️❤️.
@Rattibha رتّبها الله يسعدك ، شكرًا لك.
جاري تحميل الاقتراحات...