يلا دحين بسم الله نبدأ في فضح النصابين، عندي لكم حكايتين حلوين بس حنكتفي بوحده اليوم والثانية لاحقا 🧐
جاني مسج من رقم غريب على رقم العمل من واحد يسأل عن امكانية تسجيل مجموعة اطفال ابائهم مهندسين في شركة بناء جسور وانفاق بعقد سنوي ، رديت عليه اي نعم في امكانية ايش اسم الشركة وكم الاعمار والعدد قال حنرسلك جميع البيانات وانتي ارسلي لنا عرض السعر عالإيميل قلت اوكي ورسلتله العرض
رد عليا بموافقته على العرض ولكنه ماراح يرفعه للإدارة من باب انه بينصحني اسوي عرض ثاني ارفع سعري اكثر عشان الشركة من الاخر حتدفع مقابل خدمات اضافية مثل الوجبات الرحلات المهرجانات وحفل التخرج ،قلت طيب بس مارسلتلي اسم الشركة لسه قال كل شي موجود حارسله بعد الموافقه الإدارية على العرض
وسويت عرض جديد وصفقت السعر شويه وبعدمارسلته رد بموافقه الإدارة،ورسلي عقد رسمي مذكور فيه بيانات الشركةورقم اشتراك الغرفة التجاريةورقم السجل التجاري وكل تفاصيل التعاقد بيننا،وقال اطلعي عليه وشوفي ايش تبغي من شروط عشان نضيفها ، قلتله اوكي حاشوف واردلك وربي يقدم الي فيه الخير لي ولكم
اول شي سويته بحثت عن اسم الشركةفي النت مالقيتها موجودة، بحثت انجلش وعربي برضه ومافي شي،دخلت موقع وزارةالتجارة وسويت بحث برقم السجل التجاري الي كتبوه في العقد عشان يطلعلي اسم المنشأةطلع غير موجود ! رجعت كلمته قلتله انا بحثت عن الشركةمالقيت اي بيانات عنها ايش الشركةهذه وايش الحكاية
قال الشركة موجودة ومصرحة نعتذر منك قد يكون خطأ من الي اعد العقد انتي شوفي النقاط وضيفي عليها الي تبغي وبعدين ندقق فين الخطأ ونعدل البيانات ونرسل العقد النهائي بعد ماتكتبي نقاطك وتوافق الإدارة عليها، وبكرا حيكلمك المحاسب عشان يرتب معاكي الأمور المالية مبدئيا
انا بدأت أشك بس قلت نشوف يمكن العقد النهائي يلغي شكوكي ،المهم كلمني المحاسب وقال حنجهزلك شيك بنص مليون ريال يشمل الاشتراك السنوي لأطفال المهندسين وقال بس انا ليا عمولةفي الاتفاقات الي كذا قلتله ليه ! قال لأن مناقصات الاسعار انا الي أرشح بينها قلت اوكي يصير خير بعد اتمام الاتفاق .
وبعدها رسلولي العقد الي هوالمفروض النهائي ومعدل وفيه بيانات حقيقيةوخلاص معد فيه بعده ،لقيت نفس الاسم والشعار ورقم السجل التجاري واشتراك الغرفة التجارية نفسه واضافوا فوقها ارقام هاتف ثابت لمن بحثت طلعت حقت مشغل نسائي !!! ولايوجد موقع ولاايميل رسمي للشركة !!! هنا اتأكدت انهم نصابين
رجعت كلمته ودخلت في عينه انه نصاب وانه بيستهبل على راسي!! جلس يدافع عن نفسه يقول ليه أكذب وأدخل بمشاكل وتعالي حنرسلك موقع الشركة شوفي بنفسك التصاريح واتأكدي ، قلتله ارسلي كل شي عالواتس الموقع والتصاريح الرسمية،انا ماراح اوقع الا بعد مااعرض الموضوع على اخويا في أمن الدولةوالمحامي
قال من حقكم اكيد ، وخليت اخويا يكلمه من جوالي، وقاله نفس الكلام وايشبكم علينا ليه الشك فينا كذا 😂، عرفه بنفسه ووظيفته وشد معاه بالكلام قاله عندك فرصه لسه تثبت صدقك ارسل كل شي يخص الموضوع ذا وراح يتم التقصي عن صحته من عندنا، ان كان نصب راح يتخذ اجراء عسير، ارسلنا الموقع والتصاريح
قاله ابشر وماطلبت شي ومن حقكم الحذر وكل التصاريح حنرسلها لكم بكره بعد مااخذ اذن الادارة والشيك حيكون نقدي مصدق عشان تتطمنوا اكثر وموعدنا الخميس ، سألته ماخاف منك قال لا هذا ياانه صادق وورطوه، ياانه نصاب محترف متحكم بإنفعالاته 😂😂😂 بس نشوف للآن يقدر يثبت برائته قبل مانسحب فيه 😅
بعدها اختفى ولارسل ولاشي واحنا خلاص ماكلمناه بعدها عشان مايحتاط بزياده قبل ماينكفش هو والي معاه وكأننا خلاص اتجاهلنا الموضوع كليا ، وكل الأدلة والمحادثات الموجودة معايا سلمتها والموضوع لازال قائم وقريب انشاء الله يتم القبض عليه هو والي معاه 👍
الخلاصة لا تتعاقد مع احدمجهول الا لمن تعرف مين هو وتشوف اثباتاته الشخصيةوتصاريحة التجاريةوتبحث عن العناوين الي تجيك في العقود وتتقصى صحتها ،المكسب لهم في الموضوع ذا كله هو(العمولة)يقسموها بينهم طبعا احد يعطيك شيك مزور بنص مليون بدون ماتدري انه مزور ويقولك ابغا %5 انت حتقول يابلاش
عمليات النصب الكل معرض لها،ماراح تفلت منها اذا ماصحصحت وما دققت بكل شي ، لاحد يغريك بمبالغ كبيرةويضحك عليك بعقود مزوره ، انا لااملك خبرةطويلة مثل الاكبر مني سنا ومعرفة،بس علمت نفسي اني مااتسرع واتأكد دايما من كل شي ، واني مااغامر بالعقود الا بعد مااتأكد من انها حقيقية وقانونية👍
جاري تحميل الاقتراحات...