رتبها

ثريد بيبقى معي للتاريخ |
كيف أصبت بكورونا و كيف وضع كورونا و ايش صار معي وش الاعراض اللي ظهرت لي وكيف وضع المسحة و كيف اقضي وقتي بالحجر الصحي وان شاء الله قريباً اقلكم في الثريد اني تشافيت من كورونا ..

صراحةً قبل ماصيب بكورونا بفترة كنت اقول في نفسي كورونا هذا مب حقيقة معقول الى الحين ماشفت احد في محيطي او قريب مني أُصيب او شيء واكيد مرت عليكم هذي الفكرة لكن بالرغم من هذا كنت مأخذ احتياطاتي و بعد فترة ..

يوم الاربعاء 13 رمضان من عام 1441 احد الاشخاص بالدوام معاي جاء للدوام واستأذن بحجة انه يبغى يروح للمستشفى لانه تعبان و راح فعلاً وتم حجره ومشتبه باصابته بكورونا ماكنت قريب منه و لا خالطته ولكن خالطت شخص خالطه و كان يخش مكتبي ويجلس قدام مكتبي وكل هذا ماكان في بالي لسا ..

يوم الخميس 14 رمضان من عام 1441 داومت طبيعي و المعزول بالمستشفى مازال اشتباه و المخالط له بمكتبي موجود و كل هذا ماكنا نعرفه طبعاً وقتها ان اللي جالس قدامي مخالط المشتبه به واني خالطته الحين و انه مصاب هو و هو مايعرف انه مصاب حتى ..

يوم الخميس 14 رمضان نهاية الدوام سألنا المعزول وش عندك من اعراض ؟ قال سخونه و كحة و ضيق تنفس و صداع قلنا كفاية كفاية اسكت خلاص تأكدنا قبل ماتطلع نتيجة المسحة انها كورونا و رحت البيت و أرسلت بقروب العائلة بالواتس انا بالمجلس و راح اعزل نفسي هناك عشان فيه حالة اشتباه بالدوام ..

كانوا نايمين كلهم طبعاً وصحوا وشافوا الرسالة وكلهم تضايقوا وزعلوا انه كيف و ليش وخالطته و بتتعب و بتنصاب وتصيبنا معك و و و والخ ... كان يوم الخميس يوم صعب علي صراحةً مدري القاها من هم كورونا اللي ممكن يكون صابني والا هم لا ينصاب واحد من أهلي ..
عدى الخميس ودخلنا الجمعة 15 رمضان..

يوم الجمعة 15 رمضان كان يوم عادي مافي اعراض مافي شيء لكن محجور عن اهلي بالمجلس و فطوري يوصلني عند الباب و سحوري بعد و يوم السبت 16 رمضان ماختلف ابداً عن يوم الجمعة نفس السيناريو وعدى اليومين ذي تمام التمام ..
وش صار بعدها ؟؟؟

يوم الاحد 17 رمضان و تحديداً قبل العصر وانا اتفرج مسلسل يونس ولد فضة ( مسلسل قديم بس فضاوتي خلتني اشوفه على الجوال ) حسيت ان جسمي حار و نار و حسيت بخمول قلت يمكن عشان التكييف ويمكن اعصاب ويمكن وسوسة خليني انام احسن واريح الى المغرب ..

صحيت قبل المغرب عشان أفطر و هنا كانت المشكلة ..
سخونه عالية + الم بجسمي مب قادر اقوم من فراشي + صداع شديد ..
اذن وافطرت وشفت حرارتي بميزان الحرارة وكانت 38 و هنا عرفت مصيري شخصياً انه كورونا ولكن ماحبيت اخوف اهلي فأتصلت على 937 و خبرتهم بالقصة كاملةً ..

937 ماقصروا خذو بياناتي و بعدها بساعة اتصل علي رقم بدايته 051....... وقالوا لي عبدالرحمن يناسبك المركز الصحي الفلاني والا الثاني ؟ اخترت الاول لانه اقرب و فعلاً الساعه 4 الفجر جاتني رسالة موعد المسحة انها يوم الاربعاء 20 رمضان
عندنا كذا يوم الثلاثاء 19 رمضان بنتظر فيه المسحة ..

يوم الثلاثاء 19 رمضان كان يوم قلق من المسحة واللي زاد الطين بله ان الشخص اللي انا خالط المصاب الاول فاكرينه ظهرت له اعراض وراح مباشرةً بدون موعد واخذ مسحة 😔
و هنا خفت اكثر و اما بخصوص اعراضي فكانت يوم الثلاثاء حرارتي 37.7 تزيد 37.9 وتنقص الى 37.5 والم الجسم موجود ..

و يوم الاربعاء 20 رمضان عام 1441 صحيت بدون سخونه و بدون اعراض فعلية و تقريباً كان بس الم العظام و خفيف بعد و صحيت الصبح جهزت نفسي و خذيت سيارتي و رحت للمستوصف الظهر ودخلت لقيت قدامي 13 في صف واحد نبعد عن كل شخص متر واللي جو بعدي 20+ شخص و دخلت المستشفى و خذو بياناتي ..

و دخلت للممرضة او الدكتورة وخذيت المسحة اللي كانت خفيفة جداً و اللي ماحسيت فيها ابداً وكانها لا شيء يذكر و انا اعلمكم تراها ماتوجع لو كانت اليد اللي تاخذها كويسة ...
و رجعت بعدها على غرفتي بالحجر المنزلي و جلست ادعي و انا خايف و متوتر و انتهى يوم الربوع 20 رمضان ..

لا اخفيكم يوم الخميس 21 رمضان راح كله اتصالات على الرقم الخاص بعينات كورونا وابثرتهم اتصالات بعرف نتيجتي و كل ماعطيه هويتي و بعدها يسكت ويقول عبدالرحمن ؟ اقول ايه ؟ يقول تحت الاجراء ارتاح وبنفس الوقت مارتاح شعور غريب كنت بعرف وضعي كورونا والا مو كورونا ..

دخلنا يوم الجمعة 22 رمضان واتصلت عليهم الساعة 10 صباحاً وسألتهم عن عينتي رد علي ايجابية اخوي عبدالرحمن وفجاة عرقت لاشعورياً وتوترت مع العلم ان كان عندي احساس بنسبة 95٪ انها ايجابية لكن برضوا لماً تتأكد تخاف اكثر ..

وقالوا لي بنرفع لك بلاغ و كذا عشان يشوفون وضعك وصراحةً ماقدرت انتظر واجلس بالبيت و اشوف منظر اهلي وهم يشوفوني قدامهم مصاب بكورونا و استغليت انهم نايمين و قمت خذيت شور و لبست ثوبي وتوجهت لاقرب مستشفى واللي هو مستشفى النور في مكة هذا الكلام كان ظهر يوم الجمعة 22 رمضان

ودخلوني عندهم المستشفى و كالعادة سألتني أمي صليت والا ماصليت و ماحبيت اخوفها وهي توها صاحية و صار هذا الكلام بيننا و احاول مابين لها ان حالتي ايجابية لين ماستقر وكذا

دخلت عندهم وسألوني عن الاعراض و حكيتهم كل الكلام اللي قلته من اول الثريد وقالوا عندك مكان بالبيت تحجر نفسك فيه ؟ قلت صراحة فيه مكان لكن نفسياً و ماضمن بعد انهم ماينعدون اهلي ومقدر نفسياً اكون معهم واجلس اشيل همين هم المرض وهم الخوف عليهم ..
قال خلاص بنجلسك عندنا هنا وننقلك لفندق

جلست فعلاً يوم الجمعة و السبت 22-23 رمضان بالمستشفى و ماكان عندي اعراض ولله الحمد كانوا يعطوني محلول مغذي و حبوب مضاد حيوي وخافض حرارة و كانوا يعطوني فطور الصباح و الظهر غدا والليل عشاء بس صراحة مانمت زي الناس عشان كانت اللمبة شغالة

وهذي صورة للغداء برضوا و هذي الاسهم حقت المغذي اللي حاولت افهمها بس مافهمتها للاسف المهم جلست بالمستشفى الى يوم الاحد 24 رمضان و تحديداً الساعه 3 ونص عصراً

قبل مايطلعوني بربع ساعة خذو مني المسحة الثانية وللاسف المرة ذي الممرضة ماكانت متمرسة مرة فكانت توجع شوي المسحة بس برضوا وجع مؤقت يعني دقيقة كذا بس وراح الالم ..
و بعد المسحة عطوني 3 ادوية ( مضاد حيوي - مسكن الالم - حبوب حموضة ) وعطوني الورقة و نزلونا تحت للباص على الفندق👏🏼

بعدها فعلاً ركبونا الباص ونقلونا لاحد الفنادق الـ 5 نجوم في مكة وقريب من المستشفى و دخلوني بالغرفة و بدأت رحلة العزل بالغرفة و بدأت افكر بالنصيحة اللي نصحوني كثير النفسية النفسية النفسية اهم شيء
الاحد 24 رمضان

المهم فعلاً دخلت واول شيء سويته بالحجر انتظرت ملابسي توصلني وخذيت افضل شور لانه كان بعد تعب يومين بالمستشفى و واكلت و شربت و بعدها جات افضل نومه نمتها تقريباً بالحياة لانها نومة بعد تعب يومين
و لمن يسأل حالتي مستقرة ومافي اعراض كان وقتها

يوم الاثنين والثلاثاء والاربعاء والخميس والجمعة مافي شيء معين ..
انام بعد الفجر - اصحى الساعة 11 صباح - اتابع حلقة مسلسل الفتوة و بعدها اصلي الظهر وبعدها يا انام الى 4 ونص و 5 عصر ياجلس كذا لين المؤتمر حق الصحة و بعدها انام الى 6 او 5 ونص
و اول ماصحى العصر طبعاً ارتب الغرفة

طبعاً ارتب الغرفة واجهز مكان فطوري وبسنابي اتكلم يومياً العصر على موضوع كذا من باب الفضاوة و بعد المغرب اتابع مسلسل الاختيار و العشاء اتابع البرنس و بعد البرنس با ابث لكم بتويتر يا افك موقع دروب ( اخذت للحين 4 دورات بالحجر ) و جالس اراجع حفظ جزء عم

طبعاً نتيجة المسحة الثانية طلعت وكانت ايجابية و الاعراض مافي اعراض الحمد لله ماعدا احياناً النفس يكون قصير بمعنى كل 3 كلمات اقولها اخذ نفس ولكم بشكل عام الوضع تمام ومستتب و اليوم اهلي جابولي من فطورهم 🙏🏼❤️

و صراحة وماخبي عليكم ؟
متأثر جداً اني ماراح اعيد مع اهلي :(
حتى وان كان العيد مختصر السنة ذي بس برضوا زعلان عشان مابكون بينهم و تراهم جابوا لي اليوم حلاوة العيد ومفرحات كذا وقهوة عشان صباح العيد احتفل لوحدي مع نفسي كذا

المهم مافي شيء بعد معين اقوله لكن اي شيء يصير راح اغرد به تحت التغريدة ذي ان شاء الله
❤️❤️❤️

@raheemah556 معليك انا اعلمك

و كان هذا اخر فطور برمضان في الحجر الصحي 🙏🏼❤️

و بدت تكبيرات العيد بعد العشاء وسمعناها من الغرفة طبعاً مسجد الراجحي في مكة ❤️

دقوا علي الغرفة وقالوا تعال دور M عندك مسحة ثالثة الحين
واحس اني مبسوط يارب تكون مسحة خير و ياخذونها وتكون سلبية يارب ❤️❤️❤️

هذا العيد اول عيد أعيده بعيداً عن اهلي بسبب كورونا ولكن كلمت اهلي مكالمة فيديو و صنعت لنفسي جو عيد بالحجر زيكم

صار اللي ماحسبنا حسابه😅
جدتي ماعلمناها عن اصابتي من باب مانشغلها ونقلقها اليوم وحدة من عماتي اتصلت على جدتي و عايدتها وقالت لها والف سلامة على عبدالرحمن والله يشفيه قالت مين عبدالرحمن؟ قالت ولد بنتك قالت وشششو ؟؟؟ المهم كلمتها فيديو المغرب وقلت لها اني محجور بس ومو مصاب وبس😂

بعد 5 مكالمات مشغول والمرة السادسة ردوا علي وسألتهم عن مسحتي الثالثة اللي تمت يوم 30 رمضان رد علي بكلمة سليمة ..
قلت سليمة يعني نفس اول ثنتين ؟ قال لا يعني سلبية ❤️❤️❤️❤️
الحمد لله

و هذي تغريدتي على نتيجة المسحة الثالثة وشفائي❤️
وطبعاً للحين انا بالفندق وماطلعوني ولا خبروني لسا وانتظرهم نشوف وش الالية اللي عندهم هل خروج والا ياخذون مسحة رابعة للتأكد والا ايش بالضبط🙏🏼❤️

وبعد 12 يوم من الحجر الصحي ..
وبعد 14 يوم من تاريخ المسحة الاولى الايجابية ..
و بعد 16 يوم من تاريخ ظهور الاعراض ..
و بعد 18-19-20 يوم من التاريخ المتوقع لالتقاط الفيروس..
و مع الغيوم و اصوات الرعد بمكة اخرج اليوم من الحجر الصحي ولله الحمد بعد ظهور النتيجة للمسحة الثالثة سلبية ❤️

الحين عندي سؤال ماعرفت جوابه اذا رجعت البيت اسلم على اهلي عادي والا لا ؟ 😂😂

حن الغريب ورجع لاهله ..
عود مع الغيم لاحبابه ..
هب الهواء وقام ينده له ..
الله لا يحيي كورونا ولا يحيي ماجابه 😂❤️
راجع لاهلي ولبيتنا ❤️❤️❤️

و هنا بعد بالبيت حن الغريب 😂❤️❤️
الحمد اله على سلامتي ❤️

للي يسألون نتيجة المسحة كم تاخذ وقت بعد تجربة 3مرات تاخذ يوم ونص
بمعنى لو خذيت المسحة الساعة وحدة ظهر اليوم تطلع بعد بكره الصبح يعني اقل من يومين
ولو سويتها بالعشاء تطلع بعد بكره العصر ✅
لو تبي تعرف نتيجتها عندنا بمكة هذا الرقمين بس مدري عام والا لمكة بس
0515350290
0515350291

كثير ناس يسألوني اسئلة موجودة بالثريد بس ماقروا ، انا هذا الثريد سويته عشان اوريكم التجربة اللي مريت فيها شخصياً و طبعاً تختلف من شخص لشخص وماهي ثابتة التجربة ولكن بالمجمل نتفق كلنا على امور كثير منها
🔴 اللي عنده سؤال مو موجود بالثريد جوابه يسأل 🔴

@Rattibha
رتبها

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد