قبل ٩ يوم بابا جاتو حمى و كحه مشينا مستشفي قالو لينا اشتباه كورونا لازم تضربو لي ناس الوبائيات عشان يجو يعملو ليكم الفحص ضربنا لي ناس الوبائيات انو عندنا حاله اشتباه بكورونا و ظهرت عليهو أغلب الأعراض ، و انو ابوي كبير و عندو سكري و كدا قال لي في اقل من ٢٤ ساعه حنكون معاكم
ضربنا اليوم التاني ردت لي بت قالت لي نحنا ما بيدنا حاجه نعملها قلتا ليها طيب بي يد منو قالت لي رفعنا البلاغ ما عليكم الا تنتظرو ، اليوم البعديهو بابا تعب شديد و السكري بتاعو ارتفع شديد مشينا مستشفي رويال كير عشان هم القالو لينا اشتباه بي كورونا ابو يمسكوهو قالو لينا ما عندنا
ما عندنا امكان عزل و الطوارئ ما شغاله مشينا الساحة وريناهم انو اشتباه بكورونا عشان ما يخالط الناس القاعدين ديل بس عاوزينهم يركبو ليهو دربات عشان السكري ينزل لمن عرفو اشتباه بكرونا قالو لينا ماف سرير فاضي قالو لينا امشو مستشفي الشيخ مشينا لقينا المستشفي فاضيه
دا قالو لينا امشو مستشفي الراقي عندهم طوارئ أخيراً مشينا مستشفى الراقي صراحه اكتر مستشفي ناسها بعرفو يتعاملو المهم ركبو ليهو دربات و نزلو السكري لحدي ما حالتو استقرت وعزلوه في غرفه فاضيه يومين مستنين الوبائيات عشان يعملو ليهو الفحص هناك ما جوهم برضو بعد كدا قالو لينا اعزلو
في البيت لانو ما محتاج اكسجين الحمدلله ، رجعنا البيت حجرناهو في البيت ضربتا ليهم تاني قالو لي ما عليك الا بالقرض و المكون !!!! و بتقول لي علمي علمك ما عارفه حاجه ! ما عارفه حاجه قاعده تسوي شنو هنا طيب ، المهم لحدي الليله ماف زول جانا ، الحمدلله ربنا ستر و اسي بابا حالتو اتحسنت
ضربتا ليهم قريب خمسه مرات وكل شويه بقولو لي كلام ، و شكلو ما حيجو اصلا فياجماعه اقعدو في البيت عليكم الله لانو لو لا قدر الله زول جاتو كورونا ماف زول يعمل ليهو حاجه شايفين براكم المستشفيات عاملة كيف ماف طوارئ شغاله ماف حته يعزلو فيها ، ماف دربات في الصيدليات ماف بندول ماف اي حاجه
عشان ما تخت نفسك و عيلتك في موقف زي دا #stayhome وربنا يحفظ الجميع
جاري تحميل الاقتراحات...