احلى وانعم بيتى فور فيكى يا مصر وعلى ضمانتى وبالبركة وخليها على الله ..
المقادير : كيلو دقيق مبدئياً ( وهنحتاج كوب دقيق زيادة عن الكيلو نلم بيه العجين فى الآخر عشان انواع الدقيق بتختلف ) ..
+ معلقة صغير بيكنج بودر + كوب ونصف سكر بودرة ( ممكن يوصل كوبايتين للى بيحبه مسكر )

+ 5 صفار بيض + كيلو الاربع زبدة ( لو معندكيش ميزان هاتى الكيلو وشيلى منه كوباية مليانة) .
الطريقة : اضربى الزبدة الباردة مع السكر البودرة لحد تبقى كريمة ضيفى صفار البيض والفانليا ( يستحسن تكون فانيلا سايلة بتضيع زفارة البيض وتدى ريحة جميلة) بعد كده انزلى عليهم بكيلو الدقيق

المنخول معاه معلقة بيكنج بودر صغيرة ... نلم العجين ومنعجنش كتير ... فى المرحلة دى هنلاقى العجينة لسه سايحة وهو المطلوب فى المرحلة دى اللى عايز يقسم العجين جزء ابيض وجزء بالكاكاو يعمل كده ... الجزء الابيض هنرشه بشويه دقيق لحد العجينة ما تلم معانا والجزء البنى هنرشه بالكاكاو الخام

برضه لحد ما تتلم معانا العجينة وتنعم ... كده تمام نشكل العجينة بماكينة البيتى فور او بالقمع او بالكيس على حسب اللى عندك .. واخبزى على درجة حرارة 170 لحد القعر ما يصفر بسسسس (البيتى فور مبيحمرش يا جماعة ) لو حمرتيه زيادة هيمرر لانه فيه زبدة كتير ... سبيه يبرد و زوقيه براحتك وعيشى