لما تتعامل مع جهة عملت صفقة مع المواقع، انها تسيبها تشتغل في مقابل ان المحتوي العربي يتشال ويفضل المحتوى الاجنبي المتهكر.. فالكلام عن حقوق الملكية الفكرية هنا يحمل الكثير من علامات التعجب.. فخلينا نتكلم عملي، محتوي شاهد ونتفلكس برضه متاح بشكل غير شرعي لكن الناس بتشترك ليه؟
أول حاجة الفلوس مقابل القيمة.. يعني انا لو هادفع ١٠٠ جنيه في نت فلكس، باشتري بيهم ايه؟ محتوى جيد جدا لممتاز وجزء كبير منه حصري، مش هتشوفه تليفزيون او سينما.. تطبيق يعتمد عليه ومليان مميزات في طريقة العرض وسهولة الاستخدام.. وفرت مجهود وقرف تنزيل المحتوى غير الشرعي.
طيب شاهد؟ اول حاجة شاهد ما قبل ظهور واتش ات، كان المحتوى نفسه مفتوح بدون اشتراك وباعلانات، وبعدين جزء قليل بيدخل ويبقى حصري للمشتركين وبعد رمضان.. وده عادل جدا ومنطقي وكانت مشكلته الوحيدة ان التعامل مع يوتيوب اكثر سلاسة وسهولة في الاستخدام والتطبيق بطيء ولا يعتمد عليه قوي
طيب، من سنة أو أقل شاهد قررت تدخل تجربة شبيهة بنتفلكس وتنتج اعمال حصرية تتعرض بس على التطبيق.. طيب كدة انت لازم تدفع. عملوا ايه؟ ادوك اسبوع مجاني تتفرج على المحتوى بتاعهم وعملوا عرض انك لو اشتركت تقريبا خلال شهر فبراير فقيمة الاشتراك ١٨ جنيه مدى الحياة!!
نزلوا بأعمال مبشرة إنتاجيا ومليانة نجوم ومخرجين كبار ومعمول فيها مجهود، زائد انها بتقول ان رقابيا السقف أعلى من الأعمال اللي بتتعرض في على الشاشات. بالاضافة لتحسينات في التطبيق واستخداميته خلته يعتمد عليه الى حد ما. زائد محتوى أجنبي ومحتوى أجنبي للاطفال مميز.
هنا المستخدم بيحسبها ١٨ جنيه مقابل كذا وكذا وكذا وبيقرر هو كسبان في الصفقة دي ولا لأ..
وده اللي اغلب الناس اللي بيملكوا القرار في المنصات فهموه من بدري.. مش هتعرف تحارب القرصنة، فقدم للناس محتوى ،مميزات وتسهيلات تخلي أغلبهم يفضلوا يشتروا وقتهم ومجهودهم ويشتركوا عندك.
وده اللي اغلب الناس اللي بيملكوا القرار في المنصات فهموه من بدري.. مش هتعرف تحارب القرصنة، فقدم للناس محتوى ،مميزات وتسهيلات تخلي أغلبهم يفضلوا يشتروا وقتهم ومجهودهم ويشتركوا عندك.
طيب نيجي لواتش ات بقى عملوا ايه؟ اختاروا اضعف المواسم انتاجيا وقرروا ينزلوا بتطبيق مليان مشاكل تقنية وباشتراك قريب من اشتراك نتفلكس ومنغير فترة تجربة ولا حتى سامحين لك تشوف ايه المحتوى المتاح.. النظرية الجشعة الغبية بتاعت انا داخل اكسب من أول يوم..
النتيجة؟ فشل ذريع
النتيجة؟ فشل ذريع
فشل وعدم مصداقية وفقدان ثقة ومشاعر عدائية لأنك قفلت على الناس في مصر يوتيوب وحتى المحتوى اللي كان بيبقى مفتوح على شاهد قفلته في مصر بس، وكإنك جاي تقرف المصريين بالذات.. خصوصا وانك كنت بتكسب من اعلانات يوتيوب وبتكسب من الكمية المهولة لاعلانات الفضائيات وكإنك قاصد تقرفهم بس
تسكت، لأ رحت جاي قافل القنوات اللي بتعرض المحتوى القديم من يوتيوب وحطيته عندك بنفس قيمة الاشتراك.. وطبعا الناس شافت ان المحتوى ده تم انتاجه بفلوس الدولة اللي هما دفعوه من ضرايبهم فانت عايزهم يرجعوا يدفعوه تاني اشتراك لسبب مش مفهوم، لإنه برضه كان محطوط مفتوح باعلانات وانت بتكسب..
محدش برضه بيشترك، تعمل ايه؟ تقرر فجأة ان المواقع اللي عليها اعمال مقرصنة دي غلط ويلا نقفل المواقع دي جوة مصر، وكان ممكن تكسب شوية ناس في صفك في الحركة دي، لكن تقرر بدناءة شديدة انك تعمل معاها صفقة وتسيب الاجنبي المتقرصن وتقفل بس العربي!!
خلاص كدة انت فقدت أغلب الناس اللي ممكن يحسوا بتأنيب ضمير لو اتفرجوا على محتوى مقرصن، انت بنفسك سايبه طالما مش من انتاجك ومحدش عارف المواقع بتدفع لك اتاوة ولا ايه؟ وكمان ده انت واخد المحتوى اللي تم انتاجه بفلوسي وعايزني ادفع عشان اشوفه.. فا ايه..
طيب زود على كدة، ان الانتاج ضعيف.. اعمال من ضعفها وهبلها اثارت السخرية.. مفيش انتاج حصري، ما هو بيتذاع على التليفزيون.. مين هيدفعلك ٦٠ جنيه ولا حتى ٣٠ جنيه.. واللي هيدفع في رمضان عشان يشتري دماغه، هل متخيل انه مش هيلغي الاشتراك بعد رمضان.. اصل مفيش حاجة عندك تقدمها بعد رمضان.
فده نموذج للفشل نتيجة لعدم دراسة السوق، المستخدم، المنافسين.. محاولة نسخ تجربة ناجحة.. نظرية انا داخل اكسب من أول يوم وكإن دي النظرية التايهة اللي العالم كله مكنش شايفها وانت اكتشفتها.. زائد انك مش بتحسن بجد في التطبيق وغالبا مش عايز تستشمر فيه عشان ارباحك العظيمة ما تقلش..
فحظ جيد بقة في مطاردة قنوات تيليجرام ومطاردة أي حاجة هتظهر لو قفلت تليجرام.. وأرباح سعيدة، في ظل العقلية الادراية السبوبية العظيمة دي..
جاري تحميل الاقتراحات...