رتبها

هاليومين جالسة اعيش حالة تأمّل لكل أحداث الخمس سنوات اللي راحت، بكل أيامها ومواقفها، بكل الأشخاص اللي التقيت فيهم بالجامعة ..

أول يوم بالتحضيري، أول يوم بالتخصص، أول صديق، أول اختبار، أول كود كتبته وكيف كنت مبسوطة جدًا ولحد يكلمني 😂!
وحتى أول معلم لطيف جدًااا @amal_cs14 ❤️

أيام ادور على جهة تدريب كويسة وكمية التوتر لمدة ترم كااامل كل الناس تأزموا معي ..
ماجاني قبول إلا بكم جهة وماكنت مقتنعة فيهم، لين قلت خلاص بس بسلم أوراقي وبكيفه، رحت مكتب المشرفة مالقيتها وارجع البيت معصبة منها كيف تعطينا أوقات ولا تلتزم فيها!!

شوي إلا يوصلني إيميل قبولي بالمكان اللي تمنيته وكنت ابيه من البداية 😭
وللحين اشوف أيام التدريب غيّرت فيني الكثير من الناحية الشخصية قبل العملية.. التقيت بناس ملهمين وعشت أيام ممتعة ورهيبة

وبعدها مشروع التخرج واللي كل ما اتذكر كيف زميلة كلمتني عشان ادخل بالفريق اللي جمعته واللي فعليًا ماكنت اعرف إلا وحدة منهم..
توكلت على الله ووافقت و يا الله كيف كانوا من أفضل الناس اللي تعرفت عليهم، مريحين ومتعاونين وأخلاق ❤️!!

حتى مشرفة المشروع كنا ندور على أفضل دكتورة، لين كلمنا دكتورة كويسة والحمدلله وافقت وأعجبتها الفكرة😍، اسبوع إلا تكلمنا تعتذر لظروف..
وقتها حسينا بضياع مررره وكيف كل الدكاترة الكويسين اكتفوا خلاص!

وبدون تخطيط ندخل عند دكتورة محد فينا يعرفها وتكلمنا معها وارتحنا لها.. وللحين ممتنة لها ولشدّتها معنا إلا أننا طلعنا بنتيجة كلنا فخورين فيها الحمدلله.. ❤️

أحداث كورونا وضغط آخر ترم قبل التخرج هي أيام مستحيل أنساها لأنها ماكانت سهلة، كانت أصعب مما يبدو علي.. نوم قليل تفكير ، أشياء كثير تكنسلت ، ضغط نفسي وشغل مايخلص
لكن رغم هذا، الرضا كان رفيقي ودايم استشعر أن كل شيء يحصل بحكمة تجهلها عقولنا الصغيرة اللي تنظر للأمور من زاويا ضيقة..

الحمدلله على عائلتي وعلى كل الأشخاص اللي كانوا معاي معنويًا، ممتنة لكل كلمة ومشاعر طيبة وصلتني