نهار مات الوالد الله يرحمو كنت صغير ما فايتش طناش لعام، كبرت، قررت نولي نمشي نزور القبر ديالو. مشيت اول مرة و كنت متوقع ان القبر ديال الوالد غادي يكون حالتو حالة و انه غادي يكون موسخ و مغطي بالربيع و الشوك...بحكم ان العائلة ساكنين فمدن اخرى و حتى حد ما كان كايزورو...👇🏼👇🏼
ملي وصلت بديت كانقلب كان صعيب عليا نلقى القبر و دزت حداه شحال من مرة و ماشفتوش، ماشي حيث كان مكرفس بل لانه كان نقي و مجير و ومزروع فيه شي نوار زوين و مغسول و مسقي. تصدمت ما فهمتش، قلت ياكما شي حد غلط فالقبر و تهلا فقبر الوالد. قلت فراسي من لخير و قريت عليه شي بركة و مشيت فحالي...
...و بحكم انني كنت خدام فمدينة اخرى ما قدرتش نرجع نزورو حتى دازت شي ربع شهور. نهار عاودت مشيت نزورو ليقيتو فنفس الحالة، نقي مغسول و مزروع من اجمل ما يكون، ضرني راسي سولت الوالدة قالت لي انها ما عمرها مشات من سنوات حيث عندنا فالعائلة العيالات مكايمشيوش للمقابر..
..مشيت من بعد عند العساس ديال المقبرة ضورت معاه بشي بركة و سولتو. قال لي بلي واحد السيد من ذوي الاحتياجات الخاصة كايجي نهار الجمعة مرة كل زوج اسابيع من سنوات للقبر و كايجيب معاه قريعة ديال الما زهر و كايطلب بيدون ديال اما و كايبقى ينقي فالقبر و يقرا عليه و يدوي معاه عشرة دقايق..
..و كايمشي فحالو. قررت نعرف شكون هاد السيد عدة مرات كنت كانخرج من الخدمة نهار الجمعة و نشد الطريق ونمشي للمقبرة على امل انني نشوف هاد الشخص شكون و نفهم علاش كايدير هكا...حاولت شي ثلاثة دالمرات و ماتوفقتش فانني نتلاقا معاه...وصيت السيد لي حاضي المقبرة و خليت ليه التيليفون و والو..
..دازت تقريبا شي ثلثسنين وانا كانحاول و ما عمرني قدرت نعرف شكون داك السيد مع انني كانعقل على صحاب الوالد كلهم و كنت على اتصال بيهم. و كل مرة كانمشي كانلقى داك القبر على احسن ما يرام. حتى لسنة 1999 كنت ما زرتش الوالد اكثر من شهرين و ملي مشيت لقيت القبر ما مصاوبش..
..درت اللازم سولت العساس قال داك السيد ما بقاش جا مدة هادي، شي عام من بعد ما بقاش بان داك السيد و حرت ما عرفتش اش وقع ليه كل مرة كانمشي كانسول ما كاين خبار. حتى لسنة 2003 عاد عرفت بلي مات ف 99 وراوني قبرو و سبحان الله كان مقابل مع قبر الوالد و بينهم عدد ديال القبور ولكن..
..جاو فنفس الصف كل واحد من جهة، قال لي داك العساس بلي عرف ان داك السيد كان ما فحالوش و ساكن بوحدو و غير ولد باب الله و الاعاقة ديالو ما خلاتوش يخدم و كان كايبيع الميكة فواحد السوق، ولكن هادشي ما كانش كافي باش نعرف العلاقة بينو و بين الوالد..ماتو بزوج ومات معاك سر هاد الصداقة..
..وهاد الوفاء لي كايبقى حتى لبعد الموت. لليوم كل مرة كانمشي كانترحم على الوالد و على سي المصطفى و كانكلف واحد السيد ينقي القبرين ديالهم عل الاقل مرة فالاسبوع. ملي كاتدخل للمقبرة كايبانو دوك زوج قبورة (ولو انهم عاديين و بساط فالبني ) الا انهم مسبوغين، و نقيين و مزروعين..
..كايعطيو انطباع ان كاينة شي علاقة بينهم!
جاري تحميل الاقتراحات...