أنا دكتور بابكر عبد السلام أحد الاطباء في مركز العزل في ولاية كسلا ، الوضع كان مستقر الى ان بدات الحالات بالتساقط و الحالات اغلبها من الكوادر الصحية اطباء وممرضين و اتنين من المواطنين . رسالة عايز أوجهها للكوادر الصحية اولاً : كونك قاعد في بيتكم دا ما معناها انك safe من المرض ،
وكونك رافض انك تشتغل في مراكز العزل في أي مكان في السودان دا بينقص منك كطبيب وكونك خايف من المرض انه يصيب اهلك دا من حقك بس المرض حيجيك في بيتك انت واهلك لو ما انت كنت من الناس البتحارب المرض .
رسالة لوزارة الصحة الاتحادية ووزارة الصحة ولاية الخرطوم : عدد الناس اللي بتموت بأمراض غير كورونا اكتر من اللي بموتوا بي كورونا ، انت ما ممكن تشتغل كورونا و تهمل الطواريء والحالات الحرجة التانية، الوزير ما عنده خطة و فشل ومافي زول بينفذ أسس الخطط العالمية يبقى على الشعب السلام
رسالة لكل الشعب : كورونا ما بتعمل ضعف جنسي ، كورونا ما وصمة عار ، كورونا ما شتيمة دا مرض فيروسي بيصيب اعضاء اساسية في جسمك التنفسي والقلب والكلى والكبد والدماغ ، كونه جاتك كورونا ما معناها انت حتموت بي كورونا طالما انت شاب وما عندك امراض مزمنة يبقى انت نسبة شفائك عالية جداً
٨٠٪ من اطباء مركز العزل جبرة نتيجتهم بوزتف و شغالين لانه ما عندهم اعراض و حالتهم مستقرة . امريكا بريطانيا كندا في اطباء بعرفهم معرفة شخصية قالو لي مستلزمات الحماية عندنا بسيطة وفي مرات ما كان في غير كمامة و جونتات وبرضو شغالين
لو ما الناس اتعاونت كلها ووقفت سوى حنبقى زي الاكوادور مافي دكاترة ومافي مستشفيات و الجثث مرمية في الشوارع ومافي الزول البدفنها . لو كل الناس اتكتمت وما بلغت وخافت من العزل او الحجز يبقى قصاد كل حالة بوزتف في ٣ بوزتف معاه وهم معاهم ٩ بوزتف . الله المستعان
جاري تحميل الاقتراحات...