ثريد مزارع الدواجن: قبل ما تبدا تنشئ مزرعه دواجن سواء لاحم ام بياض لازم اول حاجه دراسه المشروع بدقه والإلمام بكامل جوانب المشروع من جوانب عديده الموضوع محتاج مساعده المختصين وأداره سديده وهو مشروع لو ما اتعمل صح نسبه الخطر فيه مرتفعه اول حاجه لازم تحدد هدفك من المشروع؟
يليه تحديد نوع الداجن والناتج منه ( دجاج +بط إلخ ) لاحم ام بياض؛ البياض بياخذ زمن اطول من اللاحم اما اللاحم كتكوت بيتم تسمينه وذبحه خلال ٤٥ يوم بعد اكتمال دوره التسمين اما البياض فدوراته بتاخد زمن اطول ينتج فيها الدجاج البيض يوميا
في ٣ أنواع من نظم تربيه الدجاج ( النظام المغلق+ شبه مغلق+المفتوح) عندنا في السودان بسبب الظروف البيئية المزارع بتكون شبه مغلقه او مغلقه _حسب راس المال وحجم المشروع_ يتم التحكم في درجات الحراره بمراوح او مكيفات وفي النظم المتطوره يتم التحكم إلكترونيًا بالمزرعة
قبل بدايه المشروع لازم تكون في خطه ماليه كامله (انا عندي مبلغ كم؟ العندي دا بجيب شنو؟! عشان أنفذ المشروع ح اتكلف كم ؟! وكيف اقلل التكلفه ؟والعائد المالي كم؟!) مع مراعاه عوامل الخساره ودي بيتحكم فيها أسعار السوق لذلك لازم الواحد يلف السوق اول قبل اي شيء يزور مزارع _اذا أمكن _
اول خطوه فعليه هي البحث عن المزرعه المناسبة في المكان المناسب؛ شكل المزرعه بيعتمد على اذا كان بياض او لاحم ومكانها لازم يكون طرفي ساهل الوصول للطرق _عشان تنقل بضاعتك بسهوله_ لازم تكون منطقه نضيفه ما فيها أوبئة وما فيها مشاكل كهرباء او مويه
الخطوه الثانيه: الكتاكيت اللي ح تبدا بيها مشروعك ودي في شركات كتيره عندها أشكال ألوان وأسعار مختلفه عموما بالنسبه للسودان يتم استجلاب الكتاكيت من دول أوروبا هولندا مثلا غالبا اصحاب المشاريع الصغيره بيبدأ الدوره الأولى بعدد قليل ٣ الف مثلا ثم بيتم زيادتها تدريجيا
الخطوه الثالثة: معدات المزرعه ( الاكالات+الشرابات+ الارضيه حسب عمر الداجن وحتى أدوات الأكل والشراب بيعتمد على عمر الداجن لازم تكون أدوات جودتها عاليه تنظف وتعقم جيدا قبل الاستخدام وفي مزارع تؤجر بي أدواتها في الحاله دي واجب التعقيم الاحتياطي) وجود مخزن للعلف مهم مع ميزان
الخطوه الرابعة : معرفه مكان الحتجيب منه العليقه والتأكد من جودتها بأخذ عينات للمعمل لفحصها وفي معامل كتيره بتعمل كده ؛ العليقه منخفضه الجوده حتظهر ليك في مشاكل صحيه في القطيع الداجن او مشاكل في الجهاز التنفسي لازم تكون جودتها مرتفعه وبتادي غرضها وفي جداول تغذيه مخصوصة
الخطوه الخامسه مهمه شديد: جدول التحصين اهم شيء انو الدجاج يأخذ لقاحاته كامله مكمله اي إهمال في اللقاحات بيعرض القطيع كامل للخطر وللأسف أمراض الدواجن لو دخلت القطيع ممكن تنتهي ليك منو في ساعات ! زي ما عملت كورونا في إيطاليا نحن فعليا بنشوف خراب بيوت في الموضوع دا
لازم كل لقاح يؤخذ في مواعيده بطريقته الصحيحة ميرك مثلا عمر يوم وهكذا وبكون حسب المناطق في أوبئة احيانا بتكون متأصله في مواقع معينه مهم جدا انو كمان المزرعه تكون محميه ما اي زول يدخل لانو ممكن ينقل المرض وممنوع زياره حراس المزارع لبعضهم البعض
الخطوه السادسة : العمال غالبا( دكتور بيطري مهم جدا للمتابعة والتحصينات وملاحظه سلوكيات الدواجن احيانا بتنتقل عادات سيئه بين الدواجن ما بلاحظها الا الدكتور
محتاجين أيضا عمال في المزرعه_حسب حجمها_ لمتابعه النظافة والإطعام وقياس الوزن وتجميع البيض وفي المزارع المتطوره يتم ضبط كل ذلك بلوحات تحكم
الخطوه السابعه: تسويق المنتج حقك لازم تكون عارف طريقه اللي حتوصل بيها المنتج حقك للسوق وطرق التعبئة والنقل ومراعاة سعر السوق والفجوات اللي في السوق لذلك الدراسه الاوليه مهمه وعمل مسح عام
حاجه مهمه عاوزه أضيفها من خلال خبرتي وشغلي في الدواجن ؛ الدواجن لمن تكون بادي بعدد صغير ممكن العائد يكون غير مجزي ودا عامل مهم لازم تحسبه اذا انت عاوز تعمل مشروع وهو _جهدك_ المجهود أيضا يحسب مع راس المال ودا مشروع محتاج تركيز واتباع الإرشادات الصحيحة يعني لو اتعمل من غير خطه
إداريه ممكن تظهر ليك تعقيدات في نص المشروع وقتها بتكون أصلا بديت وتبدا تخسر لذلك مهم مراجعه كل الجوانب التي سبق ذكرها بالإضافة كل ما كان المشروع كبير ومتواصل مع مجالات أخرى زي الزراعة مثلا العائد بكون اكبر
العالم فيه ترندات جديده وعديده في تربيه أهمها المزارع العضويه اللي بكون فيها غذاء الدجاج صحي ونظام التربيه مفتوح لإنتاج بيض free range ودا في دول كتيره الناس بترفض تستهلك البيض الناتج من دجاج البطاريات
اخيرا من وجهه نظري المشروع محتاج ٣ حاجات ١/دراسه وافيه وكافيه ٢/ الشغف مهم جدا تكون شغوف بالمزرعة وتجتهد ليها وتحب قطيعك كل ما تديه حيديك ٣/ المغامرة والإقدام وبتمنى التوفيق للجميع ....رؤى عربي
***عفوا لاحظت انتي كاتبه عليقة والأصح علف
جاري تحميل الاقتراحات...