ثريد عن الأكل الهندي وازاي انة سهل قوي يتعمل في البيت وتبطلو تدفعو فلوس كتير في مطاعم مصر الهندي الغالية
الاكل الهندي متفجر بالطعوم والبهارات في كل لقمة، سواء كان بالرز او بالعيش بتاعهم النان او الشاباتي،. وهو يعتبر اب كل المطابخ الاسيوية وصولا حتى تأثيرة في مطابخ الخليج العربي كلها، وصلنا منة في مصر الأثر اليسير في الكشري اللي احنا طورناة وحلقنا بية بعيد واللي في الصورة ابو الكشري
طيب اية فلسفة الطبيخ الهندي عموما، صوص اساسي يتفرع منة صوص ثانوي ويتطبخ فية لحمة خضار فراخ حمص عدس او مكس بينهم شغال برضو ، ثم يتاكل مع رز ابيض مسلوق او اي نوع رز تاني بيتعنل زي الرز المفشر او العيش الهندي مع أصناف جانبية اسمها تشاتني او شاتني لو فلاح مش هتعرف تنطقها
التشاتني دي عبارة عن صوصات مختلفة ومكسات عجيبة حلوة غريبة او مكسات جوز الهند بالبهارات والشطة حاجة عظمة العظمة، طيب لو عايزين نعمل اكل هندي في البيت وسهل نعمل اية ، سهل خالص، نعمل الصوص الأساسي اللي هو شبهة التقلية بتاعتنا بالظبط اللي بنطبخ فيها الخضار بتاعنا بس تقليتهم مبهرة
ومشطشطة بس سهلة، عبارة عن بصل جوانح في زيت يتحمر مع توم مفروم وجنزبيل مفروم ثم علية معلقتين بهارات هندي وشطة وفلفل اسود وملح وكركم ومعلقة صلصة او طماطم مكعبات لحد ما يسبك نطفي وناخدة في الخلاط او المكسر نضرب امة حتى يستغيث ويعمل صوص متجانس
من النقطة دي نقدر نحط الخضار او اللحوم بتاعتنا ونسوي في الصوص شغال أو نرفع مستوى الطعم بعمل صوص ثانوي كمان زي إضافة لبن جوز الهند، شوربة، تمر هندي، كريمة طبخ، زبادي، وياخد غلوة ثم نحط الخضار واللحوم بتاعتنا
طيب اية هي خلطة البهارات الهندي، هي تقريبا كل بهارات العالم مخلوطة مع بعض ?? واسمه جرام ماسالا، وكل منطقة في الهند ليها خلطتهم المميزة بنسب مختلفة ، بتتباع جاهزة او تتجاب تتسخن كلها في حلة وتطحن وتتشال،. مش هقول على مكوناتها دورو على النت انزلو من على نافوخي زهقت كتابة
فراخ وخضار ولحمة بالطريقة الهندي، جربو تعملوها مع رز ابيض مسلوق وسلطة زبادي بالخضار مش هتندمو ، المهم قطعو الفراخ واللحمة مكعبات زي الشيش طاوق وكباب الحلة وفننو في مكس البهارات
جاري تحميل الاقتراحات...