#يسقط_قانون_2220
أظن أن الأمور اللي مخالفة للدستور ويجب المعاقبة عليها واضحة وضوح الشمس ! و حتى الرداءة والإشاعة واضحة ولكن هذا ما كايعنيش أنك تحبس حرية التعبير كاملة باش تحارب هادشي . أنا شخصيا فهاد العالم الرقمي ياما شفت ديال الأخبار المزيفة

فنفس الوقت ياما تعرضت للسبان والمعيور بشتى أنواعه ولكن فنفس الوقت كانقول خليه يعبر ولو بهاديك الطريقة مادام ما كايمسش بالسلامة الجسدية ديالي ، فكرة أنك تحصل على ترخيص باش تحل صفحة فالفايسبوك ولا قناة فاليوتيوب باش تكون عندك رقابة على اش كايتقال كاتجيني كاتعامل كلشي بحال بحال

و فنفس الوقت كاتحبس واحد الصوت باغي يعبر . وعاد نقطة أخرى اللي هي ما عندكش الحق تشكك فجودة وسلامات بعض المنتوجات والبضائع فكرة غريبة شوية لأنه طبيعي إيلا شركة حسات باللي كاتعرض لهجوم دير متابعة قانونية ولكن باش القانون يحميها حيت واحد عطى رأيو فالمنتوجات والبضائع

هنا بحال ايلا كاتقول ليه سكت ما دويش . كانتمنى أن هاد القانون يكون قديم و ما وصلش لمرحلة يصادقو عليه كيفما عند أمل أننا نزيدو القدام بهاد البلاد ونآمنو بالأراء كيفما كانت . نتمناو توضيح ونتمناو خير فاللخر . لأن ماشي قفل الأفواه هو الحل