معك بكالوريوس بالاقتصاد وما لقيت وظيفة؟ لقيت وظيفة وتحس أنها ما تناسب طموحك؟ في هذا الثريد بشاركّم مجموعة أفكار بإمكانها ترفع احتمالية حصولك على وظيفة بإذن الله..
١- يمكن أنها معلومة بديهية ولكن تأكد أن سيرتك الذاتية مكتوبة بشكل مميز ويعكس جميع المهارات الموجودة عندك.. ومافيه مانع من استشارة أهل الخبرة بالمجال حتى لو كان نقدهم قاسي عليك..
٢- من ناحية طبيعة الوظائف الي تناسب الاقتصادي، كثير منها ما يندرج تحت "نبحث عن اقتصادي أو طلاب اقتصاد"، وهنا يجي دورك بأنك تعرّف جهة العمل بقدراتك ومهاراتك وليش أنت مناسب للوظيفة..
٣- المهارات الي لازم تكتسبها كاقتصادي هي التحليل بناء على إحصاءات وبيانات، ولازم تقدر تدرس العلاقات وتشوف الأسباب والنتائج، وهذي المهارات تحتاج ممارسة عشان تكتسبها وفيه وسائل تعطيك جرعة قوية للأمام إذا ألميت فيها..
٤- من هذي الوسائل فيه لغات برمجة سريعة التعلم وبرامج مطلوبة بالتحليل الاقتصادي الاحترافي مثل: (بايثون، R، ماتلاب، ستاتا)، هذي اللغات والبرامج سهلة التعلم ولها فائدة كبيرة بإنتاجية عملك..
٥- من أهم مزايا دراسة الاقتصاد كسب مهارات تساعدك على دراسة العلاقة بين المتغيرات: مثلًا ليش ارتفعت المبيعات؟ ليش انخفضت الأرباح؟ ولذلك وضح قدرتك على التفكير النقدي + مهاراتك التحليلية باستخدام البرامج السابقة..
٦- كيف ممكن توضح قدرتك للشخص الي بيوظفك؟.. اعرف أن الاقتصادي يقدر يعمل بكل القطاعات تقريبًا، ولكن فيه قطاعات تفضل الاقتصادي على غير الاقتصادي.. المهم أنك تحدد القطاع الي ودك تعمل فيه وتنتقل للخطوة القادمة..
٧- بعد ما تحدد القطاع، تبدأ تقرأ فيه كتب وأبحاث ومقالات عشان تربط بين الواقع النظري والعملي للقطاع، وأبدأ بجمع بيانات عن القطاع وحاول استنتاج أشياء مثيرة للاهتمام..
٨- أبدأ بعمل تقارير قصيرة عن القطاع، مب شرط تكون تقارير خرافية وتجي بشيء جديد كليا، الأهم تكشف تميّزك بإيجاد ملخصات ونتائج مهمة وبيانات مفيدة وتُظهر قدرتك على الربط والتحليل والاستنتاج، وبعدين شاركها مع المهتمين بهذا القطاع وانشرها للناس..
٩- عملك الكتابي أو السمعي أو البصري، يميّزك بأنه يكشف مهاراتك الكتابية والإلقائية والتحليلية للي وده يوظفك، وفيه مواقع كثيرة بالإنترنت لنشر مقالاتك وتقاريرك بحيث يقدر يلقاها المهتمين..
١٠- لا تركز ببحثك على الشركات الضخمة والمعروفة فقط، بل حاول يكون بحثك شمولي نوعا ما، أحيانا ممكن تلاقي شركة ناشئة أو متوسطة تعطيك فرصة تثبت نفسك بالقطاع وتصير معروف ومستهدف من شركات أخرى..
١١- المؤهلات والقدرات أحيانا ما تكفي أنك تلقى وظيفة، بل ممكن تحتاج علاقات، وبعملك بالأفكار السابقة بيكون عندك جسر لتكوين علاقات مع أهل الخبرة بالقطاع، احضر ندوات مؤتمرات..الخ ، وشارك واسأل وابرز عملك لهم..
١٢- أخيرًا، لو تخرجت قبل القيام بأي من هذي الأفكار، ترى ما فاتك شيء إن شاء الله، الوقت معك وتقدر تبدأ تطبقها، وشخصيًا أحبذ أن الطالب من مرحلة البكالوريوس يبدأ بتطبيق الأفكار والتركيز على قطاع أو اثنين يتوظف بهم مستقبلًا..
جاري تحميل الاقتراحات...