رتبها

هذا الثريد راح يكون مرجع لكل شخص يتمنى يكون رسام لكن تنقصه بعض المعلومات او كلها ، راح انزل لكم معلومات حسب "تجاربي" عن الوان "الزيت" "الاكرليك" "المائي" "اقلام الرصاص" وحاجات اخرى 🧑🏻‍🎨 :

اليوم راح اتكلم عن "الالوان المائية" او "Watercolors” , وش هي؟ ووش الادوات الصح اللي نستخدم معها ووش افضل الماركات؟

اولاً ، الالوان المائية يميزها شفافيتها العالية وتفاعلها مع الماء وكيف نقدر نوصل لدرجات شفافة جداً باستخدام نفس اللون بالاستعانة بالماء بس ، عندنا المثال بهذي الصورة ، الاختلاف فقط بكمية الماء المضافة ، وش استخدمت؟ اللون نفسه وبكل مره ازيد كمية الماء الى ان وصلت لشفافية الزجاج

عندنا طريقتين للتلوين :
١- "رطب على جاف" :
معناها نأخذ اللون مع الماء ومباشره نلون على الورق وهنا يكون سرعة امتصاص الورق للون اسرع والثبات اعلى ومافي مجال للتعديل

٢ - " رطب على رطب" :
نبلل المكان اللي نبي نلونه بماء نظيف "خفيف جداً" وبعدها نلون نفس الطريقة الاولى ، عندنا هنا طريقة الانتشار تفرق ، اللون اخف بحكم الماء اللي حطيناه اول ، وحلوه هذي الطريقة خصوصا للبناء "نحط اللون بدرجات خفيفة حتى نصل للون المطلوب"

نجي الان لأكثر سؤال يتكرر "وش افضل كراسة للالوان المائية؟"
افضل شي ؟ يكون سُمك الورق ٣٠٠قرام و٢٢٠ لا بأس به
الماركة ؟ ماتفرق مره اهم شي السُمك👆🏻
هل بيفرق لو اخذت كراسه سُمكها اقل؟ ايه بتحصل معك انتفاخات ومطبات وماراح تتحمل الماء

عندي هنا مقارنه لكراستين استخدمهم كلهم وكلهم يطلعون لي نتايج كويسة ، ليه؟ لاني عرفت كيف اتعامل ، ف لو عرفت تتعامل بتكون انت المتحكم بالادوات
"اللي على اليسار من افضل الكراسات للألوان المائية"

طيب نورنا الورق يتفتت معي ليش؟
الماء كميته مبالغ فيها اول تفرك الورق بالفرشه بخشونه ، او الورق رقيق مو مناسب
طيب وش كمية الموية اللي مفروض استخدمها؟ حسب رسمتك وحسب يدك وش ترتاح عليه لكن انا افضل تكون ٣ نقاط مويه ونقطة لون

طيب استخدم رصاص عشان احدد الرسمة؟ ايه تقدر بشرط لما يجي وقت التلوين تمسحه بالمساحه ومايبقى منه الا شي بسيط عشان مايوصخ اللون عليك ، لكن انا شخصياً مارسم برصاص الا قليل افضل غالباً الالوان الخشبية "لون احمر او اصفر او بني" الرسمة تبقى نظيفة والالوان تندمج مع اللون المائي

طيب وش استخدم فرش؟
انا شخصياً الفرشه اللي تتعبى اكرهها جداً لانها تقطع لي الورق وتعطيني كميات مويه انا بغنى عنها ، ف هذي نموذج من الفرش اللي استخدم وجداً رهيبة للالوان المائية👇🏻
كلهم ماركة “Faber-Castell” جميع الاحجام

طيب وش افضل الوان؟
فيه جاف وفيه عصار ، شخصياً؟ افضل الجاف خصوصاً ماركة koi

واخيراً هذي بعض لوحاتي بالألوان المائية :

وحده سألت سؤال :
"وش تنصحيني اخذ الوان كـ بداية؟"
عن نفسي جربت كل الالوان عشان اعرف انا وش انتمي له ووش اللي يدي ترتاح عليه
المائي : رقيق جداً وحلو لكن برضو دقيق
الاكرليك : جداً حلو ويناسب المبتدئين وله تكنيكات كثيره
الزيت : جميل جداً ويعطيك نتايج جباره لكن احترافي اكثر

وش تبون نتكلم عنه اليوم؟

الاكرليك يبي له تفصيل ورواقه صدق ، ف بما ان الاغلب كلموني بالخاص عن الرصاص ف موضوعنا اليوم بيكون اقلام الرصاص وممكن نتطرق للكراسات وانواع الورق

اليوم بنتكلم عن اقلام الرصاص يمكن تقولون ليش نتكلم عن اقلام الرصاص كلنا نعرفها!
لكن السؤال هل اقلام الرصاص كلها شي واحد؟
طبعاً لا !
اولاً لازم تعرف معي ان الرصاص له درجتين مختلفه “H” و "B”
والدرجة المشهورة اللي كلنا نستخدمها من قبل ندخل الابتدائي هي "HB” وهي الدرجة الوسطية بينهم

طيب بتقولون لي وش الفرق؟
الفرق ان “H” درجاتها جداً فاتحه "جداً" ونفس تكوينها بطبيعته قاسي اكثر من الدرجة الاخرى واقدر اقولكم هذي الدرجة رهيبه لتخطيط الرسمات ماتوصخ علينا كثير بحكم انها فاتحه جداً ، وايضاً تستخدم لتظليل الاماكن الفاتحه بالرسمه عشان تعطينها شعور اقوى بالظل والنور

والان نجي للدرجة الرهيبة "B”
هذي الدرجة هي الغامقه ولما اقولكم غامقه صدقوني غامقه والتكوين والملمس انعم من الH ف التلوين هنا ممكن يكون اسرع وانعم ، طبعاً بشكل بديهي تستخدم للظل والاماكن الغامقة ..
معلومة مهمه :
B > B2 <B8 ، هنا كل مازاد الرقم؟ تغمق اللون
الH؟ كل مازاد تفتح اللون

طيب الHB كويس؟
كويس وكلنا بدون استثناء تعاملنا معه لكن ماراح يعطيك درجة غامقه زي الB
طيب اقدر الون بدرجة وحده من الB?
ايه تقدر تاخذ B4 مثلاً وتتحكم بالفاتح والغامق بضغط اليد وكل ماتمرست بيقل احتياجك للتعدد بالاقلام بس اكييييد مو ١٠٠٪ لان نحتاج الدرجات عشان يبان التنوع برسمتنا

طيب نورينا نشوف رسامين كثير يبرون اقلامهم بمشرط مو براية ليه؟
طبعاً معروف ان القلم الحاد؟ بيأذي الورق ولما تجي تظلل بتطلع خطوط واضحه بالورق حتى لو دمجت ف نعتمد طريقة البري هذي 👇🏻عشان الرصاص يكون ناعم دايماً + مايحتاج نبريه كل خمس ثواني لاننا مطلعين كمية كويسه منه خلاص

طيب الاقلام الميكانيكية حلوة؟
ايه حلوه مره لكن بشرط يدك تكون خفييييييييفه
يعني لو انت مبتدئ ؟ خلها لين تتعلم خفة اليد ولا بتدمر الورق عندك وتخلي الرسمة كلها اثار

نجي للمساحات ، تحسونها امر بسيط بس لا ، المساحة العاديه لو نمسح فيها درجة غامقه بتتوصخ ونجلس نحاول ننظفها عشان نرجع نمسح فيها ، بينما هذي المساحه تمسح وتعجنها زي الصلصال وترجع لك جديده نظيفه 👇🏻
موجوده بجرير

طيب انا مبتدئ ماقدر اشتري كراسات غاليه لاني لسا اتعلم !
اي سكيتش بوك يفي بالغرض
ولو انت بترسم وترمي؟ اشتري لك ورق تصوير عادي بشرط "فقط للتدريب" مو بترسم عليه رسومات صدقيه

بالنسبة للكراسات ، هذي مثال على كراسات "احترافية" ولكن تقدر تاخذ اللي يناسبك سعراً وحجماً وبرضو ترتاح لها انت

ومعلومة مهمه ابي لها تغريده لحالها
"لاااااااتضغط على القلم وانت ترسم وتقولي رسمي رسم اطفال والورقه تتوصخ معي"
شوفوا الفرق بالنظافة لما مسحت جزء
والفرق بالتحديد كيف مزعج للعين وكأنه رسم طفل👇🏻
هنا لما تضغط هنا لما تخلي يدك خفيفه

بالنسبة لي هذا افضل براند لاقلام الرصاص تجي بالحبة وتجي مجموعة كذا 👇🏻

بالنسبة للدمج اللي كلنا نحبه ، نبي الرسمه تكون ناعمه والظل والنور كلهم مدموجين ، طيب وحنا بزران نستخدم اصابعنا ولا منديل ، معقوله نستخدمها الحين؟ تبون الصدق؟ انا استخدمها احياناً لاتعلمون احد لكن الاداة الحقيقية هذي👇🏻”مدعكه" تجي احجام ولها برايه خاصه او صنفره اللي هي هذي بعد👇🏻

وبكذا ننتهي من قلم الرصاص ياليت استفدتو ولو شوي 💛

بما ان الرسم يجمع اغلبنا حبيت اسوي هاشتاق #ارسم_مع_نورينا اي احد منكم يرسم رسمه وحاب اني اشوفها يحطها بهالهاشتاق وعشان اشوف اذا نصايحي افادتكم وحمستكم واتحمس معكم اكثر 😍💛

تبون اليوم نتكلم عن ايش؟

اليوم بنتكلم عن الاشكال اللي سبق ورسمناها مع بعض 👇🏻
كلكم تسألون ليه ؟ ووش الفايده؟
بختصرها لكم اختصار شديد واعطيكم الزبده وماراح اكثر فلسفه ..

باختصار؟ اي شكل نبسطه ونجرده من شكله الاصلي؟ يتحول معانا لشكل هندسي ، وهذا يعلمنا انه .. اي شكل نبي نخططه؟ لازم نبدأ باشكال مبسطه واللي هي؟ دائرة مربع مثلث ...

بما معناه ، انا لو تعلمت اظلل وارسم هذي الاشكال؟ راح اعرف ارسم واظلل كل شي ، لان اصلاً هالاشكال هي الاساس
ولو عرفت اظلل بالرصاص؟ بقدر استخدم كل هالمهارات بالالوان كلها لاني بعرف التكنيك الاساسي ..

هنا امثله بسيطه على كلامي

هذي هي باختصار ، ف اللي ماكان معانا الايام اللي فاتت؟ يمديه يرجع للهاشتاق " #ارسم_مع_نورينا " ويشوف الاشكال اللي نزلت ويطبقها عشان يمشي معانا بالرسمات الجايه ..

اليوم راح نتكلم عن اكثر ألوان محبوبة "ألوان الاكرليك " 🎨:

أول شي وش هي الوان الاكرليك ووش فرقها عن الزيت والمائي؟
اول شي تشبه الزيت بقوامها "غالباً" لان احياناً يكون سايل
وتشبه المائي باننا نقدر نستخدم الموية معها بكل اريحية
ولما تجف؟ تكون اشبه بالبلاستيك
جفافها سريع جداً وحالما تجف مانقدر نمسح او نعدل والبعض يعتبرها ميزه والبعض لا

- هل تناسب المبتدئين ؟ ايه
- تحتاج وسيط معها؟ فيه لها وسيط بس نقدر نكتفي بالمويه وعن نفسي مكتفيه مرة
- طيب نورينا الاكرليك دايم ينشف بسرعه وانا قاعده اشتغل عليه فيه حل؟ ايه الاكرليك صديق المويه لذلك طول وقت الشغل يكون معنا بخاخ مويه بدون اضافات ونبخ على الباليت وعلى اللوحة

طيب اقدر ارسم فيها على كراسه؟ اذا انت محترف مره تقدر ترسم بمساحات بسيطه بس +بدون اي مويه ، لكن بشكل عام لا مانصح
الا بكراسات الكانفس المخصصه زي هذي 👇🏻

طيب نورينا الفرش بعد الاكرليك دايم تنشف ومقدر انظفها ؟
لاااااا تخلونها بالهواء ابد 😡😡😡😡
خلو معكم كوب مويه واي وحده تخلصون منها على طول حطوها فيه ولو تخلونها اسبوعين بعدين تغسلونها عاددددي اهم شي ماتجلس بالهواء

طيب فيه ماركات معينه تنصحيننا فيها؟
الاكرليك كثيييييير اشياء حلوه ويميزها اسعارها جداً حلوه هذي مثال على الماركات 👇🏻
ملاحظة : (المجموعة للحين ماجربتها)

طيب وش احسن فرش للاكرليك؟
كل الفرش اللي بالكره الارضية

طيب نورينا بالتخطيط دايم اذا خططت بالرصاص ولونت اكرليك تطلع الرسمه وصخه شوي !
حاول تستبدلون الرصاص بقلم بني او احمر ولاحظو الفرق الشاسع

وش الاشياء اللي اقدر ارسم عليها بالاكرليك؟
كل شي ، الاكرليك سهل التعامل معه وبحكم سرعة جفافه يمدينا نلون فيه اي شي و٩٠٪ ماراح يتأثر بالعوامل الخارجية ، وهذي امثله 👇🏻

نجي لأكثر سؤال يجيني :
انا ببدأ رسم وحاب الاكرليك بس مدري وش اخذ ادوات ؟
كل اللي تحتاجه ..
ألوان "شوف الماركات اللي فوق"
فرش "اي فرش والحجم حسب احتياجك"
لوحة كانڤس " كل اللوحات تؤدي الغرض اللي ب١٠ واللي ب٥٠ ، واذا حاب اللوحة تكون احترافية اكثر أسسها بجيسو (لونها كلها بعدين ارسم)"

وعندنا مادة الجيسو ، تستخدم مع الزيت والاكريك واللي تبون
وش فايدتها؟ تستخدم للتأسيس ، او للارتفاعات بتفاصيل الرسمه لو حابين
وانا استخدمها استخدام ثالث ، استبدلت اللون الاكرليك الابيض فيها لان قوامها اثقل وتغطيتها افضل وتعطيني نتايج احلى

وش افضل باليته للاكرليك؟
انصح بالرخام والقزاز والبلاستيك
وابعدو كل البعد عن الخشب لانه يمتص الرطوبه اللي باللون ويخليه يجف بسرعة

وهذي بعض لوحاتي بالاكرليك 👇🏻:

بكذا نكون انهينا ألوان الاكرليك اتمنى افدتكم 💛

اكثر سؤال يتكرر بشكل عام :
كيف اطور نفسي واصير محترف؟
"الممارسة"

اليوم بنتكلم عن لوحات الكانڤس ❤️:
واللي هي الاساس لرسماتنا

ايش هو الكانڤس ؟
يقصد به القماش الكتاني اللي نقدر نرسم عليه بالالوان سواء زيت او اكرليك او قواش

يجي شكل واحد؟ لا
يجي رول ، يجي كراسات ، والاغلب والشائع يجي مشدود على خشب وجاهز عشان نرسم عليه وطبعاً باحجام مختلفه

هذا الرول ، تقصون منه اللي تبون وتشدونه على خشب اذا خلصتو او حتى تحطونه داخل إطار

وهذي الكراسة 👇🏻 فكرتها واضحه ماتحتاج توضيح

وهذي اللوحات الجاهزه 👇🏻
اكيد بتقولون وش افضل ماركة؟ هذي اللي بالصوره تعتبر من الافضل
لكن ممكن تاخذ اي ماركه تعجبك انت وسعرها يناسبك
طبعاً تجي اشكال واحجام متنوعة مرة 👇🏻

دايم يجيني سؤال ، ينفع نستخدم الوان مائيه عليها؟ لاااا ابداً ماراح تنجح
لكن هذا الشي 👇🏻 يسمى "ناصبيان" ماعرف اذا له مسمى اخر لكن يعتبر هو كانفس الالوان المائية🙏🏻💛

وبالنسبة لاسهل طريقة لشد لوحة الكانفس؟ نرشها بمويه بغزاره قبل نشتغل عليها ونخليها تنشف راح نحصلها شدت نفسها جداً ، يفضل استخدام بخاخ مويه مو غسل ولا صب

وبكذا نكون خلصنا موضوع الكانفس 🙏🏻💛

@aw32a جربي صنفرة

التصنيفات

المزيد من هذا الكاتب

مواضيع ذات صلة

الأكثر اعجابا

التصنيفات

المزيد من هذا الكاتب

مواضيع ذات صلة

الأكثر اعجابا

فك الثريد