نفسي أكتب كلمتين عن مسلسل البشاير و عن شخصية العزيز على قلبي أبو المعاطي شمروخ .. أرجو أن تفسحوا صدوركم
قصة المسلسل فريدة جدا في وقتها و غريبة وسط قصص المسلسلات اللي غالبيتها عن الصراع على ميراث..قصة بتتكلم عن فلاح أصيل عائد من غربة إتفرضت على مجتمعنا بسبب ضيق العيش في فترة ما بعد الحرب و ممثلة بتعاني من أزمة نفسية دفعتها للإدمان..خطين بعالمين بعاد جدا عن بعض و الغريب انهم يتقابلوا
فلاح أصلي رجع بعد غربته في بلاد النفط لقى قريته و أهلها بيتشقلب حالهم و الاراضي بتتباع و بيوت الاسمنت بتظهر و تجريف هوية الفلاح بدأ على قدم و ساق ماعملش زيهم و قرر يهجر قريته و يهاجر هجرة جديدة جوة بلده و ياخد أرض جديدة يعمرها علشان يعيش عيشته و تفضل جدوره هي هي
أبو المعاطي رمز للفلاح اللي مابهرتوش "أضواء المدنية" و زخارفها التافهة .. لا رجع بتليفزيون ملون ولا بجهاز ڤيديو و مروحة ولا قال أبني بيت أسمنت زي غيره ما عمل .. بالعكس إشمئز من فعلهم و بطرهم على حياتهم الاصلية و قرر يبعد بهويته و أصوله و يبدأ في مكان جديد
أحيانا كان بيظهر أبو المعاطي لابس أوڤارول الجيش و ماسك السلاح بحرفية مسكته للفاس كرسالة إنه ممكن يتحول لمقاتل شرس دفاعا عن أرضه
أبو المعاطي فلاح علاقته بالفن شبه معدومة إلا من حفلات المداحين اللي شايف إن ده فنه اللي بيعبر عنه وبيصطدم بالفن المعروف لنا اللي هو بعيد عنه كل البعد و شايف إنه مجرد هلس و بيبدأ يتعرف عليه من واحدة من نجومه..هو حبها كإنسانة مش فنانة و هي حبته كقيمة و هوية بتضيع وسط زيف المدنية
فلسفة المسلسل هي علاقة الفن بالمواطن البسيط .. هل الفن بيوصل له و بيعبر عنه و بيأثر فيه ولا هيفضل شايفه انه مجرد وسيلة تسلية و هلس و همبكة و تلاهي مش أكتر .. طبعا الكلام ده بقى قديم بالنسبة لنا والسؤال إتجاوب عليه خلاص و الدليل نموذج محمد رمضان اللي بيأثر في أجيال دلوقت !!
و أخيرا ..أبو المعاطي هو البطل الأصلي و الحقيقي للبلد دي .. البطل اللي بقى الكل بيتنكر له و بيصتعر من و يوصم أي حد ماعدوش ذوق أو لبسه بسيط أو مش متزخرف بزخرفة المدنية انه فلاح .. أبو المعاطي أصلكم و سيدكم و تاج راسكم
.. شاء من شاء و أبى من أبى
.. شاء من شاء و أبى من أبى
جاري تحميل الاقتراحات...