ثريد لما العايله نسوني بالمخيم ومسوين نفسهم ما يدرون اني بنتهم⭕️⭕️
كنا مخيمين بالديره وزي كل سنه انا اسوي نفسي فضه قلبها ابيض واخلي الكل يختار مكان ينام فيه وبالنهايه اقعد جنب الباب واصارع الموت مع الهواء والحشرات لين ربك يحلها
واذا قمت اقعد اصيح لاني مانمت كويس والمشكله مابغى ارجع البيت مسويه نفسي بنت الديره والبران وجوي مره، والله لا يعيد الساعه اللي قلت فيها لجدي اني بروح واحطب معك
وركبني معه ورحنا بعيييد ونزلني وعطاني فاس وقال يلا احطبي لنا هالشجره وقعد عندي ٥ دقايق عشان الضمير بس وراح وخلاني وانا احسبه طقتين وتنقطع ذالشجره يوم انها عيت تتحرك من مكانها
والساعه ١ الظهر والشمس فوق راسي وافاعي بكل زاويه وحشرات والشجره نفسها اللي انا قاعده احطبها عليها كل انواع حشرات العالم ومافيه أي بشري يتنفس حولي
عاد جدي يحسبني سوبر مان هالزمن ومحد قدي وياويله اللي يقول لي شي وقلت بس خلاص والله مارجع الا وهالشجره معي واقعد اكسر فيها وماحس بكتوفي ويدي واكسر اكسر واحسب انها بتطيح وعيت لا تتحرك حرفيا ماتغير مكانها
وقعدت ٣ ساعات ونص واخيراً طاحت وتذكرت ان جوالي بسيارة جدي....والحين يلا وش يرجعني انا؟ واوقف فوق الجبل ومعي هالشجره وشعري منكوش ووجهي احمر وملابسي ممتليه من هالشجره ومعي فاس كأني من قطّاع الطرق
طبعا بتسالوني ليه رحت فوق جبل؟ عشان ادور المخيم وش فيكم ذكاء محد يتمناه ادري وليتني طاقعه ولا رحت استهلكت طاقه عالفاضي وحاولت اتذكر جدي من وين جابني وامشي امشي لين شفت سياره الحمدلله واركض والهث وجوعااانه ماكلت شي من صحيت الهومليس ارحم مني
ويوم وصلت امي قعدت تستغفر وتذكر ربها تقول انتي تتنفسين؟ قلت ابي موووويه ويعطوني مويه ويسبحوني فيها عشان لا اموت واقعد ادور جدي عشان اوريه اني جبت الشجره معي ومالقيته قلت ابد بدق على ابوي اعلمه اني صرت بنت بر ومخيمات
وعيا لا يرد مو من زين الابراج واروح اصور له مقاطع واوريه وش كبر الشجره ابيه يمدحني اخر شي يقول ماشاءالله واسجل له فويس اشرح له معاناتي اخر شي تقول ماشاءالله وين المدح وين الفخر؟؟؟؟
ولا رد علي بس اصلا ماهتم واروح ادور جدي عشان اوريه ويوم وريته قال كفو بنتي ويلتفت على خوالي ويقعد يهاوشهم لانهم ماينفعون فقرتي المفدددله طبعا كلهم يبيضون الوجه بس جدي مدري وش فيه عليهم
وانا ذاك اليوم ماشوف اللي قدامي من التعب واروح انسدح ابي انااام بس ماش فيه فعاليات والجو حلو عيب يطوفني وكلها يومين وانا راجعه البيت الا يشبون النار من شجرتي اللي حطبتها وماوصفلكم كيف ذليتهم ذل على هالشجره
خالاتي: يلا نشب النار جانا البرد
انا وبدون سبب: ترا هذي شجرتي اللي حطبتها ٣ ساعات
برضو انا فجاه: وين شجرتي شبو منها نار
انا بعد: ترا انا حطبت هالشجره اليوم
انا وبدون سبب: ترا هذي شجرتي اللي حطبتها ٣ ساعات
برضو انا فجاه: وين شجرتي شبو منها نار
انا بعد: ترا انا حطبت هالشجره اليوم
المهم وننام ونصبح وخلاص خلص مخيمنا والناس ترتب عفشها وانا مسويه فضه قلبها ابيض للمره مليون وقلت بساعدهم وارتب معهم واخلي اغراضي اخر شي عادي ماوراي شي وليتني طاقعه برضو
لان الكل ركب السيارات وراحوا وانا قاعده ادور احسب باقي احد اخر شي الخيمات فاضيه لا اغراض ولا ناس ولا حتى فرشات ؟؟؟ بعدين قعدت افكر طيب دقيقه الناس راحوا اوكي ماوراهم شي بس اهلي ناسيني ليه؟ طول بعرض وناسيني؟
قعدت ٥ دقايق اعطيهم مهله يرجعون ومارجعوا وخنقتني العبره وجاني شعور انهم تخلوا عني واشتغلت الدراما وبديت احس انهم متفقين يتركوني ولاني طيبه وفضه قلبها ابيض ماحسيت وخلاص فات الاوان وبموت هنا ومامعي شاحن ومافيه رصيد ولا ابراج قعدت اخذ من شجرتي اللي حطبتها واشبها عشان لا اموت برد
وقعدت اواسي نفسي واقول شوف سبحان الله هالشجره اللي كنت اتحلطم منها وانا احطبها فادتني الحين وجلست افكر كيف اصير اكل حشرات زي هذاك اللي بالوثائقيه عايش بالغابات والحين بصير اصيد واكل واشويهم ع النار ولا بيجيني ذيب واخوياه ويهجمون علي وتخيلات مالها نهايه
هذا كله بربع ساعه حتى مامداهم اهلي يتذكروني وشوي يرجع خالي بالسياره يشيك على خيمة بعيده عني وياخذ منها شنطتين ويروح ويخليني؟؟؟؟؟؟؟ تحسبوني ناديته ولا شي لا قعدت بشوف يتذكرني ولا لا ويوم انه سحب علي خنقتني العبره وقعدت اصيح وافكر ليه ماتذكرني واضح انهم متفقين يخلوني
شوي جا خالي الثاني ومعه خالاتي والشغالات راكبين بصندوق الددسن وخالتي مشغله نغمة طاش ماطاش ذيك ويدق لي بوري وانا مسويه زعلانه لانهم ناسيني مابغى اركب شوي خالي يقول بتركبين ولا نروح ترانا متاخرين
يعني حتى مافيه احترام لزعلتي اللي بريال والله واخذ شجرتي وشنطتي واركب بالصندوق مع الشغالات ويسالوني ليش اصيح واعطيهم نظرات اللي ترا مالي خلقكم مساكين مالهم ذنب ويمشي خالي ويطعس كنه وقته وهالشجره ياما دخلت بعيني ياما طعنت صدري ياما لفت على خدامة خالتي المدلعه وقعدت تصرخ علينا
وينزل خالي وياخذ شجرتي مني وينزلها ويرميها ويقول تراك اشغلتينا وعيوني تدمع واقعد اناظره ابيه يرحمني قال ترا بتنزلين وراها لو ما تسكتين....
واكمل صياحي واحقد على خدامة خالتي الفلبينيه ليه تصرخ وتعلمه عن شجرتي؟؟ وكل شوي ادفها ابيها تطيح اخر شي لفت علي وعطتني نظره بغيت انزل من السياره
ويوم وصلنا بيت جدتي بالديره قعدت اتحلطم عند جدي وهاوش خوالي كالعاده لاني مدلعه وهو اكثر شخص بالعالم معطيني وجه ويعطيني فلوس واسكت زي البزر ????
واروح عند ابوي اعلمه ان خالي طيح شجرتي بالبر هالشجره اللي عيت تخلص وراح قال لخوالي اخر مره اخلي بنتي تخيم معكم هذي جزاتها تحطب لكم وتدفيكم وبدينا لعبتنا احلا ذل انا وابوي
وليومكم هذا اذلهم بذيك الشجره وكلهم معطيني وضعية الله ياخذنا يوم خليناك تخيمين معنا وهذي وجيهنا لو اخذناك مره ثانيه
جاري تحميل الاقتراحات...