رتبها

في ورقة preprint منشورة في موقع ChemRxiv بتتكلم عن فرضية مهاجمة فايروس SARS-Cov-2 للهيموغلوبين
الهيموغلوبين مكون من بروتين و حديد
الفايروس في الورقة المنشورة بيقولو انو بيهاجم الهيموغلوبين و بيطرد الحديد

الحديد مهم عشان الهيموغلوبين يشيل الاوكسجين و اذا مافي حديد لانو الفايروس طردو حتقل كفاءة الهيموغلوبين في انو يشيل الاوكسجين
الهيموغلوبين موجود في كريات الدم الحمراء

كريات الدم الحمراء بتشكل المكون الاساسي للدم من حيث الخلايا
و اذا الجسم فقد مقدرة الهيموغلوبين على انو يشيل الاوكسجين فمقدرة الدم حتتأثر.

و في كم دراسة و ملاحظة بتتكلم عن ارتفاع في الهيموغلوبين في بعض مرضى الكورونا و انخفاضو في البعض
و كذلك ارتفاع الفيريتين (ferritin) في اجسام المتوفين من المرض، ليه؟ لانو الفيريتين دا بيشيل الحديد الطلع من الهيموغلوبين

زائد انو مرضى الكورونا العندهم ARDS لمن يتوصلو بأجهزة تنفس صناعي ما بيتحسنو التحسن المرجو، في نيويورك ٨٠٪ من مرضى الكورونا البيتم ربطهم باجهزة تنفس صناعي بيموتو

ففي مقال منشور في Times تحت عنوان:
Why Some Doctors Are Now Moving Away From Ventilator Treatments for Coronavirus Patients
بيتكلم عن تدهور بعض المرضى عند ربطهم باجهزة التنفس الصناعي

و في مقابلة في Medscape مع طبيب طوارئ قال انو المرض مختلف عن كونو مجرد التهاب رئوي، و انو المرضى التغييرات الحاصلة عندهم بتشابه التغييرات البتحصل عند الناس البيجيهم داء المرتفعات (high altitude sickness) و انو بروتوكولات التنفس الصناعي مفروض تتغير.

في سلسلة بوستات ح احاول اتكلم عن التغييرات البتحصل في الاستجابة للمرض و للتغيير في خطط العلاج خاصة في النسبة الما محظوظة من المرضى البيكون مرضهم شديد و بيخشو عناية مكثفة
عشان تفهم المرض مفروض تفهم اول شي الطبيعي قبل يحصل المرض

مثلا كيف بنتنفس، كيف بنشيل الاوكسجين، كيف جسمنا بيستجيب لتغير الاوكسجين في دمنا او البيئة الحولينا، عن الـhigh altitude sickness و عن استخدام الـnitric oxide

حنتكلم عن اول عن استجابة الجسم لنقص الاوكسجين:
الأوكسجين مهم لتحرير الطاقة
و خلايانا في تنفسها بتعتمد عليهو
الأوكسجين بيمثل خمس الهوا
الاوكسجين بيتشال في الدم

و الدم دا مكون من موية بنسميها بلازما و مكون من خلايا
الخلايا البتشيل الدم هي كريات الدم الحمراء

٢٪ من الاوكسجين في الدم بيكون منقول في البازما
و ٩٨٪ منقول في خلايا الدم الحمرا، و السبب البيخلي كريات الدم الحمراء تشيل اوكسجين اكتر هو انها فيها هيموغلوبين

الخلايا بتاعتنا نسبة الاوكسجين البتجيها ما ثابتة و كمان نسبة الاوكسجين في الجو برضو ما ثابتة
نقص الاوكسجين بنسميهو هايبوكسيا (Hypoxia) و اتذكر هايبوكسيا دي لاننا حنستخدمها بدل نقص الاوكسجين، و كل ما ذكرنا هايبوكسيا فالقصد هو نقص الاوكسجين

لمن جسمنا و خلاياهو تتعرض لحالة من نقص الاوكسجين بتستجيب (من ضمن استجابات تانية كتيرة) بإنها تزود عددكريات الدم الحمراء، و هدفها من الحاجة دي انها تزود نواقل الاوكسجين

الحاجة دي ملاحظة في الناس العايشين في حتات عالية و جبلية، و السبب البيخلي انو الحتات الجبلية انو يكون فيها اوكسجين اقل هو انو كل ما طلعنا لفوق كل ما الضغط الجوي قلّا،

و لمن الضغط الجوي يقل حيقل معاه محتوى الاوكسجين و لو جينا للحقيقة؛ ف هو لانو نسبة الاوكسجين و باقي الغازات قلّت ف حيقل تباعا ليها الضغط الجوي، لأنو الضغط الجوي دا هو ناتج من مجموع الغازات القاعدة في الهوا

و استجابة جسمنا كنتاج لقلّة الاوكسجين (مثلا في الناس الساكنين مناطق جبلية) بإنو يزوّد عدد كريات الدم الحمراء دي بتتم عن طريق هرمون بيطلع من الكلى اسمو ايريثروبوييتين (Erythropoietin )

و مفروض نقول انو الناس العندهم فشل كلوي بيكون عندهم نقص في كريات الدم الحمراء (أنيميا) كنتيجة لفشلها (اي الكلى) في افراز الهرمون دا
و برضو مفروض نقول انو سكان المناطق الجبلية بيكون عدد كريات الدم زايد و الحالة البيكون فيها عدد كريات الدم زايد دي بنسميها polythycemia

المهم
استجابة الجسم لنقص الاوكسجين البتتم عن طريق زيادتو لإنتاج كريات الدم الحمراء البتتم عن طريق هرمون الايريثروبوييتين البيطلع من الكلى دا في عوامل بنسميها transcriptional factors بتتحكم فيها

وهرمون الايريثروبوييتين دا عشان انتاجو يزيد وللتبسيط نقول انو لازم الجين المسؤول عنو يشتغل

واحد من اهم الـtranscriptional factors دي البتخلي الجين المسؤول عن هرمون الايريثروبوييتين دا يشتغل هو hypoxia inducible-factor(HIF) و نسبتو بزيد كلما نقص الاوكسجين و العكس صحيح
*اتذكر الـHIF دا لانو حنذكرو كتير*

ف عشان كدا بقى الـHIF كأنو سينسر بيقيس نسبة الاوكسجين و بيعدل استجابة الجسم للحاجة دي تباعا بإنو يعمل كم تأثير، من ضمن تأثيراتو دي انو يزوّود الدم الأحمر، و في سبيلو لتحقيق الحاجة دي بيزوّد انتاج الايريثروبوييتين

الـHIF بيكون كتير في حالات الهايبوكسيا لأنو ما بيحصل ليهو تكسير بالبروتيسيوم (proteasome) و اتذكر النقطة دي طيب؟

لكن
و اثناء مافي مجموعة باحثين كانو شغالين في مرض اسموVon Hippel-Lindau لقو انو لمن الجين بتاع Von Hippel-Lindau يكون فيهو مسخ (mutation) بتكون نسبة الـHIF دي كبيرة و لقو انو لمن يرجعو الجين دا (بتاع Von Hippel-Lindau) في الفيران ف نسبة الـHIF بتقل و ترجع لمستواها الطبيعي

متذكرين لمن قلت ليكم انوالـHIF دا مابيتكسر في الهايبوكسيا؟ يلا ما بيتكسر (و نقول للتبسيط) لانو جين الـVon Hippel-Lindau كان شوية و لمن الـVon Hippel-Lindau gene انتاجو يزيد استجابة الجسم لنقص الاوكسجين بتقل لانو الجين البيشتغل في الايريثروبوييتين السميناهو HIF دا بيتكسر،

و من غير الـHIF دا الجسم ما بيقدر ينتج ايريثروبوييتين و اذا ما عندك ايريثروبوييتين بالتالي ما حيكون عندك زيادة في انتاج كريات الدم الحمراء، ودا شي طبيعي لأنك خلاص ما محتاج ليها لأنو نقص الاوكسجين انتهى

بالمناسبة؛ العلماء الـ ادوهم نوبل في الفيزيولوجي او الطب للعام ٢٠١٩ ادوهم ليها لدورهم في اكتشاف الـHIF و الـVon Hippel-Lindau gene و بإكتشافهم للعاملين ديل ساعدونا في فهم الكيفية البيستجيب بيها جسمنا و خلايانا لنقص الأوكسجين

برضو واحدة من استجابة جسمنا لنقص الاوكسجين هي بزيادة عدد دورات التنفس (دورة التنفس مكونة من شهيق و زفير)
و الطبيعي انو في الدقيقة دورات التنفس في المتوسط هي ١٢ دورة

لمن نسبة الاوكسجين تقل في الدم الجسم بيزود عدد مرات التنفس و تبقى دورات التنفس في الدقيقة اكتر من ١٢ و اذا زدت دورات التنفس بتخلي الفترة الزمنية للشهيق و الزفير قصيرة
و الهدف من الحاجة دي هي انك تدخل اكبر كمية من الهوا لجسمك

لمن تزود كمية الشهيق بتبقى كانك بتغرف في الهوا لجوا جسمك.

#انشر_الوعي
#سوا_نقدر
#COVID19
#coronavirus