مؤخرا اتناقشت كتير في الموضوع دة واكتشفت كتير من الاصدقاء معندهمش دراية كافية ازاي البيزنس بيشتغل وليه في ضغط لفتح الدنيا وشركات كتير رفدت ولسة هترفد ناس الفترة دي ... في الثريد دة هتكلم عن جزء من المناقشات دي في محاولة لتبسيط الأمور.
قبل ما نبدأ ... أنا مش خبير مالي ورأيي هنا جاي من تجربة شخصية من إدارة بيزنس صغير ومن اجتهاداتي في القراية. وكمان أنا مش مؤيد ولا معارض لفتح الدنيا لأن المشكلة دايما في التفاصيل. فيه فتح حلو وفتح خطر وقفل مفيد وقفل مضر. العبرة في التفاصيل ... نبدأ
أي بيزنيس في الدنيا من اول البقال اللي تحت بيتكو لحد شركة عملاقة زي جوجل عصبه ال cash flow. بيصرف كام وبيدخل كام في الشهر. في عوامل تانية كتير زي معاه كام في البنك وهامش الربح والديون اللي عليه لكن مازال العامل الأكبر لبقاء البيزنس هو ال cash flow.
المشكلة في الوضع الحالي ان العوائد اللي اي بيزنس بيعملها قلت بنسبة كبيرة أو وصلت للصفر علي حسب نوع البيزنس بينما المصاريف من مرتبات وإيجارات واقساط مازالت موجودة.
دة بيأدي إن عشان البيزنس يستمر لازم يا إما يكون عنده احتياطي نقدي كافي لحد ما الأزمة تعدي ... أو إنه يقلل مصاريفه علي قد ما يقدر عشان يتجنب تراكم الديون وتعرضه للإفلاس
من النقط اللي بسمعها من كتير من الناس ازاي الشركات معندهاش احتياطي نقدي يكفي مرتبات ٥-٦ شهور. يؤسفني اقولك عزيزي القارئ ان اغلب الشركات ماتقدرش تحوش المبلغ دة.
في شركات هوامش ربحها خزعبلية ودة بيسمحلها يبقي عندها احتياطي نقدي كبير زي جوجل وفيسبوك. فيسبوك اخر مرة بصيت كان عندهم ٥٤ مليار دولار في البنك وبيصرفو في السنة بتاع ١٠ مليار ... يعني ممكن يقعدو سنين مايكسبوش مليم والشركة تفضل عايشة.
للأسف الشركات اللي زي فيسبوك مش كتير. السوبرماركت اللي عندك في الشارع بيعمل ٥-٧٪ هامش ربح علي احسن تقدير. يعني لو بيعمل ١٠٠ ألف جنيه في الشهر فبعد مايصرف الايجار والكهرباء وبضاعة ومرتبات بيدخل في جيبه ٥ آلاف جنيه. يعني محتاج يحوش ارباح ٩ شهور عشان يبقي معاه احتياطي مصاريف شهر.
حتي لو افترضنا ان عنده احتياطي نقدي ، فغالبا الاحتياطي دة يكفي شهور قليلة والأزمة محدش عارف هتنتهي امتي وهنحتاج وقت قد ايه عشان العوائد ترجع زي الاول خصوصا في الصناعات اللي بتشغل ناس كتير وتضررت جامد زي السياحة. كل دة بينما المصاريف الكبيرة زي الايجار والمرتبات مازالت موجودة.
المشكلة التانية إن الفترة اللي فاتت كانت فترة نمو ودة بيخلي الناس عادة عندها استعداد اكبر للمخاطرة وبالتالي بيزنيسيز كتير بدل ما يبقي عندهم احتياطي كبير في البنك هما حاطين الفلوس دي في مشروعات توسع ونمو لسة بتصرف بس مابتجيبش فلوس.
ودة يرجعني تاني لنقطة الكاش فلو ... لو أنا بيزنس ليا ملايين عند ناس بس الناس دي مش قادرة تدفع أو فلست يا فرحتي أنا كدة مليونير عالورق وبردو مش عارف ادفع مرتبات الناس ولا الإيجارات ولا الأقساط ومعرض أنا نفسي للإفلاس.
فلما تمزج العوامل دي مع بعض: صفر عوائد مع عدم وجود احتياطي نقدي واستمرار لاغلب المصاريف الكبيرة فالنتيجة بتكون ان الشركات لازم تقلل مصاريفها علي قد ما تقدر علي امل ان الديون ماتفضلش تتراكم لحد ما يفلسو. ومن أكبر المصاريف اللي ممكن تغييرها هي المرتبات. عشان كدة الرفد بيحصل.
وعشان كدة أنا متفهم الآراء اللي مع فتح الدنيا ، لأن استمرار الوضع هيأدي لأزمة اقتصادية كبيرة ومعدلات بطالة غير مسبوقة. في نفس الوقت كل بني آدم من حقه يعيش ومش منطقي نخاطر بحياة الناس في وباء شرس زي دة عشان الفلوس.
بس تاني الإجابة مش سهلة والمشكلة تكمن في التفاصيل. وكل قرار له نتائج صعبة ومحدش اتعرض للأزمة دي قبل كدة وعارف الحل. اتمني يكون الثريد بسط المفاهيم الاقتصادية ووضح الدنيا شوية. تمت.
ملحوظة: أنا عارف أن في fixed costs و variable costs وان الموضوع معقد بس انا لتجنب الإطالة اكثر من اللازم حاولت مادخلش في تفاصيل أوي.
جاري تحميل الاقتراحات...